Ni ḓipfa hani nga ha ḓuvha ḽa 21 December, 2012, ḽe vhathu vhanzhi vha amba uri ḽi ḓo ḓisa tshanduko khulwane shangoni ḽoṱhe? Zwi tshi ya nga zwe na vha no zwi lavhelela, ni nga kha ḓipfa no vhofholowa, no kulea nungo, kana ni si na dzangalelo khazwo. Naa vhathu vho humbulela ḓuvha ḽo khakheaho ḽa u ḓa ha vhufhelo ha shango?

Hu pfi mini nga ha “vhufhelo ha ḽifhasi” he ha ṱaluswa Bivhilini? (Mateo 24:3) Vhaṅwe vha ofha uri shango ḽi ḓo fhiswa nga mulilo. Vhaṅwe vha takadzwa nga u humbula nga ha zwine zwa ḓo itea musi shango ḽi tshi fhela. Vhaṅwe vho no neta nga u pfa vhathu vha tshi ri vhufhelo vhu tsini. Naa yeneyo ndi nḓila yo teaho ine vhathu vha tea u aravha ngayo? Ndi ifhio ngoho malugana na enea mafhungo?

Ni nga kha ḓi mangadzwa nga zwine na ḓo zwi guda malugana na zwine Bivhili ya zwi amba zwa vhukuma nga ha vhufhelo ha shango. Bivhili i ri ṋea zwiitisi zwa u lavhelela vhufhelo, ya dovha ya ri ṱalutshedza nḓila ine vhaṅwe vha nga ḓipfa ngayo musi vha tshi vhona u nga vhufhelo vhu khou lenga. Ri ni ramba uri ni ṱolisise phindulo dzi re Bivhilini dza mbudziso dzo ḓoweleaho dza malugana na vhufhelo ha shango.

PHINDULO I BVAHO BIVHILINI: “[Mudzimu o] fhaṱa ḽifhasi kha miteo yaḽo; a ḽi nga dzinginyei lini na lini.”—PSALME YA 104:5.

Ḽifhasi ḽi nga si fheliswe, hu nga vha nga mulilo kana nga nḓila naho i ifhio. Nṱhani hazwo, Bivhili i funza uri ḽifhasi ndi haya ha vhathu ha lini na lini. Psalme ya 37:29 i ri: “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo’ lini na lini.”—Psalme ya 115:16; Yesaya 45:18.

Musi Mudzimu o no sika ḽifhasi, o vhona zwoṱhe zwo “naka,” nahone u kha ḓi ḓipfa nga yeneyo nḓila. (Genesi 1:31) Ho ngo dzudzanya u ḽi fhelisa na luthihi; fhedzi o fulufhedzisa uri u ḓo “lozwa vha tshinyadzaho ḽifhasi,” na u ḽi tsireledza uri ḽi si tshinyadzwe lwa tshoṱhe.—Nzumbululo 11:18.

Naho zwo ralo, ni nga kha ḓi humbula uri 2 Petro 3:7 i sumbedza uri ḽifhasi ḽi ḓo fheliswa nga mulilo. Yeneyo ndimana ya Bivhili i ri: “Maṱaḓulu na ḽifhasi zwine zwa vha hone zwino zwo vhulungelwa mulilo.” Naa zwenezwi a zwi sumbedzi uri ḽifhasi ḽi ḓo fhiswa nga mulilo? Nga zwiṅwe zwifhinga Bivhili i shumisa maipfi ane a ri “maṱaḓulu,” “ḽifhasi,” na “mulilo” nga lwa pfanyisedzo. Sa tsumbo, kha Genesi 11:1 hu pfi: “Shango ḽo vha ḽi na lulimi luthihi na kuambele kuthihi.” Kha yeneyi ndimana ho shumiswa ipfi “shango,” musi hu tshi ambelwa kha vhathu.

Vhubvo ha mafhungo a re kha 2 Petro 3:7 vhu sumbedza uri maṱaḓulu, ḽifhasi, na mulilo zwo bulwaho henefho ndi zwa pfanyisedzo. Ndimana 5 na 6 dzi amba nga zwe zwa itea misini ya Noaxe ya Maḓi mahulu. Nga tshenetsho tshifhinga ho lozwiwa shango ḽa kale, fhedzi khungulu ine ra khou tshila khayo a yo ngo kumbiwa. Nṱhani hazwo, Maḓi Mahulu o fhelisa vhathu vhoṱhe vha re na vhuvemu vhane vha ḓivhiwa sa “shango ḽa tshenetsho tshifhinga.” O dovha a fhelisa na “maṱaḓulu”—ane a imela vhavhusi vha vhenevha vhathu. (Genesi 6:11) Nga hu fanaho, 2 Petro 3:7 i amba hu tshee nga phanḓa nga ha u fheliswa tshoṱhe ha vhathu vhavhi na mivhuso yavho i sa fulufhedzei, nahone u fheliswa havho zwi ḓo tou nga vho fhiswa nga mulilo.

