NGANEAVHUTSHILO
Ndo Vha Na Mulalo Na Mudzimu Na Mme Anga
MME anga vho mmbudzisa uri: “Ndi ngani ni si tsha ḓo gwadamela vhafhasi? Naa a ni zwi ṱhogomeli uri ndi vhone vho zwi itaho uri ni tshile? Naa ni ḓo tou kundelwa na u vha livhuha? Ni nga laṱa hani mikhuvha ye ra ṋewa nga vhomakhulu washu? U hana u hulisa vhafhasi zwi fana na u amba uri vhurabeli hashu ndi ha vhutsilu.” Musi vho no amba zwenezwo, Mme anga vho ṱhukhula tshililo.
Kha miṅwedzi i si gathi yo fhiraho, Ṱhanzi dza Yehova dzo humbela u thoma na mme anga pfunzo ya Bivhili. Vho vha vha sa ṱoḓi u guda, fhedzi ngauri vho vha vha tshi khou ṱoḓa u vha sumbedza vhulenda, vho dzudzanya uri vha gude na nṋe. Fhedzi zwino vho vha vho no ntsinyutshela, zwenezwo zwo vha zwi songo ḓowelea ngauri ndo vha ndi tshi vha thetshelesa tshifhinga tshoṱhe. Naho zwo ralo, ngauri ndo vha ndi tshi ṱoḓa u takadza Yehova, zwo vha zwi sa ḓo konadzea uri ndi vha thetshelese. Zwo vha zwi songo leluwa, fhedzi Yehova o nṋea nungo.
U GUDA NGA HA YEHOVA
Muṱa wa hashu wo vha u Vhabudda, u fana na vhathu vhanzhi vha ngei Dzhapani. Fhedzi nga murahu ha u guda lwa miṅwedzi mivhili na Ṱhanzi dza Yehova, ndo vha ndi na vhungoho ha uri Bivhili ndi ya ngoho. Musi ndi tshi guda uri ndi na Khotsi wa ṱaḓulu, ndo ṱoḓa u guda zwo engedzeaho nga hae. Mathomoni, nṋe na Mme anga ro ḓiphina nga u haseledza nga ha zwe nda vha ndi tshi khou zwi guda. Ndo thoma u ya miṱanganoni ya Swondaha Holoni ya Muvhuso. Musi ndo no guda zwo engedzeaho, ndo vhudza Mme anga uri a thi tsha ḓo shela mulenzhe kha vhuṱambo ha Tshibudda. Nga u ṱavhanya, mavhonele avho a shanduka. Vho ri: “Zwi a shonisa u vha muraḓo wa muṱa a sa funi vhafhasi.” Vho nkombetshedza uri ndi litshe u guda Bivhili na u ya miṱanganoni. Ndo vha ndi songo lavhelela uri mme anga vha nga amba zwenezwi! Vho vha vha tshi nga muṅwe muthu ndi sa mu ḓivhi.
Baba vho tendelana na Mma. Ndo vha ndo guda kha Vhaefesa ndima ya 6 uri Yehova u ṱoḓa ndi tshi thetshelesa vhabebi vhanga. Ndo vha ndi tshi ṱoḓa uri muṱa wa hashu u dovhe u vhe na mulalo nahone ndo vha ndi tshi humbula uri arali nda nga vha thetshelesa, mafheleloni vha ḓo nthetshelesa-vho. Nga tshenetsho tshifhinga, ndo vha ndi tshi fanela u lugiselela u ṅwala mulingo, nga zwenezwo, ndo tenda u ita zwoṱhe zwe vhabebi vhanga vha amba lwa miṅwedzi miraru. Fhedzi ndo fulufhedzisa Yehova uri ndi ḓo dovha nda ya miṱanganoni musi tshenetsho tshifhinga tshi tshi fhira.
