“Huno Mudzimu a dzhia muthu a mu vhea tsimuni ya Edeni uri a i lime a i linde. Yehova Mudzimu a laya muthu a ri: Miri yoṱhe ya tsimu i ḽe zwau, Hone uḽa muri wa u ṱalukanya vhuḓi na vhuvhi U sóngo u ḽa; ngauri ḓuvha ḽine wa ḓo ḽa wonoyo, U ḓo vha wa u fa.”—Genesi 2:15-17.

Mudzimu o vhea muthu wa u thoma Adamu tsimuni ya Edeni, paradisoni ya kha ḽifhasi yo ḓalaho zwipuka zwa ḓaka na zwimela zwavhuḓi. Ho vha hu na miri ya mitshelo ye Adamu a vha a tshi nga i ḽa o vhofholowa. Naho zwo ralo, Yehova Mudzimu o vhudza Adamu uri a si ḽe muṅwe muri nahone a mu tsivhudza uri arali a ḽa u ḓo fa.

Naa Adamu o pfesesa yeneyo tsevho? O vha a tshi ḓivha uri lufu ndi mini; o vha o vhona zwipuka zwi tshi fa. Arali Adamu o vha o sikwa uri mafheleloni a fe, tsevho ya Mudzimu yo vha i sa ḓo vha ya ndeme. Nṱhani hazwo, Adamu o ṱhogomela uri arali a thetshelesa Mudzimu nahone a sa ḽe kha wonoyo muri u ḓo tshila tshoṱhe—a nga si fe.

Vhaṅwe vha tenda uri muri u fanyisela zwa vhudzekani, fhedzi zwenezwo a si ngoho. Nṱhani hazwo, Yehova o vha a tshi ṱoḓa Adamu na mufumakadzi wawe Eva uri vha ‘bebe vha ande’ nahone ‘vha ḓadze shango, vha ḽi kunde.’ (Genesi 1:28) Tsevho yo vha i tshi ambela kha muri wa vhukuma. Yehova o vha a tshi u vhidza “muri wa u ṱalukanya vhuḓi na vhuvhi” ngauri wo vha u tshi fanyisela ndugelo yawe ya u khetha zwo lugaho na zwi songo lugaho kha vhathu. Nga u sa ḽa mutshelo wa muri, Adamu o vha a tshi ḓo vha a songo sokou u sumbedza u thetshelesa, fhedzi o vha a tshi ḓo dovha a sumbedza u dzhiela nṱha we a mu sika na we a mu fhaṱutshedza zwihulu.

‘Mudzimu a amba na Adamu a ri: Ngauri wa ḽa muri we nda U dzivhisa nda ri: U songo u ḽa. Vhuswa U ḓo vhu ḽa nga biko ḽa tshifhaṱuwo tshau, u swika U tshi ḓo vhuyelela mavuni; ngauri wo bviswa mavuni; U buse; tshau ndi u vhuyelela buseni.’—Genesi 3:17, 19.

Adamu o ḽa kha muri we a dzivhiswa wone. Honoho u sa thetshelesa ho vha hu si matamba vhana. Ho vha hu vhushandukwa, u sa thetshelesa nga khole zwoṱhe zwe Yehova a mu itela zwone. Nga u ḽa wonoyo mutshelo, Adamu o landula Yehova, a khetha u ḓilanga, zwe zwa ita uri hu vhe na masiandoitwa a si avhuḓi.

Sa zwe Yehova a dzula o amba, mafheleloni Adamu o fa. Mudzimu o vhumba Adamu nga “buse ḽa mavuni” nahone a mu vhudza uri u ḓo “vhuyelela mavuni.” Adamu ho ngo tshila nga iṅwe nḓila kana huṅwe fhethu. Musi a tshi fa, ho ngo tsha tshila u fana na buse ḽe a bva khaḽo.—Genesi 2:7; Muhuweleli 9:5, 10.

“Tshivhi tsho dzhena shangoni nga muthu muthihi nahone tshivhi tsha ḓisa lufu, lufu lwa ṱanganya vhathu vhoṱhe, ngauri vhoṱhe vho tshinya.”—Vharoma 5:12.

U sa thetshelesa ha Adamu—kana tshivhi—a zwo ngo kwama ene muṋe fhedzi. Nga u ita tshivhi, Adamu ho ngo xelelwa fhedzi nga vhutshilo ho ḓoweleaho ha miṅwaha ya 70 kana 80, fhedzi o xelelwa na nga tshilavhelelwa tsha u tshila tshoṱhe. Zwiṅwe hafhu, musi Adamu a tshi ita tshivhi, ho ngo tsha fhelela nahone zwenezwo zwo ita uri a fhirisele u sa fhelela kha vhana vhawe vhoṱhe.

Roṱhe ri vhaḓuhulu vha Adamu. Nga nṱhani ha u sa ḓikhethela, ro mamela u sa fhelela khae, zwine zwa ita uri ri sendamele kha tshivhi nahone mafheleloni ri a fa. Paulo o ṱalutshedza vhuimo hashu zwavhuḓi. O ṅwala a ri: “Nṋe ndi muthu wa ṋama o rengwaho nga tshivhi. Ngoho nṋe ndi tou vha muthu a ṱungufhadzaho lungafhani! Ndi nnyi ane a ḓo mponyokisa kha wonoyu muvhili une wa ita uri ndi fe?” Nga zwenezwo, Paulo a fhindula mbudziso yawe, a ri: “Ndi livhuha Mudzimu nge a shumisa Yesu Kristo Murena washu!”—Vharoma 7:14, 24, 25.

“Khotsi o ruma Murwa wawe sa Mutshidzi wa shango.”—1 Yohane 4:14.

