Vhuporofita 6. Mushumo Wa U Huwelela Shangoni Ḽoṱhe
Vhuporofita 6. Mushumo Wa U Huwelela Shangoni Ḽoṱhe
“Mafhungo-maḓifha aya a muvhuso wa ṱaḓulu a ḓo ḓivhadzwa mashangoni oṱhe.”—MATEO 24:14.
● Vaiatea u dzula fhethu ha mahayani tshiṱangadzimeni tsha Pacific ngei Tuamotu Archipelago. Naho Tuamotu hu na zwiṱangadzime zwiṱuku zwi ṱoḓaho u vha 80 zwo phaḓalalaho khilomithara dzi fhiraho 802 900, hu na vhadzulapo vha ṱoḓaho u vha 16 000. Naho zwo ralo, Ṱhanzi dza Yehova dzo dalela Vaiatea na vhaṅwe vhadzulapo vha henefho. Ndi ngani? Ndi nga uri Ṱhanzi dzo vha dzi tshi ṱoḓa u ḓivhadza mafhungo maḓifha a Muvhuso wa Mudzimu kha vhathu vhoṱhe—hu sa londwi hune vha dzula hone.
MBUNO DZI SUMBEDZA MINI? Mulaedza wa Muvhuso u khou ḓivhadzwa u mona na shango ḽoṱhe. Nga ṅwaha wa 2010 fhedzi, Ṱhanzi dza Yehova vho fhedza awara dza bilioni dza 1,6 vha tshi khou ḓivhadza enea mafhungo maḓifha, mashangoni a 236. Zwenezwi zwi amba uri nga ḓuvha Ṱhanzi iṅwe na iṅwe yo fhedza mimunithi i ṱoḓaho u vha 30 i tshi khou huwelela. Miṅwahani ya fumi yo fhiraho, vho bveledza na u phaḓaladza khandiso dza u gudisa nga ha Bivhili dzi fhiraho bilioni dza 20.
VHATHU VHA ANZELA U RI MINI? Ho no fhela miṅwaha ya zwigidi hu tshi khou huwelelwa mulaedza wa Bivhili.
NAA ZWENEZWO NDI NGOHO? Ndi ngoho uri hu na vhathu vhanzhi vho no huwelelaho zwiṅwe nga ha mulaedza wa Bivhili. Naho zwo ralo, vhunzhi havho vho huwelela lwa tshifhinganyana kha tshipiḓa tshiṱuku tsha ḽifhasi. U fhambana na zwenezwo, Ṱhanzi dza Yehova vha khou huwelela mafhungo maḓifha shangoni ḽoṱhe kha vhathu vha dzimilioni dza maḓana nga nḓila yo dzudzanyeaho vhukuma. Ṱhanzi dzo futelela vhukuma kha u ita wonoyu mushumo wa u huwelela hu sa londwi uri dzo pikiswa nga madzangano a re na maanḓa na a re na tshiṱuhu kha ḓivhazwakale yoṱhe ya vhathu. * (Marko 13:13) Zwiṅwe hafhu, Ṱhanzi dza Yehova a dzi holelwi kha mushumo wadzo wa u huwelela. Nṱhani hazwo, vha ṋekedza tshifhinga tshavho nga u ḓifunela nahone vha ṋea vhathu khandiso dzavho mahala. Mushumo wavho woṱhe u tikedzwa nga miṋeelo ya u ḓifunela.
NI HUMBULA MINI? Naa “mafhungo-maḓifha aya a muvhuso” a khou huwelelwa shangoni ḽoṱhe? Naa u ḓadzea ha honoho vhuporofita zwi amba uri hu na zwithu zwavhuḓi zwine zwa ḓo itea hu si kale?
[Ṱhaluso i re magumoni a siaṱari]
^ phar. 6 U itela u wana mafhungo o engedzeaho, sedzani vidio tharu dzine dza pfi, “Faithful Under Trials,” “Purple Triangles,” na “Jehovah’s Witnesses Stand Firm Against Nazi Assault” dzo phaḓaladzwaho nga Ṱhanzi dza Yehova.
[Maipfi o ṱumbulwaho kha siaṱari 9]
“Ri ḓo bvela phanḓa ri tshi huwelela mafhungo maḓifha a Muvhuso nga u fhisea, ri tshi shumisa zwibuli zwoṱhe u itela u swikelela vhathu vhoṱhe u swikela musi Yehova a tshi ri zwo fhela.”—2010 YEARBOOK OF JEHOVAH’S WITNESSES.