Phetho yanga yo vha i si yavhuḓi nga ṅwambo wa zwiitisi zwivhili. Tsha u thoma, ndo vha ndi tshi vhona u nga nga murahu ha miṅwedzi miraru ndi ḓo vha ndi tshi kha ḓi vha na lutamo luhulwane lwa u
shumela Yehova. Nṱhani hazwo, vhushaka hanga nae ho thoma u thenga-thenga nga u ṱavhanya. Tsha vhuvhili, Mma na Baba vho lingedza nga nungo dzoṱhe uri ndi litshe u shumela Yehova.THUSO NA U HANEDZWA
Ndo ṱangana na Ṱhanzi nnzhi Holoni ya Muvhuso dze dza vha dzi tshi hanedzwa nga miṱa yadzo. Vho nkhwaṱhisedza uri Yehova u ḓo nṋea nungo. (Mateo 10:34-37) Vho nṱalutshedza uri arali nda bvela phanḓa ndi tshi fulufhedzea kha Yehova, muṱa wa hashu u nga guda nga hae. Ndo vha ndi tshi ṱoḓa u ḓitika nga Yehova, nga zwenezwo, nda thoma u rabela vhukuma.
Muṱa wa hashu wo mpikisa nga nḓila nnzhi. Mme anga vho nkhumbela uri ndi litshe u guda nahone vha lingedza u ntsumbedza zwiitisi. Zwifhinga zwinzhi ndo vha ndi tshi sokou ḓifhumulela. Musi ndi tshi lingedza u amba, ro vha ri tshi anzela u pikisana ngauri roṱhe ro vha ri tshi khou lingedza u sumbedza uri ri khou amba ngoho. Zwino ndi ṱhogomela uri ngavhe ndi vhe ndo ṱhonifha nḓila ine Mme anga vha ḓipfa ngayo na lutendo lwavho, ho vha hu tshi ḓo vha na mulalo hayani. Vhabebi vhanga vho nṋea mishumo yo engedzeaho u itela uri ndi ṱwe ndi hayani. Nga zwiṅwe zwifhinga, vho vha vha tshi mvalela nnḓa kana vha si nṋee zwiḽiwa.
Mme anga vho humbela vhaṅwe vhathu uri vha nṱuṱuwedze u litsha u guda. Vho amba na mudededzi wanga, fhedzi zwa tou sea zwi tshi ṱanama. Mme anga vho ṱuwa na nṋe kha mutholi wavho uri a nṱuṱuwedze u tenda uri vhurabeli hoṱhe a vhu na mushumo. Vho dovha vha founela na mashaka ashu nahone vha humbela thuso vha tshi khou lila. Zwenezwo zwo ntsinyusa vhukuma. Fhedzi musi ndi miṱanganoni, vhahulwane vho nkhumbudza uri musi mme anga vha tshi amba na vhaṅwe nga ha vhuimo hashu, vha vha vha tshi khou ṱanziela.
Vhabebi vhanga vho vha vha tshi ṱoḓa uri ndi ye yunivesithi u itela uri ndi kone u wana mushumo wavhuḓi. Roṱhe ro vha ro sinyuwa vhukuma nahone ri sa koni u amba nga ha enea mafhungo ro dzika, nga zwenezwo, ndo vha ṅwalela marifhi a si gathi u itela u vha ṱalutshedza nga ha zwipikwa zwanga. Baba vho sinyuwa vhukuma nahone vha ri: “Arali ni tshi vhona u nga ni ḓo wana mushumo, u waneni matshelo kana ni ṱuwe fhano muḓini.” Ndo rabela Yehova nahone nda humbela uri a nthuse. Nga ḓuvha ḽi tevhelaho musi ndi vhuḓinḓani, vhahashu vha tshisadzini vhavhili vho nṋea mushumo wa u gudisa vhana vhavho. Zwenezwi a zwo ngo takadza Baba, vho litsha u amba na nṋe nahone vha nthwisa nga muya. Mme anga vho amba uri zwo vha zwi tshi nga vha khwine u vha tshigevhenga u fhirisa u vha Ṱhanzi ya Yehova.