 Yehova Mudzimu o ita nzudzanyo dza u kunda mvelelo dza tshivhi na u ri tshidza kha lufu u ya nga hu sa fheli. Nga nḓila-ḓe? O ruma Murwa wawe a funwaho a tshi bva ṱaḓulu uri a bebwe sa muthu o fhelelaho u fana na Adamu. Fhedzi u fhambana na Adamu, Yesu “ho ngo ita tshivhi.” (1 Petro 2:22) Ngauri o vha o fhelela, o vha a sa ḓo fa nahone o vha a tshi ḓo tshila tshoṱhe sa muthu o fhelelaho.

Nṱhani hazwo, Yehova o tendela uri Yesu a vhulahwe nga maswina awe. Nga murahu ha maḓuvha mararu, Yehova o mu vusela kha vhutshilo ha muya u itela uri nga u ya ha tshifhinga a humele ṱaḓulu. Musi e henefho, Yesu o ṋea Mudzimu vhutshilo hawe ha ndeme ho fhelelaho u itela u rengulula zwe Adamu a xelelwa ngazwo na vhana vhawe. Yehova o ṱanganedza honoho u ḓiṋekedzela nahone a ita uri zwi konadzee kha vhane vha tenda kha Yesu uri vha wane vhutshilo vhu sa fheli.—Vharoma 3:23, 24; 1 Yohane 2:2.

Yesu o rengulula zwe zwa xedzwa nga Adamu. O ri fela uri ri tshile nga hu sa fheli. Bivhili i ri: “Yesu . . . a tambula u swika a tshi fa, uri nga vhuthu vhuhulu ha Mudzimu, a fele vhoṱhe.”—Vhaheberu 2:9.

Yeneyi ndugiselelo i dzumbulula zwinzhi nga ha Yehova. Zwilinganyo zwa nṱha zwa khaṱulokwayo zwo ita uri zwi si konadzee uri vhathu vha songo fhelelaho vha kone u ḓirengulula vhone vhane. Naho zwo ralo, lufuno lwawe na khathutshelo zwo mu sudzulusela uri zwi tendelane na zwilinganyo zwawe nga thengo khulu—nga u ṋea Murwa wawe sa tshirengululi.—Vharoma 5:6-8.

“Kristo o vuswa vhafuni, ndi tshiranzhe tsha vho faho. Samusi lufu lwo vha hone nga muthu, na mvuwo ya vhafu yo vha hone nga muthu. Samusi roṱhe ri tshi fa nga mulandu wa Adamu, roṱhe ri ḓo vuswa nga nṱhani ha Kristo.”—1 Vhakorinta 15:20-22.

A zwi timatimisi uri Yesu o tshila nahone a fa, fhedzi hu na vhuṱanzi vhufhio ha uri o vuswa vhafuni? Kha vhuṅwe vhuṱanzi vhuhulwanesa, ndi ngoho uri Yesu o vuswaho o vhonala kha vhathu vhanzhi kha zwiitea zwo fhamba-fhambanaho na fhethu ho fhamba-fhambanaho. O vhuya a vhonala kha vhathu vha fhiraho 500. Muapostola Paulo o ṅwala nga ha zwenezwo kha vhurifhi hawe he a vhu ṅwalela Vhakorinta, o sumbedza uri dziṅwe ṱhanzi dzo vha dzi tshi kha ḓi tshila na uri vha nga ṱanziela zwe vha vhona na u zwi pfa.—1 Vhakorinta 15:3-8.

Zwa ndeme vhukuma, musi Paulo a tshi ṅwala uri Kristo o vha “tshiranzhe” tsha vhe vha vuswa, o vha a tshi khou sumbedza uri nga murahu na vhaṅwe vha ḓo vuswa-vho. Yesu nga dzawe o amba uri hu ḓo ḓa tshifhinga tshine “vhoṱhe vha re mavhiḓani” vha ḓo “bva.”—Yohane 5:28, 29.

“Mudzimu o funa shango zwihuluhulu a vhuya a kumedza Murwa wawe mubebwa e eṱhe, uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.”—Yohane 3:16.

 Masiaṱari a u thoma a Bivhili a ri vhudza nga ha tshifhinga tshee lufu lwa thoma na musi Paradiso i tshi xela. Masiaṱari a u fhedzisela a ri vhudza nga ha tshifhinga tshine ha ḓo fheliswa lufu nahone Mudzimu u ḓo vusulusa Paradiso kha ḽifhasi. Nga zwenezwo, vhathu vha ḓo tshila vho takala vhe na vhutshilo vhu vhuyedzaho nga hu sa fheli. Nzumbululo 21:4 i ri: “Lufu a lu tsha ḓo vha hone.” U itela u ombedzela vhungoho ha ḽeneḽo fulufhedziso, ndimana 5 i ri: “Haya maipfi ndi a fulufhedzeaho a dovha a vha a ngoho.” Zwine Yehova a zwi fulufhedzisa u a kona u zwi ita.

Naa ni a tenda uri “haya maipfi ndi a fulufhedzeaho a dovha a vha a ngoho”? Nga zwenezwo, gudani zwo engedzeaho kha Yesu Kristo nahone ni vhe na lutendo khae. Arali ni tshi ita nga u ralo ni ḓo ṱanganedzwa nga Yehova. A ni nga ḓo tshenzhela fhedzi phaṱhutshedzo khulwane zwino, fhedzi ni ḓo wana fulufhelo ḽa u tshila nga hu sa fheli Paradisoni ya kha ḽifhasi, hune “lufu a lu tsha ḓo vha hone, na u ṱungufhala na u lila na vhuṱungu a zwi tsha ḓo vha hone.”