Miṅwaha Ya Ḓana Nga Fhasi Ha Vhuvhusi Ha Muvhuso!
“Mudzimu wa mulalo . . . nga a ni shomedze nga zwithu zwoṱhe zwavhuḓi uri ni ite zwine a funa.”—VHAHEBERU 13:20, 21.
NYIMBO: 136, 14
1. Mushumo wa u huwelela wo vha u wa ndeme lungafhani kha Yesu? Ṱalutshedzani.
YESU o vha a tshi funa u amba nga ha Muvhuso wa Mudzimu. Musi Yesu e kha ḽifhasi, o amba nga ha Muvhuso u fhira thero naho i ifhio. O amba nga ha Muvhuso lu fhiraho ḓana musi e vhuḓinḓani. Muvhuso wo vha u wa ndeme vhukuma kha Yesu.—Vhalani Mateo 12:34.
2. Ndi vhathu vhangana vhe vha pfa ndaela yo ṅwalwaho kha Mateo 28:19, 20, nahone ndi ngani ri tshi ralo?
2 Musi Yesu o no vuswa, o ṱangana na tshigwada tsha vhathu vha fhiraho 500 vhe vha vha vha tshi nga vha vhafunziwa. (1 Vhakorinta 15:6) Khamusi zwenezwi zwo itea musi Yesu a tshi vha ṋea ndaela ya u huwelela kha “vhathu vha tshaka dzoṱhe.” Wonoyu mushumo wo vha u tshi ḓo vha u songo leluwa. * (Sedzani ṱhaluso i re magumoni a siaṱari.) O vha vhudza uri mushumo wa u huwelela u ḓo bvela phanḓa lwa tshifhinga tshilapfu, u swika “vhufheloni ha ano maitele a zwithu.” Musi ni tshi huwelela mafhungo maḓifha ṋamusi, ni khou shela mulenzhe kha u ḓadzisa honoho vhuporofita.—Mateo 28:19, 20.
3. Ndi zwifhio zwithu zwiraru zwe zwa ri thusa u huwelela mafhungo maḓifha?
3 Musi Yesu o no vha vhudza ndaela ya u huwelela, o ri: “Ndi na inwi.” (Mateo 28:20) Nga zwenezwo, Yesu o fulufhedzisa vhatevheli vhawe uri u ḓo livhisa mushumo wa u huwelela nahone u ḓo vha thusa uri vha huwelele ḽifhasini ḽoṱhe. Na Yehova u na riṋe. O ri ṋea “zwithu zwoṱhe zwavhuḓi” u itela u ri thusa u huwelela. (Vhaheberu 13:20, 21) Kha ino thero, ri ḓo ṱolisisa zwiraru zwa zwenezwi zwithu zwavhuḓi: (1) zwishumiswa zwe ra ṋewa, (2) maitele e ra a shumisa, na (3) nḓila ye ra gudiswa ngayo. Tsha u thoma, kha ri ṱolisise zwiṅwe zwa zwishumiswa zwe ra zwi shumisa miṅwahani ya ḓana yo fhiraho.
ZWISHUMISWA ZWE ZWA THUSA VHASHUMELI VHA MUDZIMU U HUWELELA
4. Zwishumiswa zwashu zwinzhi zwo fhamba-fhambanaho zwo ri thusa hani kha mushumo washu wa u huwelela?
4 Yesu o vhambedza mulaedza wa Muvhuso na mbeu ine ya zwalwa kha mavu o fhamba-fhambanaho. (Mateo 13:18, 19) Mulimi u shumisa zwishumiswa zwinzhi zwo fhamba-fhambanaho u itela u lugisela mavu. Nga nḓila i fanaho, Khosi yashu yo ri ṋea zwishumiswa zwine ra nga zwi shumisa u itela u thusa vhathu uri vha ṱanganedze mulaedza washu. Zwiṅwe zwishumiswa zwo shumiswa lwa tshifhinganyana ngeno zwiṅwe zwi tshi kha ḓi shumiswa ṋamusi. Fhedzi zwishumiswa zwoṱhe zwo ri thusa u khwinisa vhukoni hashu ha u huwelela.
