Thabelo

1 Ndi Ngani Ri Tshi Fanela U Rabela?

THABELO. Bivhili i na thero dzi si gathi dzine dza nga ita uri ri vhe na dzangalelo ḽa u ṱoḓa u ḓivha. Ṱhogomelani mbudziso dza sumbe dzo ḓoweleaho dzine dza vhudziswa nga ha thabelo; nga murahu ni ṱolisise phindulo dzine ra dzi wana Bivhilini. Hedzi thero dzo itelwa u ni thusa uri ni rabele—ni thome u rabela kana ni rabele nga nḓila i bvelelaho.

SHANGONI ḽoṱhe, kha mvelele dzoṱhe na vhurereli hoṱhe, vhathu vha a rabela. Vha rabela musi vhe vhoṱhe na musi vhe zwigwada. Vha rabela dzikerekeni, dzithembeleni na huṅwe fhethu-vho. Vha nga gwadama kha thovho musi vha tshi rabela, vha shumisa malungu a dzi-rosary, zwifanyiso, bugu dza thabelo, kana thabelo dzo ṅwalwaho kha garaṱa dzine vha vha vho dzi ṋembeledza kha mbondo.

Thabelo ndi iṅwe nḓila ine ya ita uri vhathu vha sa fane na zwiṅwe zwithu zwoṱhe zwi tshilaho kha ḽifhasi. I ngoho, hu na zwithu zwinzhi zwine ra fana ngazwo na zwipuka. U fana na zwipuka, ri ṱoḓa zwiḽiwa, muya na maḓi uri ri tshile. U fana na zwipuka ri a bebiwa, ra tshila nahone ra fa. (Muhuweleli 3:19) Naho zwo ralo, ndi vhathu fhedzi vhane vha rabela. Ndi ngani?

Phindulo i leluwaho ndi ya uri vhathu vha fanela u rabela. Thabelo kanzhi i vhonala sa yone nḓila ine vhathu vha nga kona ngayo u amba na muthu ane vha mu gwadamela, kana zwithu zwine vha zwi dzhia zwi zwikhethwa, kana zwi zwa ndeme khavho. Bivhili i sumbedza uri ro sikwa ri na lutamo lwa zwithu zwo raloho. (Muhuweleli 3:11) Yesu Kristo o vhuya a amba uri: “Mashudu, vhaheḓana muyani.”—Mateo 5:3.

Zwi a pfala uri u vha “vhaheḓana muyani” ndi zwone zwine zwa ita uri ri vhe na lwonolo lutamo lwa u fhedza awara nnzhi ri tshi khou rabela. Vhukuma, vhaṅwe vhathu vha ḓitika nga vhone vhaṋe u itela u fusha ṱhoḓea dzavho dza muya. Naa a ni zwi vhoni uri vhathu a vha koni u ri thusa? Ri vhathu vha re na vhushayanungo, vhane vha tshila tshifhinga tshiṱuku na vha sa koni u ḓivha zwithu hu tshee nga phanḓa. Muthu ane a vha na vhuṱali, maanḓa mahulwane na ane a konḓelela u ri fhira, ndi ene fhedzi ane a nga kona u ri ṋea zwine ra zwi ṱoḓa. Nahone ndi dzifhio dzenedzi ṱhoḓea dza muya dzine dza ita uri ri rabele?

Ṱhogomelani: Naa no no vhuya na pfa ni tshi khou ṱoḓa vhulivhisi, vhuṱali kana phindulo dza mbudziso dzine dza vhonala uri muthu a nga si kone u dzi ḓivha? Naa no no vhuya na ḓipfa ni tshi khou ṱoḓa u khuthadzwa musi ni tshi khou pfa vhuṱungu musi no felwa, ni tshi khou ṱoḓa vhulivhisi ha u ita phetho khulwane, kana ni tshi khou ṱoḓa u hangwelwa na musi ni tshi khou ḓipfa ni na mulandu?

U ya nga Bivhili, zwenezwo ndi zwiitisi zwi pfalaho zwa u rabela. Bivhili ndi bugu ine na nga i fulufhela malugana na thabelo, i na mafhungo manzhi a thabelo dza vhanna na vhafumakadzi vha fulufhedzeaho. Vho rabela u itela u khuthadzwa, u ṋewa vhulivhisi, u hangwelwa na u wana phindulo dza mbudziso dzi konḓaho.—Psalme ya 23:3; 71:21; Daniele 9:4, 5, 19; Habakuku 1:3.

Naho dzenedzo thabelo dzo fhambana hu na zwine dza fana ngazwo. Muṅwe na muṅwe wa vhenevho vhathu vhe vha rabela o vha a tshi ḓivha tshithu tsha ndeme tshe tsha ita uri a rabele nga nḓila i bvelelaho, zwithu zwine kanzhi zwi sa dzhielwe nṱha ṋamusi shangoni. Vho vha vha tshi ḓivha uri ndi nnyi ane vha fanela u mu rabela.