Edzani u humbula nḓila ine muvhuso wa shango ḽoṱhe wa nga vhuyedza ngayo vhathu. Ṋamusi vhathu vhanzhi vha a shengela ngauri vha a shaya vhukuma, ngeno vhaṅwe vho pfuma vhukuma. Fhedzi muvhuso wa shango ḽoṱhe une wa pfesesa ṱhoḓea dza vhathu u nga ita vhungoho ha uri vhathu vhoṱhe vha na zwine vha zwi ṱoḓa. Naa ni humbula uri vhathu vha nga vhumba muvhuso wo raloho?—Vhalani Yeremia 10:23.

Kha ḓivhazwakale yoṱhe, mivhuso yo kundelwa nga nḓila nnzhi u ṱhogomela vhavhusiwa vhayo, zwihuluhulu vhashai. Miṅwe mivhuso i na tshiṱuhu. (Muhuweleli 4:1; 8:9) Fhedzi Mudzimu Ramaanḓaoṱhe o fulufhedzisa u ḓisa muvhuso une wa ḓo dzhiela yoṱhe vhudzulo. Muvhusi wawo u ḓo ṱhogomela vhathu zwa vhukuma.—Vhalani Yesaya 11:4; Daniele 2:44.

Yehova Mudzimu o nanga Muvhusi wa shango a faneleaho—Murwa wawe, Yesu. (Luka 1:31-33) Musi Yesu e kha ḽifhasi, o vha a tshi takalela u thusa vhathu. Sa Khosi, u ḓo ita uri vhathu vha tshaka dzoṱhe vha vhe na vhuthihi nahone a vhofholola vhathu kha tshengelo yoṱhe.—Vhalani Psalme ya 72:8, 12-14.

Naa muṅwe na muṅwe u ṱanganedza Yesu sa Muvhusi? Hai. Fhedzi Yehova ha fheli mbilu. (2 Petro 3:9) U khou ṋea vhathu tshibuli tsha uri vha ṱanganedze Yesu sa Muvhusi. Hu si kale, Yesu u ḓo fhelisa vhathu vhavhi kha ḽifhasi nahone a ita uri hu vhe na mulalo na tsireledzo shangoni ḽoṱhe.—Vhalani Mixa 4:3, 4.