YEHOVA ndi Mudzimu wa mafunda. (Yakobo 1:17) Ri a kona u vhona mafunda awe kha tshiṅwe na tshiṅwe tshe a tshi sika. O ḓadza ḽiṱaḓulu nga ṋaledzi nahone a ḓadza ḽifhasi nga zwimela zwavhuḓi.—Psalme ya 65:12, 13; 147:7, 8; 148:3, 4.

Muṅwali wa Psalme ya 104 o livhuha vhukuma zwithu zwoṱhe zwe Yehova a zwi sika, ngauralo, o ṅwala luimbo lwa u mu renda. Musi ni tshi vhala lwonolo luṅwalo, naa ni a livhuha u fana na mupsalme? O ri: “Kha ndi imbele Yehova ndi kha ḓi tshila; kha ndi rende Mudzimu wanga misi yoṱhe ya vhutshilo hanga.” (Psalme ya 104:33) Naa ni ṱoḓa u ita zwi fanaho?

Yehova u ṱoḓa ri tshi edzisa mafunda awe. Nahone u ri ṋea zwiitisi zwavhuḓi zwa u vha na mafunda. O hevhedza muapostola Paulo uri a ṅwale uri: “Laya vho pfumaho kha ano maitele a zwithu uri vha si ḓikukumuse, uri vha si fulufhele lupfumo lu si na vhungoho, fhedzi vha fulufhele Mudzimu, ane a ri pfumisa nga zwoṱhe zwine ra ḓiphiṋa ngazwo. U vha vhudze uri vha ite zwivhuya, vha pfume kha mishumo yavhuḓi, vha vhe na mafunda, vha ḓiimisele u kovhela vhaṅwe, nga zwenezwo, vha ḓikuvhanganyele lupfumo lune lwa vha mutheo wavhuḓi une vha ḓo fhaṱa khawo vhumatshelo, uri vha farelele vho khwaṱha vhutshilo ha vhukuma.”—1 Timotheo 6:17-19.

Kha vhurifhi ha vhuvhili he Paulo a vhu ṅwalela Vhakorinta, o ṱalutshedza uri zwiṱuṱuwedzi zwashu zwi fanela u vha zwifhio musi ri tshi ṋea vhaṅwe. O ri: “Muṅwe na muṅwe nga a ite zwe a phetha mbiluni yawe, a songo zwi ita o ṱungufhala kana nga u tou kombetshedzea, ngauri Mudzimu u funa ane a ṋea o takala.” (2 Vhakorinta 9:7) Ri vha ri tshi khou thusa nnyi musi ri na mafunda? Paulo o ri ri vha ri tshi khou thusa vhaṅwe nga u vha ṋea zwine vha zwi ṱoḓa, fhedzi ri ḓo vha ri khou thusa na riṋe vhane ngauri Yehova u ḓo ri fhaṱutshedza.—2 Vhakorinta 9:11-14.

Paulo o dovha a ambela kha vhuṱanzi vhuhulwane ha mafunda a Mudzimu musi a tshi ri: “Nga ri livhuhe Mudzimu nge a ri ṋea tshenetshi tshifhiwa tsha fhedzi tshi sa vhambedzwi na tshithu.” (2 Vhakorinta 9:15) “Tshifhiwa tsha fhedzi” tsha Yehova tshi katela zwithu zwoṱhe zwavhuḓi zwine a ri ṋea a tshi shumisa Yesu Kristo. Maipfi a nga si kone u ṱalutshedza nḓila ine tshenetshi tshifhiwa tsha vha tsha ndeme ngayo.

Ri nga sumbedza hani uri ri a livhuha zwoṱhe zwe Yehova na Yesu vha zwi ita na zwine vha kha ḓi ḓo ri itela zwone? Iṅwe nḓila ndi nga u vha na mafunda musi ri tshi ṋea tshifhinga tshashu, nungo na zwithu zwi vhonalaho u itela u gwadamela Yehova nahone ra thusa vhaṅwe u guda nga hae. Ri nga ita zwenezwi hu sa londwi uri ri na zwithu zwinzhi kana zwiṱuku.—1 Koronika 22:14; 29:3-5; Luka 21:1-4.