Sendelani Tsini Na Mudzimu

Khuthadzo Kha Vha Mbilu Dzo Vunḓekanaho

‘YEHOVA a nga si vhuye a mpfuna.’ Eneo maipfi o ambiwa nga muṅwe mufumakadzi wa Mukriste we a vha o tsikeledzea vhukuma vhutshiloni hawe. O vha o ḓivhudza uri Yehova a nga si vhuye a sendela tsini nae. Naa ndi zwa vhukuma uri Yehova u kule na vhagwadameli vhawe vho tsikeledzeaho? Phindulo i khuthadzaho i wanala kha maipfi o hevhedzwaho a mupsalme Davida, samusi o ṅwalwa kha Psalme ya 34:18.

Davida o vha a tshi zwi ḓivha uri u tsikeledzea nga maanḓa zwi nga bveledza mini kha mugwadameli wa Yehova a fulufhedzeaho. Musi a tshee muswa, Davida o vhuya a vha tshavhi, a tshi khou tovholwa nga Saulo, khosi i re na vivho ye ya vha yo ḓiimisela u mu vhulaha. Davida o ṱoḓa tsireledzo fhethu he a vha tshi humbula uri Saulo a nga si mu ṱoḓele hone—ngei muḓini wa maswina avho wa Gathi, dzinguni ḽa Filisita. Fhedzi musi Saulo o no mu wana, Davida o ponyoka nga u ḓiita mupengo. Davida o renda Mudzimu nge a mu tshidza, nahone nga nṱhani ha zwe a zwi tshenzhela o mbo ḓi ṅwala Psalme ya 34.

Naa Davida o vha a tshi tenda uri Mudzimu u kule na vhane nga nṱhani ha u tsikeledzea vha ḓipfa vhe si tshithu khae? Davida o ṅwala u ri: “Yehova u sendela ha vha dzimbilu dzo vunḓekanaho, u tshidza vha mimuya yo huvhalaho.” (Ndimana 18) Kha ri ṱhogomele nḓila ine enea maipfi a nga ri ṋea ngayo khuthadzo na fulufhelo.

“Yehova u sendela” tsini. Iṅwe ndaedzi i amba uri eneo maipfi “ndi nḓila ine Murena a sumbedza ngayo uri u a ri ṱhogomela na u ri londa, u dzula o ḓiimisela u thusa na u tsireledza vhathu vhawe.” Zwi a ri khwaṱhisa u ḓivha uri Yehova u dzula o lavhelesa vhathu vhawe. U a vhona thaidzo dzavho na zwine vha zwi tshenzhela kha zwino “zwifhinga zwi lemelaho,” nahone u a ḓivha maḓipfele avho.—2 Timotheo 3:1; Mishumo 17:27.

“Vha dzimbilu dzo vunḓekanaho.” Kha dziṅwe mvelele, u vha na “mbilu dzo vunḓekanaho,” zwi nga ambela kha u funa muthu ane a sa u fune. Fhedzi muṅwe muḓivhi o amba uri maipfi a mupsalme a ambela nga “maanḓa kha u ṱungufhala na zwililo.” I ngoho, na vhashumeli vha Mudzimu vha fulufhedzeaho nga zwiṅwe zwifhinga vha nga sedzana na zwithu zwi konḓaho zwine zwa nga vunḓekanya mbilu dzavho kana u vha tsikeledza.

“Vha mimuya yo huvhalaho.” Vhathu vho tsikeledzeaho vha nga ḓipfa vhe si tshithu lune vha nga pfa vhe si na fulufhelo tshoṱhe lwa tshifhinganyana. Iṅwe bugu ya vhaṱalutshedzeli vha Bivhili i amba uri wonoyo mubulo u nga ṱalutshedzelwa nga uri “vhathu vha si na zwithu zwavhuḓi zwine vha nga zwi lavhelela.”

Naho zwo ralo, Yehova u dzhia hani vhathu vha “dzimbilu dzo vunḓekanaho” na vha “mimuya yo huvhalaho”? Naa u sendela kule navho, nahone a pfa u nga a vha ṱoḓi ṱhogomelo yawe na lufuno? A zwo ngo ralo na luthihi. Yehova u fana na mubebi wa lufuno ane a khuthadza ṅwana o tsikeledzeaho, nahone u tsini na vhagwadameli vhawe vhane vha mu lilela vha tshi ṱoḓa thuso. O ḓiimisela u vha khuthadza na u fhembeledza mbilu dzavho dzo vunḓekanaho na mimuya yavho yo huvhalaho. A nga vha ṋea vhuṱali na maanḓa zwine zwa ṱoḓea u itela uri vha kone u sedzana na milingo naho i ifhio.—2 Vha-Korinta 4:7; Yakobo 1:5.

Ndi ngani ni sa ṱoḓisisi uri ni nga sendela hani tsini na Yehova? Onoyu Mudzimu ane a pfela vhuṱungu u fulufhedzisa uri: ‘Ndi dzula na vho vhaisalaho, vha mimuya yo pwanyeledzwaho; uri ndi hanyise mimuya ya vho pwanyeledzwaho, ndi hanyise dzimbilu dza vha vhaisalaho.’—Yesaya 57:15.