ABELE o lavhelesa sambi ḽawe ḽa nngu dze dza vha dzi tshi khou fula tshikwarani. Khamusi o mbo ḓi dovha a lavhelesa kulenyana he a vha a sa khou tou vhona zwavhuḓi. O vha a tshi zwi ḓivha uri he a lavhelesa hone, hu na banga ḽa khavho ya mulilo ḽi no penyisa phanḓa na murahu ḽine ḽa khou mona ḽi sa imi, ḽo thivhaho nḓila ya u dzhena tsimuni ya Edeni. Vhabebi vhawe vho vhuya vha dzula henefho, fhedzi vhone, u katela na vhana vhavho vho vha vha si tsha kona u dzhena hone zwino. Vhonani nga iṱo ḽa muhumbulo, ndi nga mathabama, hu na muya u rotholelaho zwavhuḓi une wa khou vhudzula mavhudzi a Abele, nahone u lavhelesa makoleni, a humbula nga ha Musiki wawe. Naa tshivhi tshe tsha fhambanya vhathu na Mudzimu tshi ḓo vhuya tsha fhela? Abele o vha tshi ṱoḓa uri zwi vhe nga u ralo.

Abele u kha ḓi amba na inwi ṋamusi. Naa ni khou mu pfa? Ni nga kha ḓi amba uri zwithu zwo raloho a zwi konadzei, ngauri onoyo murwa wa vhuvhili wa Adamu o fa miṅwahani minzhi yo fhiraho. Muvhili wawe wo sina kale miṅwahani i fhiraho maḓana a 60. Bivhili i funza uri: “Vho faho a vha na tshine vha tshi ḓivha.” (Muhuweleli 9:5, 10) Zwiṅwe hafhu, a hu na fhungo na ḽithihi ḽi re Bivhilini ḽe ḽa ṅwalwa nga Abele. Nga zwenezwo, u kha ḓi amba na riṋe nga nḓila-ḓe?

Muapostola Paulo o hevhedzwa u ṅwala zwi tevhelaho nga ha Abele. O ri: “Naho o fa, nga lutendo lwawe u kha ḓi amba.” (Vha-Heberu 11:4) U kha ḓi amba na riṋe nga nḓila-ḓe? Nga lutendo. Abele ndi muthu wa u thoma we a ṱahulela yeneyo pfaneleo yavhuḓi vhukuma. O vhea tsumbo yavhuḓi ya lutendo ine na riṋe ra nga i edzisa ṋamusi. Arali ra guda nga ha lutendo lwawe, ra lwela u mu edzisa, zwi ḓo nga ri khou pfa Abele a tshi khou amba na riṋe.

Naho zwo ralo, ri guda mini kha Abele na lutendo lwawe, ngeno hu songo ambiwa zwinzhi nga hae Bivhilini? Kha ri vhone.

Abele o bebwa hu sa athu vha na vhathu vhanzhi shangoni. Nga murahu, Yesu o amba uri Abele o tshila tshifhingani tsha “u bva tshee shango ḽa sikwa.” (Luka 11:50, 51) Zwi tou vha khagala uri Yesu o vha a tshi khou amba nga ha shango ḽa vhathu vhe vha vha vhe na fulufhelo ḽa u rengululwa tshivhini. Naho Abele o vha e muthu wa vhuṋa shangoni, zwi vhonala u nga ndi ene wa u thoma we Mudzimu a vhona a tshi nga kona u rengululwa. * Zwi tou vha khagala uri Abele ho ngo aluwa nga tshifhinga tshee ha vha hu na vhathu vhanzhi vhane vha nga vha na ṱhuṱhuwedzo yavhuḓi khae.

Naho ho vha hu si na vhathu vhanzhi shangoni, vha re hone vho vha vho sedzana na vhuimo vhu pfisaho vhuṱungu. Zwi vhonala u nga vhabebi vha Abele, Adamu na Eva vho vha vhe vhathu vhavhuḓi. Fhedzi vho vha vha tshi zwi ḓivha uri vho ita vhukhakhi vhuhulwane vhutshiloni havho. Vho vhuya vha vha vhathu vho fhelelaho, vha re na tshilavhelelwa tsha u tshila nga hu sa fheli. Vho shandukela Yehova Mudzimu, vha pandelwa hayani havho ha Paradiso tsimuni ya Edeni. Vho vha na tseḓa vha ḓihumbulela vhe vhoṱhe—vha sa humbulele na vhana vhavho—zwa ita uri vha si tsha vha vhathu vho fhelelaho, vhe vha xelelwa na nga vhutshilo vhu sa fheli.—Genesi 2:15–3:24.