Garaṱa ya u ṱanziela yo thusa vhathu vhanzhi u thoma u huwelela
5. Garaṱa ya u ṱanziela yo vha i mini, nahone yo shumiswa hani?
5 Nga 1933, vhahuweleli vho thoma u shumisa garaṱa ya u ṱanziela, tshishumiswa tshe tsha thusa vhanzhi u thoma u huwelela. Yo vha i garaṱa ṱhukhu ine ya vha na mulaedza mupfufhi wa Bivhili na wo leluwaho. Nga zwiṅwe zwifhinga, garaṱa ntswa yo vha i tshi gandiswa i na mulaedza muswa. Wahashu Erlenmeyer o vha e na miṅwaha ya fumi musi a tshi shumisa garaṱa ya u ṱanziela lwa u tou thoma. O ri: “Ro vha ri tshi thoma nyambedzano nga heyi nḓila, ‘Ndi khou humbela uri ni vhale ino garaṱa.’ Musi ṋemuḓi o no vhala garaṱa, ro vha ri tshi mu ṋea khandiso nahone ra fhirela kha muṅwe muḓi.”
6. Garaṱa ya u ṱanziela yo vha i tshi thusa nga nḓila-ḓe?
6 Garaṱa ya u ṱanziela yo thusa vhahuweleli nga nḓila dzo fhamba-fhambanaho. Sa tsumbo, vhaṅwe vhahuweleli vho vha vhe na ṱhoni, naho vho vha vha tshi ṱoḓa u huwelela, vho vha vha sa ḓivhi zwine vha nga zwi amba. Vhaṅwe vhahuweleli vho vha vhe na tshivhindi. Vho vha vha tshi vhudza ṋemuḓi zwoṱhe zwine vha zwi ḓivha nga mimunithi i si gathi, fhedzi vho vha vha sa zwi ambi nga vhuṱali. Garaṱa ya u ṱanziela yo thusa vhahuweleli vhoṱhe u huwelela mulaedza u pfalaho na u leluwaho.
7. Dzo vha dzi dzifhio dziṅwe khaedu dza u shumisa garaṱa ya u ṱanziela?
7 Khaedu dzo vha dzi hone. Wahashu Grace Estep o ri: “Nga tshiṅwe tshifhinga ro vha ri tshi vhudziswa uri, ‘I amba nga ha mini? Ndi ngani ni sa tou mmbudza nga hayo?’” Zwiṅwe hafhu, vhaṅwe vhoṋemuḓi vho vha vha sa koni u vhala zwo ṅwalwaho kha garaṱa. Vhaṅwe vho vha vha tshi sokou dzhia garaṱa nahone vha vala muṋango. Vhaṅwe vhathu vho vha vha sa takaleli mulaedza washu, nga zwenezwo, vho kherukanya garaṱa. Hu sa londwi khaedu, garaṱa ya u ṱanziela yo thusa vhahuweleli u huwelela kha vhathu vhoṱhe na u ḓivhiwa sa vhahuweleli vha Muvhuso.
8. Giramafoni i hwaleaho yo shumiswa hani? (Sedzani tshifanyiso tsha u thoma.)
8 Tshiṅwe tshishumiswa tshe tsha shumiswa nga murahu ha 1930 ho vha hu giramafoni i hwaleaho. Dziṅwe Ṱhanzi dzo i vhidza Aroni ngauri ho vha hu tshi amba mutshini nṱhani havho. (Vhalani Ekisodo 4:14-16.) Arali ṋemuḓi a tenda u thetshelesa, muhuweleli o vha a tshi tamba nyambo pfufhi ya Bivhili nahone nga murahu a mu ṋea khandiso. Nga zwiṅwe zwifhinga, miṱa yoṱhe yo vha i tshi kuvhangana u itela u thetshelesa nyambo! Nga 1934, Watch Tower Society yo thoma u ita giramafoni dzo itelwaho u shumiswa vhuḓinḓani. Mafheleloni, vhahashu vho rekhoda nyambo dzo fhamba-fhambanaho dza 92.
9. Giramafoni i hwaleaho yo shumiswa hani nga nḓila i bvelelaho?
9 Musi Hillary Goslin a tshi pfa iṅwe ya nyambo, o hadzima giramafoni vhege yoṱhe uri a kone u thetshelesa mulaedza wa Bivhili na vhaṅwe. Nga zwenezwo, vhathu vhanzhi vho vha na dzangalelo kha ngoho nahone vha lovhedzwa. Mafheleloni, vhananyana vhavhili vha Wahashu Goslin vho ya Tshikoloni Tsha Gilead nahone vha vha vharumiwa. Giramafoni i hwaleaho yo thusa vhahuweleli vhanzhi u thoma u huwelela u fana na garaṱa ya u ṱanziela. Nga murahu, Khosi yo vha i tshi ḓo gudisa vhathu vhayo uri vha vhe vhagudisi vha bvelelaho i tshi shumisa Tshikolo tsha Vhuḓinḓa ha lwa Ṱaḓulu.
