Munna A Pfanaho Na Mbilu Ya Yehova

TAMBANI

Munna A Pfanaho Na Mbilu Ya Yehova

NDI mini zwine zwa ḓa muhumbuloni waṋu musi hu tshi ambiwa nga munna wa Bivhilini ane a pfi Davida? Naa ni humbula nga ha u kunda hawe Mufilisita wa muswonḓa Goliata? Mafhungo a u shavhela sogani musi Khosi Saulo a tshi mu tovhola? Tshivhi tshawe na Batseba na thaidzo dze a vha nadzo nga nṱhani ha zwenezwo? Kana khamusi vhurendi hawe vhu re buguni ya Bivhili ya Dzipsalme?

Vhutshiloni hawe Davida o vha e na ndugelo nnzhi, magundo na makhaulambilu. Naho zwo ralo, zwithu zwine zwa ri kunga nga hae u fhira zwoṱhe ndi zwe muporofita Samuele a zwi amba musi a tshi ri u ḓo vha “munna a pfanaho na mbilu ya Yehova.”—1 Samuele 13:14.

Vhuporofita ha Samuele ho ḓadzea musi Davida a tshee muswa. Naa ni nga si takalele u ṱaluswa sa muthu ane a pfana na mbilu ya Yehova? Ndi mini zwe zwa itea vhutshiloni ha Davida zwihuluhulu musi a tshi kha ḓi vha muswa zwine zwa nga ni thusa uri ni vhe muthu o raloho? Kha ri vhone.

Muṱa Na Mushumo Wawe

Isai muḓuhulu wa Ruthe na Boasi, ane a vha khotsi a Davida a nga kha ḓi vha o vha e muthu wa lutendo. Musi Davida, vhakomana vhawe vha sumbe na khaladzi dzawe mbili vha tshee vhaṱuku, Isai o vha funza nga ha Mulayo wa Mushe. Kha dziṅwe psalme dzawe, Davida o ḓivhidza “ṅwana wa mulanda” wa Yehova. (Psalme ya 86:16) Zwenezwo zwo ita uri vhaṅwe vha ambe uri mme a Davida, vha songo bulwaho nga dzina Bivhilini, na vhone vho vha na ṱhuṱhuwedzo khulwane kha vhumuya hawe. Muṅwe mugudi o ri: “Zwi vhonala u nga ndi mme awe vhe vha thoma u mu vhudza mafhungo a mangadzaho a nḓila ye Mudzimu a shumisana ngayo na vhathu vhawe tshifhingani tsho fhiraho” u katela na mafhungo a Ruthe na Boasi.

Musi ri tshi thoma u pfa nga ha Davida o vha a tshi kha ḓi vha mutukana muṱuku wa mulisa a re na vhuḓifhinduleli ha u ṱhogomela nngu dza khotsi awe. Wonoyu mushumo u nga vha wo vha u tshi katela u fhedza tshifhinga ḓakani e eṱhe vhusiku na masiari. Edzani u humbula nga ha tshenetsho tshiitea.

Muṱa wa ha Davida wo vha u tshi dzula Betlehema, muḓini muṱuku u re mabamani a zwikwara zwa Yuda. Zwikwara zwo monaho na muḓi wa Betlehema zwo vha zwi tshi bveledza goroi. Tsimu dza mitshelo, miṱwari na miṱokola dzo vha dzo adza na zwikwara zwi re govhani. Misini ya Davida, fhethu he ha vha hu sa limiwi vhukati ha dzithavha ho vha hu tshi shumiselwa pfulo. Nga seli ho vha hu na soga ḽa Yuda.

Mushumo wa Davida wo vha u na khombo. Ndi henefha zwikwarani he a kunda ndau na tshivhingwi musi zwi tshi lingedza u zhondongedza nngu dzawe. * Onoyo muswa a re na tshivhindi o lwa na zwenezwo zwivhanda nahone a zwi vhulaha u itela u tsireledza nngu dzawe. (1 Samuele 17:34-36) Khamusi ho vha hu nga tshenetsho tshifhinga he Davida a guda u vha na vhutsila ha u shumisa gatho. Tsini na muḓihaya wa hawe ho vha hu na muḓi wa Benyamini. Vhagobi vha lwonolwo lushaka vho vha vha tshi kona u posa tombo nga gatho “vha goba, vha si ise thungo.” Davida o vha a tshi kona u posa gatho he a ḽi livhisa hone.—Vhahaṱuli 20:14-16; 1 Samuele 17:49.

Tshifhinga Tsho Shumiswaho Zwavhuḓi

Tshifhinga tshinzhi u lisa zwo vha zwi tshi ita uri muthu a vhe na tshifhinga tsha u awela e eṱhe. Fhedzi Davida ho ngo tendela uri zwenezwo zwi ite uri a vhe na vhuludu. Zwo fhambanaho na zwenezwo, u vha hawe e eṱhe zwo ita uri a kone u elekanya. Zwi vhonala u nga zwiṅwe zwe Davida a zwi ṅwala kha dzipsalme ndi zwe a zwi elekanya musi a tshee muswa. Naa ndi nga tshenetsho tshifhinga he a elekanya nga vhuimo vhune muthu a vha naho fhethu hoṱhe na zwithu zwi mangadzaho zwa ṱaḓulu—ḓuvha, ṅwedzi na dziṋaledzi, “mishumo ya minwe ya [Yehova]”? Naa o elekanya nga ha ḽifhasi, kholomo, phulu, zwiṋoni na “dziphukha dza ḓaka,” musi e ḓakani ḽo monaho na muḓi wa Betlehema?—Psalme ya 8:3-9; 19:1-6.