Yehova o nthusa uri ndi khakhulule mahumbulele anga na u ḓivha zwine nda fanela u zwi ita
Nga zwiṅwe zwifhinga, ndo vha ndi si na vhungoho ha uri Yehova u ṱoḓa ndi tshi hanedza vhabebi vhanga nga u rali. Nga zwenezwo, ndo rabela Yehova nahone nda elekanya nga ha zwine Bivhili ya amba nga ha lufuno lwawe. Zwenezwi zwo nthusa uri ndi vhe na mavhonele avhuḓi nahone ndo pfesesa uri vhabebi vhanga vha khou mpikisa ngauri vha khou vhilaela nga ha nṋe. Yehova o nthusa u khakhulula mahumbulele anga na u ḓivha zwine nda fanela u zwi ita. Zwiṅwe hafhu, musi ndi tshi ya vhuḓinḓani tshifhinga tshoṱhe, zwenezwo zwo ita uri ndi vhu takalele nga ho engedzeaho. Vhukuma, ndo vha ndi tshi ṱoḓa u vha muvulanḓila.
U SHUMA SA MUVULANḒILA
Musi vhaṅwe vhahashu vha tshisadzini vha tshi pfa uri ndi khou ṱoḓa u vha muvulanḓila, vho mmbudza uri ndi thome ndi lindele vhabebi vhanga vha tshi dzika. Ndo humbela vhuṱali nga thabelo, nda ita ṱhoḓisiso, nda humbula nga ha zwiitisi zwa u ṱoḓa u vha muvulanḓila nahone nda amba na vhahashu vha re na tshenzhelo. Ndo dzhia phetho ya uri ndi ṱoḓa u takadza Yehova. Ndo dovha nda pfesesa uri naho nda lindela tshifhinganyana musi ndi sa athu u vula nḓila, vhabebi vhanga vha nga kha ḓi bvela phanḓa vha tshi mpikisa.
Ndo thoma u vula nḓila nga ṅwaha wanga wa u fhedza tshikoloni tsha murole wa nṱha. Musi ndo no vula nḓila lwa tshifhinganyana, ndo vha ndi tshi ṱoḓa u ya fhethu hune ha vha na ṱhoḓea khulwane. Fhedzi Mma na Baba vho vha vha sa ṱoḓi ndi tshi ṱuwa hayani. Nga zwenezwo, ndo lindela u swika ndi tshi fara miṅwaha ya 20. Nda humbela ofisi ya davhi uri ndi iswe fhethu hune ha vha na mashaka anga ngei tshipembe ha Dzhapani u itela uri Mme anga vha si vhilaele vhukuma.
Musi ndi kha wonoyo mushumo, ndo takalela u vhona vhagudiswa vhanga vha Bivhili vha si gathi vha tshi lovhedzwa. Ndo thoma u guda Luisimane ngauri ndo vha ndi tshi ṱoḓa u ita zwo engedzeaho vhuḓinḓani hanga. Nga zwenezwo, musi ndi tshi vhona u fhisea ha vhavulanḓila vhavhili vho khetheaho vha tshivhidzoni tshanga na nḓila ye vha vha vha tshi khou thusa ngayo vhaṅwe, ndo dzhia phetho ya u ṱoḓa u vha muvulanḓila o khetheaho. Nga tshenetsho tshifhinga, Mme anga vho lwala lu shushaho luvhili lwoṱhe nahone nda humela hayani u vha thusa nga zwenezwo zwifhinga. Zwenezwi zwo vha mangadza nahone vha thoma u ntsumbedza vhuthu.
