Naa ni a ṱoḓa u ḓivha mafhungo-ngoho nga ha Mudzimu—uri ndi nnyi, zwine a zwi funa na zwine a zwi vhenga, na zwine a funa zwi tshi itwa? Kha Ipfi ḽawe Bivhili, Yehova Mudzimu o dzumbulula ngoho yoṱhe nga ha ene muṋe. Fhedzi a si vhathu vhoṱhe vhane vha ri musi vha tshi vhala Bivhili, vha pfesesa nga vhuḓalo enea mafhungo-ngoho. Ndi ngani? Ndi nga nṱhani ha uri u pfesesa mafhungo-ngoho a re Bivhilini, ndi ndugelo ine vhanzhi vha si vhe nayo. Kha ri haseledze zwe Yesu a zwi amba malugana na enea mafhungo.—Vhalani Mateo 11:25.

Yeneyo ndimana i thoma nga maipfi ane a ri: “Nga tshenetsho tshifhinga Yesu a ri.” Nga zwenezwo, zwi vhonala u nga musi Yesu a tshi amba eneo maipfi, o vha a tshi khou aravha zwine zwa kha ḓi bva u itea. O vha a tshi kha ḓi bva u kaidza vhathu vha sa rembuluwi vha miḓi miraru ya Galilea, ye a vha o ita mishumo ya maanḓa khayo. (Mateo 11:20-24) Ni nga kha ḓi ḓivhudzisa uri, ‘Naa hu na vhathu vhe vha vhona mishumo ya maanḓa ya Yesu fhedzi vha si tende mafhungo-ngoho e a vha funza one?’ U sa rembuluwa ha vhathu vhenevho zwo itiswa ngauri mbilu dzavho dzo vha dzo rindila.—Mateo 13:10-15.

Yesu o vha a tshi ḓivha nḓila ine a nga thusa ngayo vhathu uri vha pfesese mafhungo-ngoho nga ha Mudzimu a re Bivhilini. Hu ṱoḓea zwithu zwivhili: Thuso ya Mudzimu, na u vha na mavhonele avhuḓi. Yesu o ṱalutshedza a ri: “Ndi a u renda Khotsi phanḓa ha vhathu vhoṱhe, Iwe Murena wa ḽiṱaḓulu na ḽifhasi, ngauri hezwi zwithu wo zwi dzumbela vhaṱali na vha ṱhalukanyo nahone wa zwi dzumbululela vhana.” Naa ni a kona u zwi vhona uri ndi ngani u pfesesa mafhungo-ngoho a re Bivhilini zwi ndugelo? Yehova “Murena wa ḽiṱaḓulu na ḽifhasi,” u na ndugelo ya u dzumba kana u dzumbulula mafhungo-ngoho u tendelana na zwine a zwi funa, ngauri ndi ene muvhusahoṱhe. Fhedzi Mudzimu u ṋea muṅwe na muṅwe tshibuli tsha u ṱalukanya mafhungo-ngoho. Ndi vhafhio vhane a vha dzumbululela mafhungo-ngoho awe a Bivhili?

Yehova u funa vhathu vhane vha ḓiṱukufhadza, hu si vhane vha ḓihudza. (Yakobo 4:6) U dzumba mafhungo-ngoho kha “vhaṱali na vha ṱhalukanyo”—vhathu vho funzeaho u ya nga mavhonele a ḽino shango, vha sa ṱoḓi u ṱanganedza thuso yawe, vhane vha ḓitika nga vhuṱali havho. (1 Vha-Korinta 1:19-21) Fhedzi u dzumbulula mafhungo-ngoho kha “vhana”—vhathu vhane vha ṱoḓa u guda nga hae zwi tshi bva mbiluni, vhane vha ḓiṱukufhadza u fana na vhana. (Mateo 18:1-4; 1 Vha-Korinta 1:26-28) Murwa wa Mudzimu, Yesu Kristo, o vhona vhathu vho raloho, vhane vha ḓihudza na vhane vha ḓiṱukufhadza. Vharangaphanḓa vha vhurereli vho funzeaho vhane vha ḓihudza, a vho ngo pfesesa mulaedza wa Yesu, fhedzi vharei vha khovhe vhane vha ḓiṱukufhadza vho u pfesesa. (Mateo 4:18-22; 23:1-5; Mishumo 4:13) Nga hu fanaho, hu na vhaṅwe vhathu vho pfumaho na vho funzeaho vhe vha ḓiṱukufhadza zwa vhukuma, vha vha vhatevheli vha Yesu.—Luka 19:1, 2, 8; Mishumo 22:1-3.

Zwino kha ri vhuyelele kha mbudziso ye ya vhudziswa mathomoni a yeneyi thero: Naa ni a ṱoḓa u ḓivha mafhungo-ngoho nga ha Mudzimu? Arali ni tshi ṱoḓa u a ḓivha, ni nga kha ḓi takalela u pfa uri Mudzimu ha takaleli vhathu vhane vha ḓidzhia sa vhaṱali u ya nga mavhonele a ḽino shango. U fhambana na zwenezwo, u takalela vhathu vhane shango ḽa vha nyadza, ḽa vha dzhia vhe matsilu. Arali na guda Ipfi ḽa Mudzimu, ni na mavhonele avhuḓi, ni tshi ḓiṱukufhadza, ni nga vha muṅwe wa vhane Yehova a vha ṋea tshenetshi tshifhiwa tshavhuḓi vhukuma—tsha u pfesesa mafhungo-ngoho nga hae. U a pfesesa zwi ḓo ita uri vhutshilo haṋu vhu vhe na ndivho zwino, zwa ita na uri ni wane “vhutshilo ha vhukuma”—vhune ha vha u tshila nga hu sa fheli shangoni ḽiswa ḽa Mudzimu ḽo lugaho ḽine ḽa ḓo ḓa hu si kale. *—1 Timotheo 6:12, 19; 2 Petro 3:13.