Eric: Nṋe a thi muthu wa vhurereli. Nga zwenezwo, a thi humbuli uri hu na zwinzhi zwine ra nga amba nga hazwo.

Brian: Ndi takalela u pfa zwenezwo. Nṋe ndi pfi Brian. Inwi ni pfi nnyi?

Eric: Ndi pfi Eric.

Brian: Ndi takalela u ni ḓivha, Eric.

Eric: Na nṋe ndi takalela u ni ḓivha.

Brian: Naa no alutshela muṱani wa vhurereli?

Eric: Ee. Fhedzi musi ndi tshi ya gudedzini, ndo litsha zwa vhurereli.

Brian: Ndi khou ni pfa. No gudela mini gudedzini?

Eric: Nguda-zwa-vhathu na ḓivhazwakale. Ndi kale ndi tshi funa ḓivhazwakale, ḓivhazwakale ya vhathu.

Brian: Ḓivhazwakale i a takadza. Samusi ni tshi zwi ḓivha, Bivhili ndi bugu ya ḓivhazwakale. Naa no vhuya na ita ṱhoḓisiso nga ha Bivhili?

Eric: Hai. Ndi a zwi ḓivha uri Bivhili ndi bugu yavhuḓi, fhedzi a thi athu u vhuya nda i dzhia sa bugu ya ḓivhazwakale.

Brian: Ni vhonala ni muthu ane a vha na muhumbulo wo tshaho. Arali ni na mimunithi i si gathi, ndi nga takalela u ni sumbedza tsumbo dzi si gathi dzi sumbedzaho ḓivhazwakale yo teaho i wanalaho Bivhilini.

Eric: Zwo luga. Fhedzi a thi na Bivhili.

Brian: A hu na thaidzo. Ndi nga ni sumbedza kha yanga. Tsumbo ya u thoma i hafha kha Koronika ya U Thoma ndima ya 29, ndimana 26 na 27. Dzenedzo ndimana dzi ri: “Davida murwa wa Isai o vha e khosi ya ḽoṱhe ḽa Isiraele. Tshifhínga tshe a fhedza a tshi vhusa Isiraele ndi miṅwaha i ná mahumi maṋa; ngei Heburoni o fhedza miṅwaha miṱanu-na-mivhili, a fhedza i ná mahumi mararu na miraru é Yerusalema.”

Eric: Yeneyo ndi tsumbo ya ḓivhazwakale yo teaho nga nḓila-ḓe?

Brian: Hafhu vhaṅwe vhasasaladzi vho amba uri Khosi Davida ho ngo vhuya a tshila.

Eric: Zwa vhukuma? Ndi ngani vho vha vha tshi amba uri ho ngo vhuya a tshila?

Brian: Ho vha hu si na vhuṱanzi vhunzhi nga nnḓa ha vhu re hone Bivhilini ha uri o vha e muthu wa vhukuma. Naho zwo ralo, nga 1993 tshigwada tsha vhagudi vha zwo fukulwaho mavuni tsho wana tombo ḽa kale vhukuma ḽe ḽa vha ḽi na ipfi ḽine ḽa ṱalutshedzelwa nga uri “Nnḓu ya Davida.”

Eric: Hee vhanna!

Brian: Muṅwe muthu ane a vha Bivhilini we ha timatimiwa nga ha u vha hone hawe ndi Pontio Pilato, muvhusi we a vhusa misini ya Yesu. O bulwa na vhaṅwe vhavhusi vhanzhi vha muvhuso vha tshenetsho tshifhinga, hafha kha Luka ndima ya vhuraru, ndimana ya u thoma.

Eric: Ee, ndi khou zwi pfesesa. I ri: “Musi Pontio Pilato e muvhusi wa Yudea, Herode e muvhusi wa tshiṱiriki wa Galilea.”

 Brian: Ndi zwezwo. Lwa miṅwaha minzhi, vhagudi vho vha vha tshi timatima arali Pontio Pilato o vha e muthu wa vhukuma. Nga zwenezwo, miṅwahani i ṱoḓaho u vha 50 yo fhiraho, ha waniwa tombo ḽo ṅwalwaho dzina ḽawe ngei Vhubvaḓuvha-kati.