PHINDULO I BVAHO BIVHILINI: “Shango ḽi a fhira na nyemulo dzaḽo, fhedzi ane a ita zwine Mudzimu a zwi funa u ḓo dzula e hone lini na lini.”—1 YOHANE 2:17.

Musi hu tshi pfi “shango” ḽi ḓo fhela, a hu khou ambiwa uri hu ḓo fheliswa khungulu ine ra dzula khayo, fhedzi hu khou ambiwa uri hu ḓo fheliswa vhathu vhane vha si ite zwine Mudzimu a zwi funa. Samusi dokotela a tshi nga bvisa bundu ḽi re na khentsara u itela u tshidza mulwadze, Mudzimu u ḓo lozwa vhavhi, u itela uri vhathu  vho lugaho vha ḓiphine nga vhutshilo kha ḽifhasi. (Psalme ya 37:9) Zwenezwi zwi ita uri ri kone u vhona uri “vhufhelo ha shango” ndi zwithu zwavhuḓi.

Enea mavhonele avhuḓi nga ha “vhufhelo ha shango” a sumbedzwa kha ṱhalutshedzelo dza Bivhili dzine dza shumisa mubulo une wa ri, “vhufhelo ha ano maitele a zwithu,” kana “vhufhelo ha ḽifhinga.” (Mateo 24:3, New International Version) Samusi hu na vhathu vhane vha sa ḓo fheliswa, vhane vha ḓo bvela phanḓa vha tshi tshila kha ḽifhasi, naa a zwi pfali uri hu na maṅwe maitele maswa ane a ḓo tevhela? Phindulo i bvaho Bivhilini i ralo, ngauri i amba nga ha “maitele a zwithu a ḓaho.”—Luka 18:30.

Musi a tshi amba nga ha tshenetsho tshifhinga tshi ḓaho, Yesu o ri ndi tshifhinga tsha u “sikwa nga huswa.” Nga tshenetsho tshifhinga, u ḓo vhuyedzedza vhathu uri vha vhe kha vhuimo he Mudzimu a vha o vhu dzudzanya u bva mathomoni. (Mateo 19:28) Nga tshenetsho tshifhinga, ri ḓo ḓiphina nga zwi tevhelaho:

• Ḽifhasi ḽa paradiso ḽo tsireledzeaho, ḽine vhathu vha ḓo ḓiphina khaḽo.—Yesaya 35:1; Mixa 4:4.
• Ri ḓo vha na mushumo u vhuyedzaho na u fushaho.—Yesaya 65:21-23.
• Malwadze oṱhe a ḓo fhodzwa.—Yesaya 33:24.
• A ri tsha ḓo vha vhalala.—Yobo 33:25.
• Vhafu vha ḓo vuswa.—Yohane 5:28, 29.

Arali ri tshi “ita zwine Mudzimu a zwi funa,” zwine a zwi lavhelela kha riṋe, a ro ngo fanela u ofha vhufhelo ha shango. Nṱhani hazwo, ri ḓo lavhelela uri vhu swike.

PHINDULO I BVAHO BIVHILINI: “Musi ni tshi vhona zwenezwi zwithu zwi tshi itea, ni ḓivhe uri Muvhuso wa Mudzimu u tsini.”—LUKA 21:31.

Kha bugu yawe ine ya pfi The Last Days Are Here Again, Muphurofesa Richard Kyle o ṅwala uri “vhathu vha dzula vha tshi humbulela ḓuvha ḽa vhufhelo nga nṱhani ha dzitshanduko nnzhi dzine dza itea hu songo lavhelelwa.” Zwenezwo zwi itea zwihuluhulu musi vhathu vha sa koni u pfesesa kana u ṱalutshedza zwine zwa khou bvelela.

Naho zwo ralo, vhaporofita vha Bivhili vhe vha amba nga ha vhufhelo, a vho ngo ita phetho ya u ṅwala nga ha vhufhelo u itela u sumbedza uri ndi ngani zwithu zwine ra si kone u zwi ṱalutshedza zwi tshi itea. Nṱhani hazwo, vho vha vho hevhedzwa nga Mudzimu uri vha ṅwale nga ha vhuimo vhune ha ḓo sumbedza uri vhufhelo ha shango vhu tsini. Ṱhogomelani vhuṅwe vhuporofita, uri ni kone u vhona arali vhu tshi khou ḓadzea musalauno.