Vho pandelwa uri vha ye u tshila nnḓa ha tsimu, nahone Adamu na Eva vho wana uri vhutshilo vhu a konḓa.  Fhedzi musi ṅwana wavho wa u thoma a tshi bebwa, vho mu rina dzina ḽa Kaini, zwine zwa amba uri “Zwe Zwa Bebwa,” nahone Eva o ri: “Ndo wana munna nga Yehova.” Maipfi awe a sumbedza uri o vha a tshi khou humbula nga ha fulufhedziso ḽe Yehova a ḽi ita tsimuni, musi a tshi amba hu tshee nga phanḓa uri hu na musadzi ane a ḓo bveledza “mbeu” ine nga ḽiṅwe ḓuvha ya ḓo fhelisa muvhi we a fhura Adamu na Eva. (Genesi 3:15; 4:1) Naa Eva o vha a tshi humbula uri ndi ene musadzi we ha ambiwa nga hae kha vhuporofita, na uri Kaini o vha e ene “mbeu” yo fulufhedziswaho?

Arali o humbula zwenezwo, o vha o khakha vhukuma. Zwiṅwe hafhu, arali Eva na Adamu vho vhudza Kaini eneo mazwifhi musi a tshi khou aluwa, vho ita uri a ṱahulele mavhonele a u ḓihudza. Nga u ya ha tshifhinga, Eva o vha na murwa wa vhuvhili, fhedzi a hu na zwo ambiwaho nga hae. Vho mu rina dzina ḽa Abele, zwine zwa nga amba uri “Mufemo,” kana “Mahandana.” (Genesi 4:2) Naa u khetha hawe ḽeneḽo dzina zwi sumbedza uri o vha a songo lavhelela zwinzhi, a tshi nga ha na fulufhelo kha Abele u fana na ḽe a vha e naḽo kha Kaini? Khamusi zwo vha zwo ralo, fhedzi a ri na vhuṱanzi hazwo.

Naho zwo ralo, vhabebi ṋamusi vha nga guda zwinzhi kha vhenevho vhabebi vha u thoma. Zwine na zwi amba na u zwi ita, zwi nga ita uri vhana vha vhoiwe vha ḓihudze, vha vhe na vhuhovheleli, na mavhonele a tseḓa. Kha ḽiṅwe sia, ni nga funza vhana vha vhoiwe uri vha fune Yehova Mudzimu na uri vha vhumbe vhukonani nae. Zwi ṱungufhadzaho ndi uri vhabebi vhashu vha u thoma vho kundwa u zwi ita, a vho ngo kona u hwala vhuḓifhinduleli havho. Naho zwo ralo, vhana vhavho vho vha vha tshi kha ḓi vha na fulufhelo.

Musi vhenevho vhatukana vhavhili vha tshi khou aluwa, zwi vhonala u nga Adamu o vha gudisa mishumo ine ya ḓo tikedza muṱa wa havho. Kaini o vha mulimi; Abele a vha mulisa.

Naho zwo ralo, Abele o ita zwiṅwe zwithu zwa ndeme vhukuma. Musi miṅwaha i tshi khou ḓi ya, o ṱahulela lutendo—pfaneleo yavhuḓi ye nga murahu Paulo a ṅwala nga hayo. Edzani u humbula nga ha zwenezwo. Abele o vha e si na muthu a re tsumbo ane a nga guda khae. Zwo ḓa hani uri a vhe na lutendo kha Yehova Mudzimu? Ṱhogomelani zwithu zwiraru zwe zwa thusa Abele uri a vhe na lutendo lwo khwaṱhaho.

Tsiko ya Yehova.

Ndi ngoho uri Yehova o sema mavu, a ita uri a medze mipfa na tsheṋe musi a tshi limiwa. Naho zwo ralo, shango ḽo vha ḽi tshi kha ḓi kona u bveledza zwimela zwavhuḓi zwe zwa ita uri muṱa wa ha Abele u bvele phanḓa u tshi tshila. Nahone zwifuwo zwo vha zwi songo semiwa, u katela na zwiṋoni na khovhe, kana dzithavha, madzivha, milambo, na lwanzhe, kana lutombo, makole, ḓuvha, ṅwedzi na ṋaledzi. Hoṱhe he Abele a lavhelesa hone, o vha a tshi vhona vhuṱanzi ha uri Yehova Mudzimu, ndi musiki wa zwoṱhe a re na lufuno luhulwane, vhuṱali, na vhuḓi. (Vha-Roma 1:20) U elekanya nga ha zwenezwi zwithu zwo khwaṱhisa lutendo lwawe.