U SHUMISA NḒILA DZOṰHE DZINE DZA NGA KONADZEA U ITELA U SWIKELELA VHATHU
10, 11. Gurannḓa na radio zwo shumiswa hani u huwelela mafhungo maḓifha nahone ndi ngani eneo maitele o vha a bvelelaho?
10 Nga fhasi ha vhulivhisi ha Khosi yashu, vhathu vha Mudzimu vho shumisa maitele o fhamba-fhambanaho u itela u swikelela vhathu vhanzhi nga hune vha nga kona ngaho kha mushumo wa u huwelela. Eneo maitele o vha e a ndeme zwihuluhulu ngauri ro vha ri na vhashumi vha si gathi. (Vhalani Mateo 9:37.) Sa tsumbo, miṅwahani minzhi yo fhiraho, gurannḓa dzo shumiswa u itela u huwelela mafhungo maḓifha. Vhege iṅwe na iṅwe, Wahashu Russell o vha a tshi rumela nyambo ya Bivhili kha vhoramafhungo. Nga zwenezwo, vho vha vha tshi rumela nyambo yawe kha gurannḓa dza ngei Canada, Yuropa, na Amerika. Nga 1913, nyambo dza Wahashu Russell dzo gandiswa kha gurannḓa dza 2 000 nahone dzo vhalwa nga vhathu vha ṱoḓaho u vha 15 000 000!
Gurannḓa na radio zwo vha zwi tshi thusa u swikelela vhathu vhanzhi fhethu he ha vha hu na vhahuweleli vha si gathi
11 Radio yo dovha ya shumiswa nga nḓila i bvelelaho u itela u huwelela mafhungo maḓifha. Nga ḽa 16 April, 1922, Wahashu Rutherford o ṋekedza iṅwe ya nyambo dzawe dza u thoma kha radio nahone vhathu vha ṱoḓaho u vha 50 000 vho i thetshelesa. Nga u ṱavhanya, ro thoma u shumisa tshiṱitshi tshashu tsha radio tshine tsha pfi WBBR nahone mbekanyamushumo ya u thoma yo hashwa nga ḽa 24 February, 1924. Watch Tower ya ḽa 1 December, 1924, yo ri: “Ri tenda uri u shumisa radio ndi nḓila i sa ḓuri na i shumaho ya u phaḓaladza mulaedza wa ngoho.” U fana na gurannḓa, radio yo ri thusa u swikelela vhathu vhanzhi fhethu he ha vha hu na vhahuweleli vha si gathi.
Vhahuweleli vhanzhi vha Muvhuso vha takalela u huwelela khagala na u vhudza vhathu nga ha website yashu (Sedzani dziphara 12, 13)
12. (a) Ndi dzifhio nḓila dza u huwelela khagala dzine na dzi takalela vhukuma? (b) Ndi mini zwine zwa nga ri thusa u kunda nyofho dzine ra nga vha ri nadzo dza u huwelela khagala?
12 U huwelela khagala ndi maitele ane a khou shumiswa ṋamusi nga hu bvelelaho u itela u swikelela vhathu. Hu khou itwa vhuḓidini ho engedzeaho u itela u huwelela kha vhathu vhuima bisi, zwiṱitshini zwa zwidimela na hune ha pakiwa dzigoloi, u katela na fhethu ha vhomuthumunzhi na mimakete. Naa u huwelela khagala zwi a ni tshuwisa? Arali zwo ralo, humbelani thuso nga thabelo nahone ni ṱolisise zwe Wahashu Manera, ane a vha mulavhelesi a dalelaho a zwi amba, o ri: “Ro vhona nḓila iṅwe na iṅwe ntswa ya tshumelo yashu sa iṅwe nḓila ya u shumela Yehova, ya u sumbedza u fulufhedzea khae, ya u lingwa ha u fulufhedzea hashu nahone ro vha ro ḓiimisela u mu shumela nga nḓila iṅwe na iṅwe ine a i ṱoḓa.” Musi ri tshi kunda nyofho dzashu nahone ra shumisa maitele maswa a u huwelela, ri khwaṱhisa fulufhelo ḽashu kha Yehova nahone ra vha vhahuweleli vha khwine.—Vhalani 2 Vhakorinta 12:9, 10.
