Zwine Ra Zwi Guda Kha Yesu

Nḓila Ine Zwivhumbiwa Zwa Muya Zwa Ri Kwama Ngayo

Yesu o vha a tshi dzula na Khotsi awe fhethu ha muya “shango ḽí sathu u vha hone.” (Yohane 17:5) Nga zwenezwo, ndi ene ane a fanelea vhukuma u fhindula mbudziso dzi tevhelaho.

Naa vharuṅwa vha na dzangalelo kha riṋe?

▪ Kha Yesu ri guda uri vharuṅwa vha na dzangalelo ḽihulwane kha vhathu. O ri: “Kha vharuṅwa vha Mudzimu hu ḓo vha na dakalo sa zwenezwo, ḽa u takalela mu-ita-zwivhi o rembuluwaho.”—Luka 15:10.

Yesu o sumbedza uri vharuṅwa vho ṋewa vhuḓifhinduleli ha u thusa vhashumeli vha Mudzimu uri vha vhe na vhushaka ho khwaṱhaho nae. Nga zwenezwo, musi Yesu a tshi tsivhudza vhafunziwa vhawe uri vha songo khukhulisa vhaṅwe, o ri: “Ni vhone ni sa ḓo nyadza muṅwe wa avha vhaṱuku; ngauri nṋe ndi ri: Vharuṅwa vhavho ngei ṱaḓulu vha dzula vha tshi vhona tshifhaṱuwo tsha khotsi-anga wa ṱaḓulu.” (Mateo 18:10) Musi a tshi amba zwenezwo Yesu o vha a sa khou amba uri muṅwe na muṅwe u na muruṅwa wawe ane a mu tsireledza na u mu livhisa. Fhedzi Yesu o sumbedza uri vharuṅwa vhane vha shuma tsini-tsini na Mudzimu vha na dzangalelo kha miraḓo ya tshivhidzo tsha Vhukriste.

 Diabolo a nga ri huvhadza hani?

▪ Yesu o tsivhudza vhatevheli vhawe uri Sathane u lingedza u thivhela vhathu uri vha si gude mafhungo-ngoho nga ha Mudzimu. Yesu o ri: “Muthu a pfaho fhungo ḽa muvhuso wa ṱaḓulu, a si ḽi ṱalukanye, Muvhi u a ḓa a mu thubela zwo zwaliwaho mbiluni yawe.”—Mateo 13:19.

Yesu o amba nga ha iṅwe nḓila ine Sathane a xedza ngayo vhathu musi a tshi amba nga ha tshifanyiso tsha muthu ane a zwala mbeu tsimuni yawe. Muthu onoyo a re kha tshenetsho tshifanyiso o vha a tshi imela Yesu, nahone mavhele o vha a tshi imela Vhakriste vha ngoho vhane vha ḓo vhusa na Yesu ṱaḓulu. Naho zwo ralo, Yesu o amba uri swina ḽo ḓa ḽa “zwalela mufhunga vhukati ha mavhele.” Mufhunga wo vha u tshi imela Vhakriste vha mazwifhi. “Swina ḽo u zwalaho ndi Diabolo.” (Mateo 13:25, 39) Samusi mufhunga u tshi nga fana na mutomba, vhane vha ḓiamba uri ndi Vhakriste vha nga kha ḓi vhonala u nga ndi vhagwadameli vha ngoho. Vhurereli vhune ha funza mazwifhi vhu fhura vhathu uri vha si thetshelese Mudzimu. Sathane u shumisa vhurereli ha mazwifhi u itela u fhura vhathu uri vha si vhe khonani dza Yehova.

Ri nga ḓitsireledza hani kha Sathane uri a si ri huvhadze?

▪ Yesu o vhidza Sathane uri ndi “muvhusi wa shango ḽino.” (Yohane 14:30) Yesu o ri sumbedza nḓila ine ra nga ḓitsireledza ngayo kha Sathane musi a tshi rabela Mudzimu. Yesu o rabelela vhafunziwa vhawe kha Khotsi awe wa ṱaḓulu a ri: “Vha pilele uri vha si dzhene vhuvhini. Vhone a si vha shango ḽino, vhunga na nṋe ndí si wa shango ḽino. Vha ite vhakhethwa nga mafhungo-ngoho au; mafhungo au ndi a ngoho.” (Yohane 17:15-17) U ḓivha Ipfi ḽa Mudzimu zwi nga ri tsireledza kha u fhurwa nga shango ḽine ḽa vhuswa nga Sathane.

Vharuṅwa vha ri kwama hani misini yashu?

▪ Yesu o ri: “Ndi zwine zwa ḓo itwa nga ḓuvha ḽa vhufhelo ha shango. Vharuṅwa vha ḓo bva vha nanga vhavhi kha vho lugaho.” (Mateo 13:49) Zwino ri khou tshila maḓuvhani a “vhufhelo ha ḽifhasi,” nahone vhathu vha dzimilioni vha khou ṱanganedza mafhungo maḓifha a Muvhuso wa Mudzimu.—Mateo 24:3, 14.

Fhedzi a si vhathu vhoṱhe vhane Mudzimu a vha ṱanganedza nge vha thoma u guda Ipfi ḽawe. Vharuṅwa ndi vhone vhane vha livhisa mushumo wa vhashumeli vha Yehova, nahone vhathu vhane vha funa Mudzimu zwi tshi bva mbiluni vha khou khethekanyiwa kha vhane vha sa ṱoḓe u shumisa zwine vha khou zwi guda. Musi a tshi ṱalusa vhane vha ḓo ṱanganedzwa nga Mudzimu Yesu o ri: “Ndi havho, vhané vhó pfa mafhungo, vha a londola mbiluni yo nakaho yavhuḓi, vha konḓelela vha vhuya vha aṋwa mitshelo.”—Luka 8:15.

U itela u wana mafhungo o engedzeaho, sedzani ndima 10 kha bugu Bivhili I Funza Mini Zwa Vhukuma? yo gandiswaho nga Ṱhanzi dza Yehova.

[Tshifanyiso kha siaṱari 16]

Vharuṅwa vha a thusa u kuvhanganya vhathu vha re na mbilu dzavhuḓi uri vha dzhene tshivhidzoni tsha Vhukriste