Ndi Mini Zwine Vhana Vha Fanela U Zwi Guda?

“Maṅwalo oṱhe, ma-hevhedzwa-nga-Mudzimu, na hone a a lamulela, kha u funza na kha thovhedzo na kha u vhuyedzedza nḓilani na kha u laya kulugele.”—2 TIMOTHEO 3:16.

VHANA vha fanela u funzwa ngoho nga ha Mudzimu. Vha nga guda ngafhi yeneyo ngoho? Kha bugu ya vhurabeli i ṱhonifhiwaho nga vhathu shangoni ḽoṱhe, Bivhili.

Bivhili i fana na vhurifhi vhu bvaho ha Mudzimu. Kha honoho vhurifhi, Mudzimu u ri dzumbululela pfaneleo dzawe nahone u ṋea vhana vhawe vhoṱhe, vhaṱuku na vhahulwane vhulivhisi ha vhuḓifari havhuḓi. Ṱhogomelani dziṅwe pfunzo dzine dza wanala Bivhilini na zwine ra nga zwi guda zwine na vhana vhaṱuku vha nga zwi guda.

Ndi mini zwine Mudzimu a ṱoḓa ri tshi zwi ḓivha nga hae?

▪ Zwine Bivhili ya zwi funza: “Dzina ḽau ḽi pfi Yehova, Wa-Ṱaḓulu-ṱaḓulu. Mashangoni oṱhe ndi Iwe u woṱhe.”—Psalme ya 83:18.

Ngudo: Mudzimu ha sokou vha maanḓa zwao, fhedzi ndi Muthu wa vhukuma ane a vha na dzina.

▪ Zwine Bivhili ya zwi funza: “Ngauri Yehova u lavhelesa mbilu dzoṱhe, u ḓivha na zwiphiri zwine muthu a elekanya. U tshi mu ṱoḓa, u ḓo u dzumbuluwela.”—1 Koronika 28:9.

Ngudo: Yehova Mudzimu u a ri funa roṱhe u katela na vhana vhaṱuku. (Psalme ya 10:14; 146:9) U ṱoḓa ri tshi guda nga hae.

▪ Zwine Bivhili ya zwi funza: ‘Ni songo ṱungufhadza tsiwana. Arali na vhuya na vha ṱungufhadza, vha lila vha ndilela, ngangoho ndi ḓo pfa zwililo zwavho.’—Ekisodo 22:21, 22.

Ngudo: Yehova u a thetshelesa na thabelo dza vhana vhaṱuku. Ri nga amba na Mudzimu tshifhinga tshoṱhe na u mu vhudza zwi re muhumbuloni washu na maḓipfele ashu.

▪ Zwine Bivhili ya zwi funza: “Vha ḓi dovha vha linga Mudzimu, vha ṱungufhadza Mukhethwa wa Isiraele.”—Psalme ya 78:41.

Ngudo: Zwine ra zwi amba na zwiito zwashu zwi kwama nḓila ine Yehova a ḓipfa ngayo, nga zwenezwo ri fanela u humbula musi ri sa athu amba kana u ita tshithu.

 Ri fanela u fara hani vhathu vha sa fani na riṋe?

▪ Zwine Bivhili ya zwi funza: “Mudzimu ha ṱaluli muthu. Atsina kha tshakha dzoṱhe, ané a mu ofha a ita zwo lugaho, u a mu funa.”—Mishumo 10:34, 35.

Ngudo: Arali Mudzimu a tshi ṱanganedza vhathu vha vhubvo ho fhamba-fhambanaho, a ro ngo fanela u ṱalula vhaṅwe vhathu nga nṱhani ha muvhala wavho kana uri vho fhambana na riṋe.

▪ Zwine Bivhili ya zwi funza: “Ni ḓi dzula nó ḓi-lugisa, uri ni ḓo kona u fhindula na ufhio a ni sengisaho fulufhelo ḽaṋu ḽa ngomu haṋu.”—1 Petro 3:15.

Ngudo: Musi ri tshi haseledza nga ha vhurereli, ri fanela u amba mavhonele ashu ro khwaṱhisa, fhedzi nga vhulenda. Ri fanela u ṱhonifha vhathu vha vhurereli ho fhambanaho na hashu.

Ri fanela u fara hani miraḓo yashu ya muṱa?

▪ Zwine Bivhili ya zwi funza: “Vhana thetshelesani vhabebi kha zwoṱhe, ngauri ndi zwone zwi takadzaho Murenani.”—Vha-Kolosa 3:20.

Ngudo: Vhana vhane vha thetshelesa vhabebi a vha funi vhabebi vhavho fhedzi, fhedzi vha ṱoḓa u takadza na Mudzimu.

▪ Zwine Bivhili ya zwi funza: “Ni nge no takulanaho, ni khathutshelane arali muṅwe e na tshiné a sola muṅwe. Vhunga Kristo ó ni khathutshela, na inwi ni ralo.”—Vha-Kolosa 3:13.

Ngudo: Vhaṅwe vhathu, u katela na miraḓo ya miṱa yashu nga zwiṅwe zwifhinga vha nga ri kula nungo. Fhedzi arali ri tshi ṱoḓa uri Mudzimu a ri hangwele, ri fanela u guda u hangwela vhaṅwe.—Mateo 6:14, 15.

 Ndi ngani ri tshi fanela u fulufhedzea na u vha na vhulenda?

▪ Zwine Bivhili ya zwi funza: “Bvulani vhuzwifhi, ni dzule ni tshi amba mafhungo-ngoho, noṱhe nga muthihi ni tshi amba na wa haṋu, ngauri muṅwe ndi muraḓo wa muṅwe.”—Vha-Efesa 4:25.

Ngudo: Musi ri tshi amba ngoho, ri vha ri tshi khou edzisa Mudzimu nahone ri ita uri a takale. Arali ra ḓowela u amba mazwifhi, ri vha ri tshi khou edzisela swina ḽa Mudzimu Diabolo, ane a vha “khotsi ya vhadzia-u-zwifha.”—Yohane 8:44; Tito 1:2.

▪ Zwine Bivhili ya zwi funza: “Zwoṱhe zwiné na funa vhathu vha tshi ni ita, na inwi ni vha ite zwenezwo.”—Mateo 7:12.

Ngudo: Ri fanela u dzhiela nṱha maḓipfele, mihumbulo, na ṱhoḓea dza miraḓo ya miṱa yashu na vhaṅwe vhathu. Musi ri tshi ‘pfelana vhuṱungu,’ kanzhi vhaṅwe vhathu vha nga kona u ri fara zwavhuḓi.—1 Petro 3:8; Luka 6:38.

Samusi tsumbo dza tshifhingani tsho fhiraho dzi tshi zwi sumbedza, zwine ra zwi guda Bivhilini zwi nga thusa vhana uri vha kone u livhuha, u ṱhonifha, na u pfela vhathu vhahulwane vhuṱungu. Fhedzi ndi nnyi ane a fanela u gudisa vhana zwenezwi?