13. Ndi ngani u shumisa website yashu vhuḓinḓani hu maitele a bvelelaho a u huwelela, nahone ndi tshenzhelo dzifhio dzine na vha nadzo nga u i shumisa?
13 Vhahuweleli vhanzhi vha takalela u vhudza vhathu nga ha website yashu ya jw.org., hune vha nga kona u vhala na u kopa khandiso dza Bivhili nga nyambo dzi fhiraho 700. Ḓuvha ḽiṅwe na ḽiṅwe, vhathu vha fhiraho milioni dza 1.6 vha dalela website yashu. Tshifhingani tsho fhiraho, radio yo swikelela vhathu vhanzhi nga mafhungo maḓifha fhethu hu re kule. Website yashu i ita zwi fanaho ṋamusi.
U GUDISA VHAHUWELELI VHA MAFHUNGO MAḒIFHA
14. Vhahuweleli vho vha vha tshi ṱoḓa u gudiswa mini, nahone ndi tshikolo tshifhio tshe tsha vha thusa uri vha vhe vhagudisi vha bvelelaho?
14 Zwishumiswa na maitele e ra haseledza nga hao o shuma nga hu bvelelaho. Naho zwo ralo, vhahuweleli vha tshifhingani tsha kale vho vha vha tshi fanela u gudiswa nḓila ya u huwelela. Sa tsumbo, nga zwiṅwe zwifhinga ṋemuḓi o vha a sa tendelani na zwine a khou zwi pfa kha giramafoni. Nga zwiṅwe zwifhinga, ṋemuḓi o vha e na dzangalelo nahone a tshi ṱoḓa u guda zwo engedzeaho. Vhahuweleli vho vha vha tshi fanela u guda nḓila ya u kunda khaedu nga vhuṱali na u vha vhagudisi vha khwine. A zwi timatimisi uri Wahashu Knorr o thuswa nga muya mukhethwa wa Mudzimu uri a vhone zwi zwa ndeme uri vhahuweleli vha gude nḓila ya u amba vhuḓinḓani. U thoma nga 1943, zwivhidzo zwo thoma u dzudzanya Tshikolo tsha Vhuḓinḓa ha lwa Ṱaḓulu. Tshenetshi tshikolo tsho thusa vhagudisi vhoṱhe uri vha vhe vha bvelelaho.
15. (a) Ndi zwifhio zwe vhaṅwe vha zwi tshenzhela musi vha tshi ṋekedza nyambo kha Tshikolo tsha Vhuḓinḓa ha lwa Ṱaḓulu? (b) Zwe Yehova a zwi fulufhedzisa kha Psalme ya 32:8 zwo sumbedza hani uri ndi zwa vhukuma kha inwi?
15 Vhahashu vhanzhi vho vha vha songo ḓowela u amba phanḓa ha vhathetshelesi. Wahashu Ramu u humbula nyambo yawe ya u thoma nga 1944. Nyambo yo vha i tshi khou amba nga ha mubvumbedzwa wa Bivhili Doege. O ri: “Magona anga na zwanḓa zwo vha zwi tshi khou tetemela nahone ndo vha ndi tshi khou shenganya maṋo.” O dovha a ri: “Ho vha hu lwa u thoma ndi tshi khou ṋekedza nyambo, fhedzi a tho ngo litsha.” Na vhana vha a ṋekedza nyambo tshikoloni naho zwi songo leluwa. Wahashu Manera u humbula zwe zwa itea musi muṅwe muswa a tshi khou ṋekedza nyambo yawe ya u thoma: “O vha o tshuwa vhukuma nahone a thoma u tswimila. Fhedzi ngauri o vha o ḓiimisela u ṋekedza nyambo, o i fhedza yoṱhe a tshi khou tswimila.” Khamusi a ni fhinduli kana u shela mulenzhe miṱanganoni ngauri ni na ṱhoni kana ni vhona u nga ni nga si kone u zwi ita. Arali zwo ralo, humbelani Yehova uri a ni thuse u kunda nyofho dzaṋu. U ḓo ni thusa samusi o thusa vhagudiswa vha u thoma vha Tshikolo tsha Vhuḓinḓa ha lwa Ṱaḓulu.—Vhalani Psalme ya 32:8.