Zwi tou vha khagala uri Abele o ḓiṋea tshifhinga tsha u elekanya nga ha Yehova. Mu vhoneni nga iṱo ḽa muhumbulo a tshi khou ṱhogomela sambi ḽawe. Mulisa o vha a tshi anzela u tshimbila tshifhinga tshilapfu. O vha a tshi tshimbila na zwifuwo zwawe dzithavhani, madzivhani, a tshi wetshela seli ha milambo—a tshi khou ṱoḓa pfulo yo  nonaho, maḓi a khwine-khwine, na vhukhudo ha zwifuwo ho teaho. Kha zwivhumbiwa zwoṱhe zwa Mudzimu, nngu ndi tshivhumbiwa tshine tsha nga tsho vhumbelwa uri tshi livhiswe na u tsireledzwa nga muthu. Naa Abele na ene o zwi ṱhogomela uri o vha a tshi ṱoḓa u livhiswa, u tsireledzwa na u ṱhogomelwa nga Mudzimu o ṱalifhaho na a re na maanḓa u fhira vhathu vhoṱhe? A zwi timatimisi uri o rabela malugana na zwenezwo, nahone lutendo lwawe lwo bvela phanḓa lu tshi khwaṱha.

Mafulufhedziso A Yehova.

Adamu na Eva vha fanela u vha vho anetshela vhana vhavho nga ha zwithu zwe zwa itea tsimuni ya Edeni zwe zwa ita uri vha pandelwe. Nga zwenezwo, Abele o vha e na zwithu zwinzhi zwine a nga elekanya nga hazwo.

Yehova o vha o amba uri mavu o semiwa. Zwi tou pfala uri Abele o vhona mipfa na tsheṋe zwe zwa mela, hu tshi ḓadzea eneo maipfi a vhuporofita. Yehova o dovha a vhudza Eva hu tshee nga phanḓa uri o vha a tshi ḓo pfa vhuṱungu musi a tshi beba. Musi vharathu vha Abele vha tshi bebwa, zwi tou vha khagala uri o vhona eneo maipfi a tshi ḓadzea. Yehova o dzula o amba uri Eva o vha a tshi ḓo ṱoḓa u funiwa na u ṱhogomelwa nga munna wawe Adamu, na uri o vha a tshi ḓo mu vhusa. Abele o vhona zwenezwo zwithu zwi tshi itea phanḓa hawe. Kha mafhungo enea oṱhe, Abele o vhona uri maipfi a Yehova a a fulufhedzea tshoṱhe. Nga zwenezwo, Abele o vha e na zwiitisi zwi pfalaho zwa u vha na lutendo kha mafulufhedziso a Mudzimu nga ha “mbeu” yo fulufhedziswaho, ye ya vha i tshi ḓo fheleledza yo dzudzanya vhukhakhi hoṱhe he ha thoma tsimuni ya Edeni.—Genesi 3:15-19.

Vhashumeli Vha Yehova.

Ho vha hu si na vhathu vhane vha nga vhetshela Abele tsumbo yavhuḓi, fhedzi ho vha hu na zwiṅwe zwivhumbiwa zwo ṱalifhaho zwi re kha ḽifhasi nga tshenetsho tshifhinga. Musi Adamu na Eva vha tshi pandelwa tsimuni, Yehova o ita vhungoho ha uri vhone na vhana vhavho vha songo tsha kona u dzhena Paradisoni yeneyo i re kha ḽifhasi. U itela u linda khoro dzayo, Yehova o vhea Vhakerube—vharuṅwa vha re na vhuimo ha nṱhesa—a vhea na banga ḽa khavho ya mulilo ḽi no penyisa phanḓa na murahu ḽi tshi mona ḽi sa imi.—Genesi 3:24.

