“NDI nga kona u lwisana na tshiṅwe na tshiṅwe nga nnḓa ha mulingo.” Eneo maipfi o ḓoweleaho a ṱalusa zwavhuḓi nḓila ine vhathu vha dzhia ngayo mulingo—ngeno mbiluni dzavho vha tshi zwi takalela. Naho zwo ralo, vhaṅwe vha dzhia mulingo sa swina ḽine ḽa dzula ḽi tshi khou vha linga ḽine vha nga takalela u ḽi kunda. Ni humbula mini? Musi no sedzana na mulingo, naa ni fanela u u tendela u tshi ni kunda kana u lwisana nawo?

Vhukuma, a si yoṱhe milingo ine ya vha na masiandoitwa a si avhuḓi. Sa tsumbo, u ḽa zwikontsi musi ni tshi khou ṱoḓa u fhungudza muvhili zwi nga si ni vhulahe. Fhedzi u tendela milingo i ngaho u sedza zwifanyiso zwi songo kunaho—zwihuluhulu zwine zwa ita uri muthu a ḓifare luvhi nga zwa vhudzekani—zwi nga ḓisa masiandoitwa a si avhuḓi. Bivhili i ri sevha uri: “Hone, ane a ita vhupombwe ha na ṱhalukanyo; ane a ita zwenezwo u tshinyadza muya wawe.”—Mirero 6:32, 33.

Arali na sedzana na mulingo u songo kunaho, ni fanela u aravha hani? Bivhili i a fhindula: “Zwenezwi ndi zwine Mudzimu a zwi funa, uri ni fanela u vha vhakhethwa na uri ni fanela u iledza vhupombwe. Muṅwe na muṅwe waṋu u fanela u ḓivha nḓila ine a nga langa ngayo muvhili wawe nga nḓila ine wa ḓo vha mukhethwa na u ṱhonifheaho.” (1 Vhathesalonika 4:3, 4) Ni nga wana hani maanḓa a u lwisana nayo? Ṱhogomelani vhukando vhuraru vhune ha nga ni thusa.

U sedza zwifanyiso zwi karusaho maḓipfele a zwa vhudzekani zwi ḓo engedza lutamo lu songo kunaho. Musi a tshi amba nga ha phambano vhukati ha u vhona na u tama, Yesu o sevha a ri: “Muṅwe na muṅwe ane a dzulela u lavhelesa mufumakadzi nga u mu emula, o no ita vhuṱonḓolo nae mbiluni yawe.” Musi Yesu a tshi shumisa ḽiṋaṋedzi nga nḓila i bvelelaho, o ṱuṱuwedza a ri: “Arali ḽiṱo ḽau ḽa tsha u ḽa ḽi tshi u khakhisa, u ḽi nongole nahone u ḽi laṱe kule.” (Mateo 5:28, 29) Yesu o vha tshi khou lingedza u ri gudisa mini zwa vhukuma?  U itela u lwisana na mulingo, ri fanela u ita zwithu nga vhuṱali nahone ri si sedze zwifanyiso zwi songo kunaho.

Sa tsumbo: Kha ri ri ni khou kombodzwa nga thotshi. Naa ni ḓo bvela phanḓa no i sedza? Ni nga si zwi ite! Ni ḓo sedza thungo u itela u tsireledza maṱo aṋu. Zwi fanaho na zwenezwo, arali na vhona zwifanyiso zwi songo kunaho—kha dzibugu, zwine zwa ṱalelwa kana u vhona muthu e fhedzi—ni ṱavhanye ni sedze thungo. Tsireledzani muhumbulo waṋu uri u si tshinyale. Juan we a vha e na dzema ḽa u sedza zwifanyiso zwi karusaho maḓipfele a zwa vhudzekani, o ri: “Musi ndi tshi vhona mufumakadzi o nakaho, kanzhi ndi ṱuṱuwedzea uri ndi dovhe ndi mu lavhelese. Nga zwenezwo, ndi lwela u sedza thungo nahone ndi ḓivhudza uri: ‘Rabelani Yehova! Ni fanela u rabela zwino!’ Musi ndo no rabela, lutamo lwonolo lu a fhela nga u ṱavhanya.”—Mateo 6:9, 13; 1 Vhakorinta 10:13.

Dovhani ni ṱhogomele munna a re na lutendo Yobo, we a ri: “Ndo vhofha mulanga na maṱo anga, nde’ ’thi nga lavhelesi musidzana.” (Yobo 31:1) Ndi ngani ni sa lingedzi u ita zwi fanaho?

Lingedzani hezwi: Arali na vhona zwifanyiso zwi songo kunaho, ṱavhanyani ni sedze thungo. Edzisani muṅwali wa Bivhili we a rabela a ri: “Funza maṱo anga u tata zwivhi.”—Psalme ya 119:37.

Nga nṱhani ha uri roṱhe a ro ngo fhelela, nga zwiṅwe zwifhinga zwi nga konḓa u lwisana na lutamo lu si lwavhuḓi. Bivhili i ri: “Muṅwe na muṅwe u lingwa a tshi kokodzwa na u kungwa nga nyemulo yawe. Musi nyemulo yo no hulela, i bveledza tshivhi.” (Yakobo 1:14, 15) Ndi mini zwine na nga zwi ita u itela u iledza zwithu zwivhi?