PHAṰHUTSHEDZO NNZHI DZI BVAHO HA YEHOVA
Nga murahu ha miṅwaha ya sumbe, wahashu wa tshinnani ane a vha muvulanḓila o khetheaho ane a pfi Atsushi, we nda amba nga hae mathomoni, o nthumela vhurifhi. O vha e na dzangalelo ḽa u vhinga nahone a mmbudzisa uri ndi ḓipfa hani nga hae. Ndo vha ndi si na maḓipfele a lufuno kha Atsushi nahone ndo vha ndi sa ḓivhi uri u ḓipfa nga yeneyo nḓila nga ha nṋe. Nga murahu ha ṅwedzi, ndo mu fhindula nda mu vhudza uri ndi nga takalela u mu ḓivha khwine. Ro ṱhogomela uri ri na zwipikwa zwi fanaho. Ro vha ri tshi ṱoḓa u bvela phanḓa ri tshumeloni ya tshifhinga tsho ḓalaho nahone ro vha ro ḓiimisela u ṱanganedza mushumo naho u ufhio. Mafheleloni, ro vhingana. Ndo takala vhukuma musi Mma, Baba na maṅwe mashaka vha tshi ḓa munyanyani washu.
Nepal
Nga u ṱavhanya, musi ri tshi khou shuma sa vhavulanḓila, Atsushi o vhewa sa mulavhelesi wa ḽiisela a thusaho. Nga murahu, ro ṋewa mushumo wa vhuvulanḓila ho khetheaho nahone ra ita mushumo wa ḽiisela. Musi ri tshi tou fhedza u dalela zwivhidzo zwoṱhe lwa u tou thoma zwi re kha ḽiisela ḽashu, ofisi ya davhi yo ri rwela luṱingo. Vho ri vhudzisa arali ri tshi nga kona u pfulutshela ngei Nepal nahone ra bvela phanḓa na mushumo wa ḽiisela henengei.
U shuma mashangoni manzhi, zwo ngudisa zwinzhi nga ha Yehova
Ndo vha ndi tshi khou vhilaedziswa ngauri vhabebi vhanga vha ḓo ḓipfa hani nga u pfulutshela hanga kule-kule. Musi ndi tshi vha rwela luṱingo, Baba vho fhindula ngauri, “Ni khou ya fhethu havhuḓi.” Iṅwe khonani ya Khotsi anga yo vha ṋea bugu i ambaho nga ha Nepal nahone vho vha vha tshi khou humbula uri hu nga vha fhethu havhuḓi ha u dala.
Ro takalela u vha vhukati ha vhathu vha re na lufuno vha ngei Nepal. Nga murahu, ho katelwa na shango ḽa Bangladesh kha ḽiisela ḽashu. Naho ḽo vha ḽi tsini na Nepal, ho vha hu fhethu hu sa fani. Ro vha na tsimu yo fhamba-fhambanaho. Nga murahu ha miṅwaha miṱanu, ro dovha ra rumelwa Dzhapani, hune ra khou ḓiphina nga mushumo wa ḽiisela.
Ndo guda zwithu zwinzhi nga ha Yehova musi ndi tshi khou shuma ngei Dzhapani, Nepal na Bangladesh. Vhathu vha eneo mashango vha na mvelele na mikhuvha zwo fhamba-fhambanaho. Nahone vhathu vhoṱhe a vha fani. Ndo no vhona nḓila ine Yehova a ṱhogomela ngayo muthu muṅwe na muṅwe, u vha ṱanganedza, u vha thusa na u vha fhaṱutshedza.
Ndi na zwithu zwinzhi zwine nda nga livhuha ngazwo Yehova. O ntendela ndi tshi mu ḓivha na u ita mushumo wawe nahone o nṋea munna wa Mukriste. Mudzimu o nthusa u dzhia phetho dzavhuḓi nahone zwino ndi na vhushaka havhuḓi nae na muṱa wa hashu. Ndi livhuha Yehova ngauri nṋe na Mme anga ro dovha ra vha madelemapfani. Ndi livhuha vhukuma uri ndo vha na mulalo na Mudzimu na Mme anga.
Ro wana dakalo ḽihulu kha mushumo wa ḽiisela