A zwi timatimisi uri zwe Davida a ṱangana nazwo musi a tshee mulisa zwo ita uri a vhone nga ho dzikaho vhulenda vhune Yehova a vha naho kha vhathu Vhawe vha fulufhedzeaho. Ndi ngazwo Davida o imba uri: “Yehova ndi mulisa wanga, a thi nga shayi tshithu. U ndadza mafuloni avhuḓi, u nyisa maḓini a vhuawelo. Naho ndi tshi tshimbila govhani ḽa dunzi ḽa lufu, a thi ofhi vhuvhi, ngauri U na nṋe; thonga yau na mbaḓa yau ndi zwone zwi mphumudzaho.”—Psalme ya 23:1, 2, 4.

Ni nga kha ḓi ḓivhudzisa uri zwenezwi zwi ni kwama hani. Phindulo ndi uri tshiṅwe tshe tsha ita uri Davida a takalele vhushaka ha tsini na Yehova na uri a vhidzwe “munna a pfanaho na mbilu ya Yehova” ndi uri o vha a tshi elekanya nga ho dzikaho na u ḓiimisela mushumoni wa Yehova na kha vhushaka hawe na Mudzimu. Naa hu nga ambiwa zwi fanaho na nga inwi?

Naa no no vhuya na ṱuṱuwedzwa u hulisa na u renda Musiki musi no no ṱhogomela nga vhuronwane zwiṅwe zwithu zwe a zwi sika? Naa no no vhuya na ḓipfa ni tshi khou funa Yehova musi ni tshi vhona pfaneleo dzawe na musi ni tshi vhona nḓila ye a shumisana ngayo na vhathu? U itela uri ni kone u livhuha Yehova ni fanela u ḓiṋea tshifhinga tsha u rabela, u elekanya nga Ipfi ḽa Mudzimu na tsiko yawe. U elekanya ho raloho zwi nga ni thusa uri ni vhe na vhushaka ha tsini na Yehova—na uri ni mu fune. Vhahulwane na vhaṱuku vha nga vha na yeneyi ndugelo. Zwi vhonala u nga Davida o vha e na vhushaka ha tsini na Yehova u bva hanani hawe. Ri zwi ḓivhisa hani?

U Ḓodzwa Ha Davida

Musi Khosi Saulo a si tsha fanelea u ranga phanḓa vhathu vha Mudzimu, Yehova o vhudza muporofita Samuele uri: “U ḓo fhedza lini u lilela Saulo? Nṋe ndo mu laṱa. Ha tsha ḓo vha khosi ya Isiraele. Fara tshiḓolo nga luṋanga lwau U tshimbile; ndi U ruma ha Isai wa Betlehema, ngauri ndo ḓi-nangela khosi kha vhana vhawe.”—1 Samuele 16:1.

Musi muporofita wa Mudzimu a tshi swika Betlehema, o laedza uri Isai a ḓe na vharwa vhawe. Ndi ufhio we Samuele a vha a tshi ḓo mu ḓodza uri a vhe khosi? Musi a tshi vhona mukomana wavho Eliaba wa ndele, Samuele o mbo ḓi humbula uri: ‘Ene ngoyu.’ Fhedzi Yehova o vhudza Samuele a ri: “U songo vhona vhudele na vhulapfu ha onoyo we nda mu laṱa; ngauri uyo ane vhathu vha mu lavhelesa a si ene. Muthu tshawe ndi u vhona zwi re phanḓa ha maṱo awe; Yehova Ene u vhona zwi re mbiluni.” Nga nḓila i fanaho, Yehova o landula Abinadaba, Sama, na vharathu vhavho vhaṋa. Mafhungo a a bvela phanḓa: “Samuele a mbo vhudzisa Isai a ri: Ndi vhoṱhe vhana vhau vha vhatuka? Isai a ri: Ho sala murathu wavho; u khou lisa zwifuwo.”—1 Samuele 16:7, 10.

Musi Isai a tshi fhindula u vhonala u nga u khou ri: ‘Davida a nga vha e si ene ane na khou mu ṱoḓa.’ Samusi o vha e lupedzi nahone e si muthu wa tshithu muṱani, Davida o vha o ṋewa mushumo wa u lisa nngu. Fhedzi o vha e ene o nangwaho nga Mudzimu. Yehova u vhona zwi re mbiluni nahone zwi tou vha khagala uri o vhona zwiṅwe zwithu zwavhuḓi kha onoyu muswa. Nga zwenezwo, musi Isai a tshi humbela uri Davida a vhidzwe, Yehova o vhudza Samuele uri: “Takuwa U mu ḓodze; ndi onoyo. Samuele a fara luṋanga lwa tshiḓolo a mu ḓodza é vhukati ha vhakomana vhawe. Nga ḽeneḽo ḓuvha muya wa Yehova wo ḓa kha Davida wa dzula khae’.”—1 Samuele 16:12, 13.