Eric: Hmm. Ndo vha ndi sa athu u vhuya nda pfa eneo mafhungo.

Brian: Ndi takalela uri ndo wana tshibuli tsha u ni vhudza nga hao.

Eric: U tou ni vhudza ngoho, ndi kale ndi tshi ṱhonifha Bivhili nahone ndi tshi i dzhia sa bugu yo ṅwalwaho zwavhuḓi, fhedzi a thi athu u vhuya nda humbula uri i a tshimbidzana na tshifhinga tshashu. I nga vha i na ḓivhazwakale yo teaho, fhedzi a thi vhoni i tshi shuma musalauno.

Brian: Vhathu vhanzhi vha nga tendelana na zwenezwo. Fhedzi a thi tendelani nazwo. Ndi nga nṱhani ha uri zwishaiwa zwashu zwa ndeme a zwo ngo shanduka u bva mathomoni. Sa tsumbo, ri tea u ḽa zwiḽiwa, u ambara zwiambaro na fhethu hune ra ḓo dzula hone. Ri ṱoḓa u davhidzana na vhaṅwe na u vha na muṱa wo takalaho. Naa a si ngoho uri roṱhe ri a dzhiela nṱha zwenezwo zwithu?

Eric: Ndi zwa vhukuma.

Brian: Bivhili i nga ri thusa kha eneo masia oṱhe. Ndi bugu ya kale, fhedzi i a shuma musalauno.

Eric: Ni khou ṱoḓa uri mini ni tshi ralo?

Brian: Ndi ḓo zwi vhea nga heyi nḓila: Bivhili i na maitele a ndeme ane a shuma ṋamusi u fana na tshifhingani tsha musi a tshi ṅwalwa maḓanani a miṅwaha o fhiraho.

Eric: Ndi khou ni pfa. Kha masia afhio?

Brian: Maitele a Bivhili a nga ri livhisa musi zwi tshi ḓa kha zwithu zwi ngaho u linganyisela kha zwa dzitshelede, u vha na muṱa wo takalaho kana na u vha khonani yavhuḓi. Heyi bugu i fana na mapa une wa ri livhisa. Sa tsumbo, naa ni nga si tendelane na nṋe uri zwi a konḓa u vha munna na ṱhoho ya muṱa i bvelelaho ano maḓuvha?

Eric: Ndi ngoho, ndi a tendelana na inwi kha zwenezwo. Nṋe na mufumakadzi wanga ri na ṅwaha ro vhingana, nahone nga zwiṅwe zwifhinga a ri tendelani.

Brian: Khezwo. Fhedzi Bivhili i na maitele o leluwaho ane a shuma. Ṱhogomelani mbuno i re kha Vhaefesa ndima ya 5. Kha ri vhale ndimana 22, 23 na 28. Arali ni tshi zwi takalela, ndi khou humbela uri ni vhale dzenedzi ndimana.

Eric: Zwo luga. I ri: “Vhafumakadzi nga vha ḓiṱukufhadzele vhanna vhavho vhunga vha tshi ḓiṱukufhadzela Murena, ngauri munna ndi ṱhoho ya mufumakadzi wawe samusi Kristo e ṱhoho ya tshivhidzo, ndi ene ane a vha mutshidzi wa muvhili wonoyo.” Ndimana ya 28 i ri: “Nga yeneyi nḓila vhanna vha fanela u funa vhasadzi vhavho u fana na nḓila ine vha funa ngayo mivhili yavho. Ane a funa musadzi wawe u a ḓifuna ene muṋe.”

Brian: Ndo livhuha. Naa a si ngoho uri arali vhafarisi vha lingedza u shumisa yeneyo nyeletshedzo yo leluwaho, vhutshilo muṱani vhu nga vha havhuḓi?

Eric: Ee, ndi humbula nga u ralo. Zwo leluwa u zwi amba, fhedzi zwi a konḓa u zwi ita.

Brian: Ndi ngoho; a hu na muthu o fhelelaho. Zwi re zwone ndi uri kha yeneyi ndima ya Bivhili hu na ndimana ine ya ri ṱuṱuwedza uri ri kone u pfesesa. * Mufarisi muṅwe na muṅwe u fanela u linganyisela na u pfesesa. Nṋe na mufumakadzi wanga ro wana uri Bivhili i nga ri thusa u ita zwenezwo.

