Mbudziso Dza Vhavhali Vhashu . . .

Naa Vhakriste Vhoṱhe Vha Fulufhedzeaho Vha Ya Ṱaḓulu?

▪ Vhathu vhanzhi vho no vhuya vha vhala maipfi a Yesu a khuthadzaho ane a ri: “Mudzimu o funa shango zwingafha-ngafha, a vhuya a ṋekedza Murwa wawe mu-bebwa-eṱhe, uri vhoṱhe vha mu tendaho, vha si lovhe, tshavho hu vhe u tshila tshoṱhe.” (Yohane 3:16) Naa Yesu o vha a tshi khou amba uri vhagwadameli vha fulufhedzea vhoṱhe vha Khotsi awe, Yehova Mudzimu, vha ḓo ya ṱaḓulu u itela uri u vha ḓiphine nga vhutshilo vhu sa fheli na dakalo ḽa vhukuma?

Ṱhogomelani maipfi a Yesu ane a ita uri muthu a humbule nga ho dzikaho: “A huna o gonyaho ṱaḓulu, arali e si o tsaho a tshi bva ṱaḓulu; ndi amba Murwa-muthu a re ṱaḓulu.” (Yohane 3:13) Hezwi zwi amba uri vhagwadameli vhawe vha fulufhedzeaho vha tshifhingani tsho fhiraho, vha ngaho sa Noaxe, Abrahamu, Mushe, na Davida, a vho ngo ya ṱaḓulu. (Mishumo 2:34) Nga zwenezwo, vhathu vhenevho vhoṱhe vho ya ngafhi? Nga u tou pfufhifhadza: Vhashumeli vha Mudzimu vha fulufhedzeaho vha tshifhingani tsho fhiraho vha mavhiḓani, vho fa, a vha ḓivhi tshithu, nahone vho lindela u vusiwa.—Muhuweleli 9:5, 6; Mishumo 24:15.

Yesu ndi ene muthu wa u thoma Bivhilini we a amba uri vhaṅwe vha ḓo tshila ṱaḓulu musi vho no fa. O vhudza vhaapostola vhawe uri o vha a tshi ḓo vha lugisela vhudzulo ngei ṱaḓulu. (Yohane 14:2, 3) Zwenezwi zwo vha zwi zwiswa kha vhathu vha Mudzimu. Nga murahu, muapostola Paulo o ṱalutshedza uri musi Yesu o no fa nahone a dovha a vuselwa ṱaḓulu, o ‘vulela vhafunziwa vhawe nḓila ntswa i tshidzaho’—ye ha vha hu sa athu vha na muthu we a vhuya a i wana.—Vha-Heberu 10:19, 20.

Naa zwenezwi zwi amba uri u bva nga tshenetsho tshifhinga muṅwe na muṅwe ane a fulufhedzea o vha a tshi ḓo ya ṱaḓulu? Hai, zwo vha zwi songo ralo ngauri vhane vha vuselwa ṱaḓulu vha vuselwa u ya u ita muṅwe mushumo une wa ṋewa vhaṅwe vhathu vha si gathi. Vhusikuni havho ha u fhedza e navho, Yesu o vhudza vhaapostola vhawe uri vha ḓo ‘dzula kha dzikhuluṋoni uri vha vhuse’ Muvhusoni wawe wa ṱaḓulu. Nga zwenezwo, u vhusa ṱaḓulu na Yesu ndi wone mushumo wavho.—Luka 22:28-30.

Nga nnḓa ha vhaapostola, hu na vhaṅwe vhathu vhe vha ṋewa wonoyo mushumo u mangadzaho. Muapostola Yohane o vhona kha bono Yesu e na tshigwada tsha vho vuswaho vhe ṱaḓulu nahone a vha ṱalusa sa ‘mahosi na vho-tshifhé vhane vha ḓo vhusa fhano shangoni.’ (Ndzumbululo 3:21; 5:10) Vho vha vhe vhangana? U fana na zwine zwa itea kha muvhuso muṅwe na muṅwe, hu na vhathu vho linganyiselwaho fhedzi vhane vha vhusa. Zwo tou ralo na kha wonoyu Muvhuso wa ṱaḓulu. Yesu, Ngwana ya Mudzimu, u ḓo vhusa na vhavhusi ngae vha 144 000 “vho rengululwaho kha vhathu.”—Ndzumbululo 14:1, 4, 5.

Vhukuma, 144 000 ndi tshivhalo tshiṱuku musi tshi tshi vhambedzwa na vhathu vhoṱhe vha fulufhedzeaho, vha tshifhingani tsho fhiraho na vha zwino. Fhedzi zwenezwi zwi a pfala ngauri vha 144 000 vha ḓo vuselwa ṱaḓulu u itela mushumo wo tou livhaho mukhethwa. Arali no vha ni tshi khou ṱoḓa u fhaṱa nnḓu, naa no vha ni tshi ḓo thola vhashumi vhoṱhe vha re na vhutsila vha hune na dzula hone? Hai. No vha ni tshi ḓo thola vho linganelaho vhane vha ṱoḓea u itela mushumo wonoyo. Nga hu fanaho, a si vhashumeli vhoṱhe vha fulufhedzeaho vhe vha khethwa nga Mudzimu u itela ndugelo yo khetheaho ya u vhusa na Kristo ṱaḓulu.

Wonoyo muvhuso u ḓo ḓadzisa ndivho ya Mudzimu ya u thoma nga vhathu. Yesu na vhavhusi ngae vha 144 000 vha ḓo livhisa mushumo wa u vusulusa ḽifhasi ḽoṱhe u itela uri ḽe vhe paradiso, ine vhathu vhanzhi-vhanzhi vha fulufhedzeaho vha ḓo dzula khayo nga dakalo u ya nga hu sa fheli. (Yesaya 45:18; Ndzumbululo 21:3, 4) Kha vhenevha hu ḓo katelwa na vhathu vha re muhumbuloni wa Mudzimu, vhane vha ḓo vuswa.—Yohane 5:28, 29.

Vhagwadameli vhoṱhe vha Yehova vha fulufhedzeaho—vha tshifhingani tsho fhiraho kana vha musalauno—vha ḓo wana tshifhiwa tshi mangadzaho tsha vhutshilo vhu sa fheli. (Vha-Roma 6:23) Vha si gathi vha ḓo wana vhutshilo ngei ṱaḓulu uri vha yo ita mushumo wo khetheaho, nahone tshivhalo tshihulwane tsha vhathu ndi tsha vhane vha ḓo wana vhutshilo vhu sa fheli kha ḽifhasi ḽa paradiso ya fhethu hoṱhe.