Edzani u vhona nga iṱo ḽa muhumbulo Abele a tshee mutukana, nahone a tshi vhona vhenevho Vhakerube. Samusi vho vha vho ambara mivhili ya ṋama, vho vha vha tshi vhonala uri vha na maanḓa mahulu. Nahone ḽeneḽo “banga” ḽi dugaho mulilo, ḽe ḽa vha ḽi tshi khou mona, ḽi fanela u vha ḽo mu mangadza vhukuma. Musi Abele a tshi khou aluwa, naa o vhuya a vhona u nga vhenevho vhakerube vho borea, lune vha ṱoḓa u litsha mushumo wavho? Na khathihi. Vhusiku na masiari, miṅwaha i tshi khou tevhekana, zwenezwo zwivhumbiwa zwo ṱalifhaho, zwi re na maanḓa zwo bvela phanḓa zwo ima henefho zwi tshi khou ita mushumo wazwo. Nga zwenezwo, Abele o guda uri Yehova Mudzimu u na vhashumeli vho lugaho vha re na lutendo lwo khwaṱhaho. Kha vhenevho vhakerube, Abele o vhona nḓila ine vha fulufhedzea ngayo, na nḓila ine vha thetshelesa ngayo Yehova, naho vha muṱa wa hawe vha songo ita nga u ralo. Vhukuma, vhenevho vharuṅwa vho mu vhetshela tsumbo i khwaṱhisaho lutendo.

U elekanya nga ha zwoṱhe zwe Yehova a zwi dzumbulula nga ha ene muṋe kha tsiko yawe, mafulufhedziso awe, na tsumbo ya vhashumeli vhawe, zwo ita uri lutendo lwa Abele lu aluwe na uri lu khwaṱhe vhukuma. Tsumbo yawe i kha ḓi amba na riṋe, a zwo ngo ralo kani? Vhaswa nga ho livhaho, vha nga wana zwi tshi khwaṱhisa u ḓivha uri zwi a konadzea u vha na lutendo lwa vhukuma kha Yehova Mudzimu, hu sa londwi zwine miraḓo ya muṱa wa havho ya zwi ita. Musi ri tshi lavhelesa tsiko i mangadzaho yo ri tangaho, u katela na tsumbo nnzhi dza vhathu vha re Bivhilini vhe vha sumbedza lutendo, ri vha na zwiitisi zwinzhi zwa u fhaṱa lutendo lwashu ṋamusi.

Samusi lutendo lwa Abele kha Yehova lu tshi khou ḓi aluwa, o ṱoḓa nḓila ya u lu sumbedza nga mishumo. Naho zwo ralo, ndi mini zwine muthu a nga zwi ṋea Musiki wa fhethu hoṱhe? Zwi tou pfala uri Mudzimu ha ṱoḓi zwifhiwa kana thuso i bvaho kha vhathu. Nga u ya ha tshifhinga, Abele o pfesesa mafhungo-ngoho a mutheo a uri: Arali—e na tshiṱuṱuwedzi tshavhuḓi—o vha a tshi ḓo kona u ṋea Yehova zwa khwine-khwine zwine a vha nazwo, nahone zwenezwo zwo vha zwi tshi ḓo takadza Khotsi awe wa ṱaḓulu.

Nga zwenezwo, Abele o dzudzanya u ṋekedza nngu i bvaho kha sambi ḽawe. O khetha ya khwine u fhira dzoṱhe, a i ṋekedza Yehova. Kha ḽiṅwe sia, Kaini na ene o vha a tshi ṱoḓa u fhaṱutshedzwa na u takalelwa nga Mudzimu, a dzudzanya u ṋekedza zwiṅwe zwa zwiliṅwa zwawe. Fhedzi zwiṱuṱuwedzi zwawe zwo vha zwi sa fani na zwa Abele. Phambano vhukati havho yo vhonala zwavhuḓi musi vha tshi ṋekedza zwiṱhavhelo zwavho.

 Vhenevho vharwa vhavhili vha Adamu vho shumisa aletare na mulilo musi vha tshi ṋekedza zwiṱhavhelo zwavho, khamusi vhakerube na vhone vho vha vho lavhelesa, samusi vho vha vhe vhone vhaimeleli vha Yehova kha ḽifhasi nga tshenetsho tshifhinga. Yehova o fhindula. Ri a vhala: “Yehova a takalela Abele na tshidzimu tshawe.” (Genesi 4:4) Yeneyi ndimana a i ṱalutshedzi uri Yehova o ita mini u sumbedza uri u takalela tshiṱhavhelo tsha Abele. Fhedzi ndi ngani o takalela Abele?

Naa ndi nga nṱhani ha tshiṱhavhelo tshe a tshi ita? Abele o ṋekedza tshifuwo tshi tshilaho, a shulula malofha atsho. Naa Abele o vha a tshi zwi ḓivha uri tshiṱhavhelo tsho raloho ndi tsha ndeme lungafhani? Maḓanani a miṅwaha nga murahu ha musi Abele o no fa, Mudzimu o shumisa tshiṱhavhelo tsha nngu i si na tshivhi ine ya fanyiselwa nga Murwa wawe o fhelelaho,“Ngwana ya Mudzimu,” ye malofha ayo a si na mulandu a shululwa. (Yohane 1:29; Ekisodo 12:5-7) Naho zwo ralo, Abele ho ngo ḓivha kana u pfesesa nḓila ye Yehova a vha a tshi ḓo shumisa ngayo zwiṱhavhelo nga murahu.

