Mbudziso Dza Bivhili Dzo Fhindulwa
Ḓuvha ḽa Khaṱhulo ndi mini?
Zwifhingani zwa Bivhili, Mudzimu o vha a tshi shumisa vhahaṱuli u itela u tshidza vhathu vhawe uri vha si farwe luvhi. (Vhahaṱuli 2:18) Bivhili i ṱalusa Ḓuvha ḽa Khaṱhulo ḽa tshifhingani tshi ḓaho sa tshifhinga tshi takadzaho musi Yehova Muhaṱuli wa shango ḽoṱhe, a tshi ḓo tshidza vhathu kha u farwa luvhi.—Vhalani Psalme ya 96:12, 13; Yesaya 26:9.
Mudzimu o vhea Yesu uri a haṱule vha tshilaho na vho faho. (Mishumo 10:42; 17:31) Vhathu vhanzhi vho fa vha sa ḓivhi Mudzimu. Tshifhingani tsha Ḓuvha ḽa Khaṱhulo, Yesu u ḓo vusa vhathu vho raloho uri vha ḓivhe na u funa Mudzimu wa ngoho.—Vhalani Mishumo 24:15.
Ndi ngani Ḓuvha ḽa Khaṱhulo ḽi tshi ḓo fhedza miṅwaha ya tshigidi?
Vhafu vha ḓo vuswa tshifhingani tsha miṅwaha ya tshigidi. (Nzumbululo 20:4, 12) Vha ḓo ṱoḓa tshifhinga tsha u guda nḓila dza Mudzimu na u mu thetshelesa. U fhambana na mavhonele a ḓoweleaho, Bivhili i sumbedza uri vhathu vha ḓo haṱulwa kha mutheo wa zwine vha zwi ita nga murahu ha mvuwo yavho.—Vhalani Vharoma 6:7.
Bivhili i dovha ya amba nga ha ḓuvha ḽa khaṱhulo ḽine ḽa ḓo vha hone nga u ṱavhanya musi miṅwaha ya tshigidi i sa athu u thoma. Ḽeneḽo ḓuvha ḽi dovha ḽa vhidzwa vhufhelo, samusi zwo haseledzwa kha thero i re kha gwati ya ino khandiso. Nga ḽeneḽo ḓuvha, Mudzimu u ḓo fhelisa vhathu vhoṱhe vhavhi na vha sa ofhi Mudzimu. (2 Petro 3:7) Nga zwenezwo, ri fanela u ita vhungoho ha u sumbedza uri ri funa Mudzimu.—Vhalani 2 Petro 3:9, 13.