Vhagudiswa vha Gilead vha fhiraho 8 500 vhane vha vha vharumiwa, vho rumelwa mashangoni a 170 u bva nga 1943
16. Ho vha hu tshifhio tshipikwa tsha Tshikolo Tsha Gilead (a) tshifhingani tsho fhiraho na (b) u bva nga 2011?
16 Ndangulo ya Mudzimu yo gudisa vhathu Tshikoloni Tsha Gilead. Tshipikwa tsha tshenetsho tshikolo ndi u thusa vhagudiswa u khwaṱhisa lutamo lwavho lwa u huwelela mafhungo maḓifha. Tshikolo tsha Gilead tsho thoma nga 1943, u bva tsheetsho, tsho no gudisa vhagudiswa vha 8 500 nahone tsha vha rumela mashangoni a 170. U bva nga 2011, vhe vha rambiwa kha tshenetshi tshikolo vho vha vhe vhavulanḓila vho khetheaho, vhalavhelesi vha dalelaho, miraḓo ya Bethele kana vharumiwa vha re tsimuni vha sa athu u yaho Gilead.
17. Tshikolo tsha Gilead tsho vha tshi bvelelaho nga nḓila-ḓe?
17 Naa Tshikolo Tsha Gilead tsho vha tshi bvelelaho? Ee. Ṱhogomelani zwe zwa itea ngei Dzhapani. Nga August 1949, ho vha hu na vhahuweleli vha sa fhiri fumi kha ḽeneḽo shango. Fhedzi nga murahu ha wonoyo ṅwaha, vharumiwa vha 13 vho vha vha tshi khou huwelela na vhahuweleli vha henefho. Ṋamusi hu na vhahuweleli vha ṱoḓaho u vha 216 000 ngei Dzhapani nahone vha ṱoḓaho u vha hafu yavho ndi vhavulanḓila!
18. Ndi zwifhio zwiṅwe zwikolo zwine ra vha nazwo?
18 Ri na zwiṅwe zwikolo zwinzhi zwi ngaho Tshikolo tsha Vhuḓinḓa ha Muvhuso, Tshikolo tsha Tshumelo ya Vhuvulanḓila, Tshikolo tsha Vhahuweleli vha Muvhuso, Tshikolo tsha Vhalavhelesi vha Ḽiisela na Vhafumakadzi Vhavho na Tshikolo tsha Miraḓo ya Komiti ya Davhi na Vhafumakadzi Vhavho. Zwenezwi zwikolo zwo gudisa vhahashu nga hu bvelelaho na u khwaṱhisa lutendo lwavho. Zwi tou vha khagala uri Yesu u bvela phanḓa a tshi gudisa vhathu vhanzhi.
19. Ndi mini zwe Wahashu Russell a zwi amba nga ha mushumo wa u huwelela, nahone zwenezwi zwo ḓadzea hani?
19 Muvhuso wa Mudzimu u khou vhusa lwa miṅwaha i fhiraho ḓana. U bva nga tshenetsho tshifhinga, Yesu Kristo Khosi yashu, u khou livhisa mushumo wa u huwelela. Nga vho-1916, Wahashu Russell o vha a tshi tenda uri mushumo wa u huwelela mafhungo maḓifha u ḓo phaḓalala shangoni ḽoṱhe. O ri: “Mushumo u khou engedzea nga u ṱavhanya nahone u ḓo bvela phanḓa u tshi titima ngauri hu na mushumo wa u huwelela ‘evangeli ya muvhuso’ shangoni ḽoṱhe une wa fanela u itwa.” (Faith on the March, nga A. H. Macmillan, siaṱari 69) Wonoyo mushumo u khou itwa ṋamusi! Ri livhuha Yehova Mudzimu wa mulalo ngauri u ri ṋea zwoṱhe zwine ra zwi ṱoḓa u itela uri ri ite zwine a zwi funa!
^ phar. 2 Zwi vhonala u nga vhunzhi ha tshenetsho tshigwada tsho vha Vhakriste. Ndi ngani ri tshi ralo? Ngauri muapostola Paulo u vha vhidza ‘vhahashu vha maḓana maṱanu.’ O dovha a ri: “Vhunzhi havho vha kha ḓi vha na riṋe, nahone vhaṅwe vho no fa.” Nga zwenezwo, zwi vhonala u nga Paulo na vhaṅwe Vhakriste vho vha vha tshi ḓivha vhunzhi ha vhe vha pfa ndaela ya Yesu ya u huwelela.