Musi ni tshi sedzana na lutamo lu si lwavhuḓi, humbulani uri ni nga ḓikhethela nḓila ine na nga aravha ngayo. Lwisanani na lwonolo lutamo. Lu bviseni muhumbuloni waṋu. Iledzani u dzula ni tshi humbula nga ha zwithu zwi songo kunaho. Muṅwe munna ane a pfi Troy we a vha e na dzema ḽa u sedza zwifanyiso zwi karusaho maḓipfele a zwa vhudzekani, o ri: “Ndo lwela u bvisa mihumbulo i si yavhuḓi muhumbuloni wanga nga u livhisa ṱhogomelo kha zwithu zwavhuḓi. Zwo  vha zwi songo leluwa. Ndo kundelwa lunzhi. Fhedzi mafheleloni ndo guda nḓila ya u langa mahumbulele anga.” Muṅwe mufumakadzi ane a pfi Elsa, we a lwisana na mulingo u songo kunaho musi e miṅwahani ya vhufumi, o ri: “Nga u dzula ndo farakanea na u rabela Yehova, ndo kona u lwisana na mihumbulo i si yavhuḓi.”

Lingedzani hezwi: Musi ni tshi dinwa nga mihumbulo i songo kunaho, ṱavhanyani ni litshe u humbula nga hazwo nahone ni rabele. Lwisanani na mihumbulo i si yavhuḓi nga u humbula “zwithu naho zwi zwifhio zwine zwa vha ngoho, zwine zwa vha zwa ndeme, zwo lugaho, zwo kunaho, zwi funeaho, zwi re na bvumo ḽavhuḓi, zwivhuya, zwi khoḓwaho.”—Vhafilipi 4:8.

Musi hu na lutamo, mulingo na tshibuli tsha u zwi ita, hu nga vha na thaidzo nga hu leluwaho. (Mirero 7:6-23) Ni nga iledza hani u dzhena khakhathini?

Bivhili i ri ṋea nyeletshedzo ya vhuṱali ine ya ri: “Muthanyi u vhona muvhango a khuda; matsilu a fhira a welwa.” (Mirero 22:3) Ngauralo, lindani nḓila dzaṋu. Iledzani zwithu zwine zwa nga ni dzhenisa khakhathini. (Mirero 7:25) Muṅwe munna ane a pfi Filipe, we a kunda dzema ḽa zwifanyiso zwi karusaho maḓipfele a zwa vhudzekani, o ri: “Ndi vhea khomphyutha hune muṅwe na muṅwe a nga i vhona nahone nda dzhenisa zwithu zwi thivhelaho khombo kha Inthanethe. Nahone ndi dzhena kha Inthanethe musi hu na vhathu.” Zwi ngaho zwenezwo, Troy we a bulwa mathomoni o ri: “Ndi iledza u sedza filimu dzi songo kunaho na u dzula na vhathu vhane vha amba nga zwa vhudzekani nga nḓila i si yavhuḓi. A thi ṱoḓi u ḓi wana ndi khomboni.”

Lingedzani hezwi: Nga u fulufhedzea ṱolisisani vhushayanungo haṋu nahone ni dzudzanye hu tshee nga phanḓa u itela u iledza vhuimo vhune ha nga ni dzhenisa khomboni.—Mateo 6:13.

Hu pfi mini arali na kundwa nga mulingo hu sa londwi vhuḓidini haṋu ha u lwisana naho? Ni songo kulea nungo nahone na litsha u lingedza. Bivhili i ri: “Muvhuya, na̗ u wa kaṱan’una-kavhili, u ḓo ḓi dovha a vuwa.” (Mirero 24:16) Vhukuma, Khotsi ashu wa ṱaḓulu u ri ṱuṱuwedza uri ri ‘vuwe.’ Naa ni ḓo ṱanganedza thuso yawe ya lufuno? Nga zwenezwo, ni songo neta u mu rabela. Khwaṱhisani lutendo lwaṋu nga u guda Ipfi ḽawe. Sumbedzani u ḓiimisela nga u ya miṱanganoni ya Vhukriste. Dzhielani nṱha mafulufhedziso a Mudzimu ane a ri: “Ndi ḓo U khwaṱhisa, ndi ḓo U farisa.”—Yesaya 41:10.

Cody we a bulwa mathomoni o amba uri: “Zwo vha zwi tshi ṱoḓa vhuḓidini vhuhulwane vhukuma u itela u kunda dzema ḽa zwifanyiso zwi karusaho maḓipfele a zwa vhudzekani. Ndo kundelwa lunzhi, fhedzi nga thuso ya Mudzimu ndo fhedzisela ndo kunda.” Dylan we na ene a bulwa mathomoni, o ri: “Ndo vha ndi tshi ḓo vha ndo ita zwa vhudzekani na mushumisani na nṋe nga hu leluwaho. Fhedzi ndo ima ndo khwaṱha nda mu vhudza uri ‘Hai!’ Zwi a takadza u vha na luvalo lwo kunaho. Zwa ndeme vhukuma ndi uri ndo ita uri Yehova a ḓirwe khana nga nṋe.”

Musi ni tshi ima no khwaṱha na iledza mulingo, ni nga vha na vhungoho ha uri Mudzimu u ḓo ḓirwa khana nga inwi!—Mirero 27:11.