A zwo ngo ambiwa uri Davida o vha e na miṅwaha mingana musi zwenezwi zwi tshi itea. Naho zwo ralo, nga murahu ha tshifhinga, vhakomana vhawe vhararu Eliaba, Abinadaba na Sama vho vha vhe mmbini ya Saulo. Khamusi vhaṅwe vhakomana vhawe vhaṱanu vho vha vha tshee vhaṱuku lune vha si kone u ṱuwa navho. Zwi nga kha ḓi itea uri vho vha vha sa athu fara miṅwaha ya 20, samusi ho vha hu tshi ṱoḓea uri vha vhe na yeneyo miṅwaha u itela u vha mmbini ya Isiraele. (Numeri 1:3; 1 Samuele 17:13) Davida o vha a tshi kha ḓi vha muṱuku musi Yehova a tshi mu nanga. Naho zwo ralo, zwi vhonala u nga Davida o vha e na vhushaka ha tsini-tsini na Yehova he a vhu vhumba nga u elekanya nga zwithu zwe a vha a tshi zwi ḓivha nga ha Mudzimu.

Ṋamusi vhaswa vha fanela u ṱuṱuwedzwa u ita zwi fanaho. Ngauralo vhabebi, naa ni khou ṱuṱuwedza vhana vha vhoiwe u elekanya nga zwithu zwa muya, u dzhiela nṱha tsiko ya Mudzimu na u guda zwine Bivhili ya zwi amba nga ha Musiki? (Doiteronomio 6:4-9) Na vhoiwe vhaswa, naa ni khou ita zwenezwi nga vhoiwe vhaṋe? Khandiso dza Bivhili dzi ngaho magazini dza Tshiingamo na Awake! * dzo itelwa u ni thusa.

Vhutsila Ha U Lidza Mbila

Samusi vhunzhi ha maipfi a re kha psalme dza Davida a tshi amba zwithu zwinzhi nga ha musi e mulisa, na nyimbo dzawe dzi amba zwi fanaho. Ndi ngoho uri muzika wa dzenedzo nyimbo khethwa a u tsheeho ṋamusi. Naho zwo ralo, zwine ra zwi ḓivha ndi uri muṅwali wadzo o vha e ṋambi. Zwi re zwone ndi uri zwe zwa ita uri Davida a vhidzwe musi e malisoni u itela uri a ḓe ha Khosi Saulo, ndi nga nṱhani ha uri o vha e na vhutsila ha u lidza mbila.—1 Samuele 16:18-23. *

Davida o guda ngafhi u lidza mbila nahone lini? Zwi nga kha ḓi itea uri o zwi guda musi e malisoni. Zwi a pfala u tenda uri naho Davida o vha a tshee muṱuku nga u ralo, o vha a tshi vho imbela Mudzimu thendo dzi bvaho mbiluni. Zwi re zwone ndi uri Yehova o mu nanga uri a ite mushumo wawe nga nṱhani ha u ḓiṋekedzela hawe na vhushaka hawe nae.

Davida o bvela phanḓa e na vhushaka havhuḓi na Yehova na musi o no aluwa. Fhedzi vhumuthu hawe hoṱhe vhu vhonala maipfini ane zwa nga kha ḓi itea uri a tshimbidzana na zwithu zwe a vha a tshi zwi elekanya musi a tshee muswa maḓakani Betlehema. Edzani u humbula musi Davida a tshi khou imbela Yehova uri: “Ndi elekanya zwa maḓuvha a kale, ndi elelwa mishumo yau yoṱhe, ndi ḓi-eledza zwe zwanḓa zwau zwa ita.” (Psalme ya 143:5) Yeneyi psalme na dziṅwe psalme dza Davida dzi ṱuṱuwedza vhoṱhe vhane vha ṱoḓa u pfana na mbilu ya Yehova.

[Ṱhaluso dzi re magumoni a siaṱari]

^ phar. 9 Zwivhingwi zwa Siria zwe zwa vha zwi tshi wanala Palestina kale, zwo vha zwi tshi lemela khilogireme dza 140 nahone zwo vha zwi tshi nga vhulaha muthu kana tshifuwo nga maṋala azwo. Ho vhuya ha vha na ndau nnzhi henefho fhethu. Yesaya 31:4 i amba uri na “vhalisa” vha nga si kone u pandamedza “ndawana” musi yo fara phukha.

^ phar. 20 Dzo gandiswaho nga Ṱhanzi dza Yehova.

^ phar. 22 Mukoma we a themendela Davida o dovha a amba uri o vha e muthu “wa u thanyela mafhungo; munna wa zwivhuya ane Yehova a vha nae’.”—1 Samuele 16:18.

TSHIINGAMO