•   Dzinndwa, nḓala, midzinginyo, na malwadze a ofhisaho.—Mateo 24:7; Luka 21:11.
• U engedzea ha vhuvemu.—Mateo 24:12.
• Vhathu vha tshinyadzaho ḽifhasi.—Nzumbululo 11:18.
• Vhathu vhane vha funa vhone vhaṋe fhedzi, vhafuni vha tshelede, na vhane vha funa miḓifho u fhira Mudzimu.—2 Timotheo 3:2, 4.
• U pwashea ha miṱa.—2 Timothy 3:2, 3.
• Vhathu vhane vha sa ḓo ṱhogomela vhuṱanzi ha uri vhufhelo vhu tsini.—Mateo 24:37-39.
• U huwelelwa ha mafhungo maḓifha a Muvhuso ḽifhasini ḽoṱhe.—Mateo 24:14.

Samusi Yesu o amba, musi ri “tshi vhona zwenezwi zwithu zwoṱhe,” ri fanela u ḓivha uri vhufhelo vhu tsini. (Mateo 24:33) Ṱhanzi dza Yehova vha tenda uri hu na vhuṱanzi vhunzhi ha ḽeneḽi fhungo, nahone vha vhudza vhaṅwe nga ha zwine vha zwi tenda, nga u huwelela khavho mashangoni a fhiraho 236.

PHINDULO I BVAHO BIVHILINI: “Nga tshifhinga tshine vha ḓo ri: “Mulalo na u tsireledzea!” ndozwo i ḓo vha ḓela vha songo zwi lavhelela sa vhuṱungu vhune ha pfiwa nga mufumakadzi musi e tsini na u beba; nahone a vha nga ponyoki na khathihi.”—1 VHA-THESALONIKA 5:3.

Bivhili i fanyisa u fheliswa ha ḽifhasi na vhuṱungu vhune ha pfiwa nga mufumakadzi musi e tsini na u beba—nahone vhuṱungu ha hone a vhu iledzei, vhu ḓa nga u ṱavhanya. Tshifhinga tshine tsha ri livhisa kha vhufhelo tshi fanyiswa na mufumakadzi o vhifhaho muvhilini, ngauri u a vhona tswayo dzine dza sumbedza uri u tsini na u beba. Dokotela wawe a nga kha ḓi anganyela ḓuvha ḽine a ḓo beba ngaḽo, fhedzi naho zwi tshi nga lenga, u na vhungoho ha uri ṅwana wawe u ḓo bebwa hu si kale. Nga hu fanaho, naho vhufhelo vhu sa athu swika nga tshifhinga tshee vhathu vha vhu lavhelela ngatsho, zwenezwo a zwi ambi uri vhu nga si swike, nahone a zwi shanduli mbuno ya uri ri khou tshila “maḓuvhani a vhufhelo.”—2 Timotheo 3:1.

Ni nga kha ḓi vhudzisa uri, ‘arali hu na tswayo nnzhi dzine dza sumbedza uri vhufhelo vhu tsini, ndi ngani vhathu vhanzhi vha tshi kundwa u dzi ṱhogomela?’ Bivhili i sumbedza uri musi vhufhelo vhu tsini, vhathu vhanzhi vha ḓo nyadza vhuṱanzi vhu re hone. Nṱhani  ha u ṱhogomela uri tshanduko khulwane dzine dza khou itea, dzi ri ṋea vhuṱanzi ha uri ri khou tshila maḓuvhani a vhufhelo, vha holedza vhane vha zwi tenda, nahone vha ri khavho: “U bva nga ḓuvha ḽe vhomakhulukuku washu vha fa, zwithu zwoṱhe zwi kha ḓi bvela phanḓa nga nḓila i fanaho na musi zwithu zwi tshi thoma u sikwa.” (2 Petro 3:3, 4) Nga maṅwe maipfi, zwiga zwa uri ri khou tshila maḓuvhani a vhufhelo zwi tou vha khagala, fhedzi vhanzhi a vha zwi ṱhogomeli.—Mateo 24:38, 39.

Kha ino thero ro haseledza vhuṅwe ha vhuṱanzi vhu re Maṅwaloni vhune ha sumbedza uri vhufhelo vhu tsini. * Naa ni nga ṱoḓa u guda zwo engedzeaho? Arali zwo ralo, zwi nga vha zwavhuḓi uri ni kwamane na Ṱhanzi dza Yehova, ni humbele u farelwa pfunzo ya Bivhili ya mahala. Ni nga guda hayani haṋu, kana huṅwe fhethu hune na vhona ho tea, kana na guda nga luṱingo. A hu badeliswi, fhedzi zwine zwa ṱoḓea ndi uri ni ḓiṋee tshifhinga tsha u guda, nahone ni ḓo vhuyelwa vhukuma.