Eric: Zwi a pfala.

Brian: Ṱhanzi dza Yehova dzi na Web site ine ya vha na mafhungo avhuḓi nga ha mbingano na vhutshilo ha muṱa. Arali ni na mimunithi i si gathi, ndi nga ni sumbedza zwiṅwe zwa zwenezwi.

Eric: Zwo luga. Ndi nayo mimunithi i si gathi.

Brian: Ndi zwavhuḓi. Ḓiresi ya Web site ndi www.pr418.com. Siaṱari ḽa u thoma ḽi nga heyi nḓila.

Eric: Zwinepe ndi zwavhuḓi.

Brian: Hezwi ndi zwine ra zwi ita vhuḓinḓani shangoni ḽoṱhe. Vhonani hafha. Heyi thero i na tshiṱoho  tshine tsha ri “Help for Couples and Parents.” Nga fhasi ha tshenetsho tshiṱoho hu na thero pfufhi dzo fhamba-fhambanaho. Naa hu na ine ya ni takadza?

Eric: Ee. Heyi ine ya ri: “Solving Problems in Your Marriage.” Ndi vhona u nga ndi nga shumisa zwenezwo!

Brian: Yeneyi thero i ṱalutshedza nḓila nṋa dza u piringulula honoho vhuleme. Ṱhogomelani yeneyi phara. Eric, naa ni nga takalela u i vhala?

Eric: Ee. I ri: “If communication is the lifeblood of a marriage, then love and respect are the heart and lungs of the relationship.” Ndi takalela nḓila ine vha zwi ṱalutshedza ngayo.

Brian: Ndo livhuha nḓila ye na vhala ngayo. Hu na luṅwalo lwa Bivhili lwo redzwaho. Ni nga lu puṱedza nahone na lu vhala.

Eric: Ndi khou lu vhona. Vhaefesa 5:33. Lu ri: “Muṅwe na muṅwe waṋu a fune musadzi wawe samusi a tshi ḓifuna; kha ḽiṅwe sia, musadzi u fanela u ṱhonifha munna wawe nga ho dzikaho.”

Brian: Naa no zwi ṱhogomela uri hu khou ombedzelwa nga ha u ṋea zwine muṅwe a lavhelela u zwi wana?

Eric: A thi khou pfesesa uri ni khou ṱoḓa uri mini.

Brian: Naa a si ngoho uri munna u ṱoḓa u ḓipfa a tshi ṱhonifhiwa nga mufumakadzi wawe, nahone ngeno mufumakadzi a tshi ṱoḓa u vha na vhungoho ha uri munna wawe u a mu funa zwa vhukuma?

Eric: Ee. Ndi tendelana nazwo.

Brian: Arali munna a anzela u lingedza u sumbedza uri u funa mufumakadzi wawe, naa zwi nga si lelutshele mufumakadzi wawe uri a mu ṱhonifhe?

Eric: Zwi vhonala zwi tshi nga shuma.

Brian: Nga zwenezwo, yeneyi ndima nthihi i re Bivhilini yo ṅwalwaho miṅwahani i ṱoḓaho u vha 2 000 yo fhiraho, i amba nga ha ṱhoḓea dza vhafarisi vha mbingano nahone i a shuma vhukuma arali ya tevhelwa. Na u dovholola tsumbo ye ra vhala nga hayo ya malugana na “heart and lungs” ya uri mbingano i ḓo dzula yo khwaṱha.

Eric: Ndi a tenda uri hu na zwinzhi zwe nda vha ndi sa zwi ḓivhi nga ha Bivhili.

Brian: Eric, ndi takalela u pfa zwenezwo. Ndi nga takalela u dovha nda ṱangana na inwi henefha nahone nda pfa mavhonele aṋu nga ha tshiṱohwana tshine tsha ri: “Four Steps to Solving Problems” tshine tsha wanala kha yeneyi thero kha Web site. *

Eric: Zwo luga. Nṋe na mufumakadzi wanga ri ḓo i vhala.