Magazini une na khou u vhala zwino wo thoma u gandiswa nga July 1879. Zwifhinga zwo no shanduka u bva tshee wa thoma u gandiswa—na yeneyi khandiso yo shanduka. (Sedzani zwinepe zwi re afho nṱha.) U thoma nga yeneyi khandiso, ni ḓo ṱhogomela uri hu na tshanduko dzo engedzeaho kha Tshiingamo. Ndi mini zwine zwa ḓo shanduka?

Mashangoni manzhi, vhathu vhanzhi vha wana mafhungo kha Inthanethe, nahone vha a zwi takalela u ita nga u ralo. Zwi a vha lelutshela u wana, kana u vhala mafhungo kha Inthanethe. Bugu nnzhi, dzimagazini, na dzigurannḓa dzi a wanala kha Inthanethe.

Samusi vhathu vhanzhi vha tshi takalela u vhala mafhungo kha Inthanethe, ro dzudzanya Web site ya www.pr418.com u itela uri i kunge, na uri mafhungo a re khayo a vhalee nga hu leluwaho. Vhane vha dalela Web site yeneyi vha nga vhala khandiso nnzhi dzine dza wanala nga nyambo dzi fhiraho 430. U thoma nga uno ṅwedzi, vhane vha dalela Web site yeneyi, vha ḓo vhala dziṅwe thero dze dza vha dzi tshi wanala kha magazini dzashu, fhedzi zwino dzi vho wanala kha yeneyi Web site. *

Samusi ri tshi ḓo vha na thero nnzhi dzine dza nga wanala kha Inthanethe, magazini wa Tshiingamo une wa tshimbidzwa tsimuni a u tsha ḓo vha na masiaṱari a 32, fhedzi u ḓo vha na a 16, u thoma nga yeneyi khandiso. Zwa zwino Tshiingamo tshi gandiswa nga nyambo dza 204. Samusi tsho no pfufhifhadzwa, zwi ḓo konadzea uri Tshiingamo tshi ṱalutshedzelwe na nga dziṅwe nyambo dzo engedzeaho.

Ri fulufhela uri dzenedzi tshanduko dzi ḓo ri thusa u swikelela vhathu vho engedzeaho nga mulaedza wa Bivhili u tshidzaho. Ro ḓiimisela u bvela phanḓa ri tshi ni ṋea mafhungo a vhuyedzaho, a takadzaho—kha magazini wa Tshiingamo na kha Inthanethe—u itela u vhuyedza vhathu vhanzhi vhane vha ṱhonifha Bivhili na vhane vha ṱoḓa u ḓivha zwine ya zwi funza zwa vhukuma.

Vhagandisi