Zwine ra zwi ḓivha zwa vhukuma ndi uri: Abele o ṋekedza zwa khwine-khwine kha zwe a vha e nazwo. Yehova ho ngo takalela fhedzi tshiṱhavhelo, fhedzi o takalela na muthu we a tshi ṋekedza. Abele o dzhia vhukando nge a ṱuṱuwedzwa nga u funa Yehova, na nga u vha na lutendo lwa vhukuma.

Kaini o ita zwo fhambanaho na zwenezwo. Yehova ho ngo ‘sedza Kaini na tshidzimu tshawe.’ (Genesi 4:5) A si uri tshiṱhavhelo tshe tsha ṋekedzwa nga Kaini tsho vha tsho khakhea; ngauri nga murahu Mulayo wa Mudzimu wo vha u tshi tendela vhathu vha tshi ita zwiṱhavhelo zwa zwiliṅwa. (Levitiko 6:14, 15) Musi i tshi amba nga ha Kaini, Bivhili i ri: “Mishumo yawe yo vha i mivhi.” (1 Yoh. 3:12) U fana na zwine zwa itwa nga vhathu vhanzhi ṋamusi, Kaini o ita tshiṱhavhelo tshawe u itela u bva mulanduni, nahone Mudzimu ha ṱanganedzi zwiṱhavhelo zwo raloho. U sa vha hawe na lutendo, na u sa funa Yehova zwo ṱavhanya zwa vhonala nga zwiito zwawe.

Musi Kaini a tshi vhona uri ho ngo takalelwa nga Yehova, naa o ṱoḓa u guda kha tsumbo ya Abele? Na khathihi. O thoma u vhenga murathu wawe. Yehova o vhona zwe zwa vha zwi tshi khou itea mbiluni ya Kaini, nahone a lingedza u ambedzana nae a sa fheli mbilu. O sevha Kaini uri a litshe u sinyuwa, ngauri tsinyuwo i nga mu itisa tshivhi tshihulwane. O mu ṋea fulufhelo ḽa uri arali a nga shandula nḓila dzawe ndi “hone khofheni [hawe] hu tshi ḓo tshá?”—Genesi 4:6, 7. 

Kaini ho ngo thetshelesa tsevho dza Mudzimu. Nṱhani hazwo, o ramba murathu wawe uri a ṱuwe nae tsimuni. Musi vhe henefho, Kaini o vutshela murathu wawe a mu vhulaha. (Genesi 4:8) Nga iṅwe nḓila, zwenezwi zwi nga amba uri Abele ndi ene muthu wa u thoma we a tovholwa, a vhulahelwa lutendo lwawe. O vha o no fa, fhedzi mafhungo awe o vha a tshi kha ḓi bvela phanḓa.

Nga lwa pfanyisedzo, malofha a Abele o ṱavhela mukosi Yehova Mudzimu, u itela uri a lifhedze na uri hu vhe na khaṱulokwayo. Mudzimu o ita vhungoho ha uri hu a vha na khaṱulokwayo, ngauri o ṱarafa Kaini muvhi nga nṱhani ha tshivhi tshawe. (Genesi 4:9-12) Zwa ndeme vhukuma ndi uri mafhungo a Abele a kha ḓi amba na riṋe na ṋamusi. Vhutshilo hawe ho fhedzaho miṅwaha i ṱoḓaho u vha 100—ndi vhupfufhi musi vhu tshi vhambedzwa na ha vhathu vha nga tshenetsho tshifhinga, fhedzi Abele o tshila nga nḓila ye ya takadza Mudzimu. O fa a tshi zwi ḓivha uri u a funiwa na u takalelwa nga Khotsi awe wa ṱaḓulu, Yehova. (Vha-Heberu 11:4) Ri nga vha na vhungoho ha uri o tsireledzea muhumbuloni wa Yehova u sa gumi, nahone o lindela u vuselwa kha ḽifhasi ḽa paradiso. (Yohane 5:28, 29) Naa ni ḓo ṱangana nae henefho? Zwi nga konadzea arali na ḓiimisela u thetshelesa musi Abele a tshi amba, na ita na u edzisa lutendo lwawe lu swayeaho.