Vhuporofita 5. U Tshinyadza Shango

“[Mudzimu u ḓo] tshinyadza vha tshinyadzaho shango.”—NDZUMBULULO 11:18.

● Vho-Pirri vha ngei Kpor, Nigeria vha shuma u kuvhanganya maṱari a mutshevho vha ita ngao veine. Nga mulandu wa u shuluwa ha ole nnzhi-nnzhi ngei Niger Delta, bindu ḽavho ḽo thithisea vhukuma. Vho ri: “Ole yeneyi i vhulaha khovhe dzashu, i vhaisa lukanda lwashu, na u tshinyadza maḓi ashu. A thi tsha kona u shuma nda ita tshelede ya u ḓitshidza.”

MBUNO DZI SUMBEDZA MINI? U ya nga vhaṅwe vhaḓivhi, hu laṱelwa tshika i ḓadzaho mafagi a fhiraho milioni dza 6,5 lwanzheni ṅwaha muṅwe na muṅwe. Hu anganyelwa uri mapulasitiki a vhumba phesenthe dza 50 dza yeneyo tshika nahone a nga fhedza miṅwaha ya maḓana a sa athu sina. Nga nnḓa ha u tshikafhadza ḽifhasi, vhathu vha khou dovha vha tshinyadza na mupo nga nḓila i shushaho. Ṱhoḓisiso dzi sumbedza uri hu ḓo ṱoḓea ṅwaha na miṅwedzi miṱanu u itela uri ḽifhasi ḽi dovhe ḽi bveledze zwine vhathu vha zwi shumisa nga ṅwaha muthihi. Gurannda ya ngei Australia ine ya pfi Sydney Morning Herald yo vhiga uri: “Arali vhathu vha bvela phanḓa vha tshi khou anda na u shumisa zwithu nga nḓila ine vha khou zwi shumisa ngayo zwino, musi hu tshi swika ṅwaha wa 2035, hu ḓo vha hu tshi vho ṱoḓea ḽifhasi ḽa vhuvhili.”

VHATHU VHA ANZELA U RI MINI? Vhathu vho ṱalifha nahone vha nga kona u wana zwipiringululi zwa vhuleme honovhu. Ri nga kona u vusulusa ḽifhasi, ra fhelisa dzenedzi thaidzo nahone ra ita uri shango ḽi songo tsha tshinyiwa.

NAA ZWENEZWO NDI NGOHO? Vhathu vhanzhi na zwigwada zwine zwa shuma nga maanḓa vho ita uri vhaṅwe vha vhe na nḓivho nga ha mafhungo a zwa mupo. Fhedzi ḽifhasi ḽi ḓi dzula ḽi tshi khou tshikafhadzwa nga nḓila i akhamadzaho.

NI HUMBULA MINI? Naa hu na ṱhoḓea ya u ri Mudzimu a dzhenelele nahone a tshidze ḽifhasi ḽashu uri ḽi sa tshinyadzwe—samusi o fulufhedzisa uri u ḓo ita nga u ralo?

U engedza kha vhuporofita vhuṱanu he ra vhu haseledza, Bivhili yo dzula yo amba nga ha zwithu zwavhuḓi zwine zwa ḓo itea maḓuvhani a vhufhelo. Kha ri haseledze nga ha tsumbo nthihi ine ya wanala kha vhuporofita ha vhurathi.

[Maipfi o ṱumbulwaho kha siaṱari 8]

“Ndi pfa u nga ndo dzhielwa tshipiḓa tsha paradiso tshe nda vha ndi natsho nahone nda ṋewa tshipiḓa tsho ḓalaho mathukhwi a re na mulimo.”—ERIN TAMBER, A RESIDENT OF THE GULF COAST, UNITED STATES, CONCERNING THE EFFECTS OF THE 2010 OIL SPILL IN THE GULF OF MEXICO.

[Bogisi kha siaṱari 8]

Naa Mudzimu Ndi Ene Ane A Tea U Vhonwa Mulandu?

Samusi Bivhili yo dzula yo amba nga ha zwithu zwivhi zwine ra zwi vhona zwi tshi khou itea ṋamusi, naa zwenezwo zwi amba uri Mudzimu ndi ene ane a ita uri zwi vhe hone? Naa ndi ene ane a ita uri ri shengele? Ni nga wana phindulo dzi fushaho kha ndima 11 ya bugu Bivhili I Funza Mini Zwa Vhukuma? yo gandiswaho nga Ṱhanzi dza Yehova.

[Ṱhaluso ya Vhubvo ha Tshifanyiso kha siaṱari 8]

U.S. Coast Guard photo