Ndo alutshela ḓoroboni ya Montreal hune vhuimo ha ikonomi ha si vhe havhuḓi. Khotsi anga vho fa musi ndi na miṅwedzi ya rathi, zwenezwo zwo ita uri mme anga vha sale vhe na vhuḓifhinduleli hoṱhe muṱani. Ndo vha ndi lupedzi kha vhana vha malo muṱani wa hashu.

Musi ndi tshi khou aluwa, vhutshilo hanga ha ḓuvha ḽiṅwe na ḽiṅwe ho vha vhu tshi katela u shumisa zwidzidzivhadzi, u gembula, vhuvemu na u konana na mavemu. Musi ndi na miṅwaha ya fumi, ndo thoma u rumiwa nga vhathu vhane vha rengisa mivhili na vhomatshonise. Ndo vha ndi tshi zwifha tshifhinga tshoṱhe nahone ndi tshi takalela u shumisa vhathu nga nḓila naho i ifhio ine nda nga kona u vha fhura. Zwo vha zwo no vha nzulele kha nṋe.

Musi ndi na miṅwaha ya 14, ndo vha ndi makone kha u fhura vhathu. Sa tsumbo, ndo vha ndi tshi renga watshi nnzhi dza musuku, mabengele na rinngi, nda zwi swaya sa 14-carat dza musuku dzine dza vha na tshiṱemmbe nahone nda dzi rengisa tshiṱaraṱani na fhethu hune ha pakwa hone dzigoloi mavhengeleni manzhi. Ndo vha ndi tshi takadzwa nga u wana tshelede nga hu leluwaho. Nga tshiṅwe tshifhinga, ndo bindula $10 000 nga ḓuvha ḽithihi!

Musi ndi na miṅwaha ya 15, ndo pandelwa tshikoloni tsha dzikhundavhalai, nda sala ndi si na vhudzulo. Ndo vha ndi tshi eḓela zwiṱaraṱani, dziphakhani kana mahayani a khonani dzanga.

Mapholisa o vha a tshi dzula a tshi mbudzisa nga ha mishumo yanga ya vhufhura. Samusi ndo vha ndi sa khou rengisa zwithu zwo tswiwaho, a tho ngo vhuya nda iswa dzhele. Naho zwo ralo, ndo lifhiswa tshelede nnzhi nga nṱhani ha vhufhura, tswayo dzi si dza vhukuma na u rengisa ndi si na thendelo. Ndo vha ndi tshi kuvhanganya tshelede dza vhomatshonise ndi sa ofhi muthu. Zwenezwo zwo vha zwi khombo vhukuma nahone nga zwiṅwe zwifhinga ndo vha ndi tshi fara tshigidi. Kha tshiṅwe tshiitea, ndo shuma na mavemu o dzudzanywaho.

Ndo thoma u pfa nga ha Bivhili ndi na miṅwaha ya 17. Ndo vha ndi tshi dzula na musidzana we nda vha ndi tshi funana nae musi a tshi  thoma u guda Bivhili na Ṱhanzi dza Yehova. Naho zwo ralo, ndo landula ndaela ya Bivhili ya matshilele avhuḓi, nga zwenezwo, ndo mu ṱutshela nahone nda ya u dzula na muṅwe musidzana we nda vha ndi tshi funana nae.

Vhuimo ho mbo ḓi thoma u shanduka musi musidzana wa vhuvhili we nda vha tshi funana nae a tshi thoma u guda na Dziṱhanzi! O ita tshanduko vhutshiloni hawe nahone ndo takadzwa nga uri o vha a tshi vho thoma u dzika nahone a sa fheli mbilu. Ndo ṱanganedza thambo ya u ya miṱanganoni Holoni ya Muvhuso ya Ṱhanzi dza Yehova. Ndo ṱanganedzwa nga vhathu vha ṱhonifheaho na vha re na vhuthu. Ho vha ho fhambana vhukuma na shango ḽine nda ḽi ḓivha! A tho ngo vhuya nda pfa u nga muṱa wanga u a nṱoḓa; ndo pfa ndi sa funwi na u sa sumbedzwa vhuthu u bva vhuṱukuni. Lufuno lwe nda lu tshenzhela kha Ṱhanzi dza Yehova lwo vha lu lwone-lwone lune nda lu tama. Musi Ṱhanzi dzi tshi humbela u guda na nṋe Bivhili, ndo tenda ndo takala.

Zwe nda vha ndi tshi khou zwi guda Bivhilini zwi nga vha zwo tshidza vhutshilo hanga. Ndo vha ndi tshi khou dzudzanya u tswa na vhashumisani na nṋe vhavhili u itela u lifha zwikolodo zwanga zwa u gembula, zwe zwa vha zwi tshi lingana tshelede i fhiraho $50 000. Fhedzi ndo takala vhukuma uri ndo ḓibvisa khazwo! Vhe nda vha ndi tshi shumisana navho vho bvela phanḓa na u tswa. Muṅwe wavho o farwa nahone vhaṅwe o vhulahwa.

Musi ndi tshi khou bvela phanḓa na u guda Bivhili, ndo ṱhogomela uri ndi fanela u ita tshanduko nnzhi. Sa tsumbo, ndo guda zwine Bivhili ya zwi amba kha 1 Vhakorinta 6:10 ine ya ri: “Dzimbava, vhadzia-vhupangwa, zwidakwa, vhane vha semana, mavemu a vha nga ḽi ifa ḽa Muvhuso wa Mudzimu.” Musi ndi tshi vhala yeneyo ndimana, vhuimo hanga vhu konḓaho ho ita uri ndi lile. Ndo ṱhogomela uri ndi fanela u shandula tshoṱhe matshilele anga. (Vharoma 12:2) Ndo vha ndi tshi vusa dzikhakhathi nahone ndi tshi dzula ndi tshi zwifha.

Naho zwo ralo, ndo dovha nda guda Bivhilini uri Yehova u na khathutshelo nahone u a hangwela. (Yesaya 1:18) Ndo rabela vhukuma, nda humbela Yehova uri a nthuse u litsha matshilele anga a kale. Nga thuso yawe, ndo kona u shandula vhumuthu hanga nga zwiṱuku nga zwiṱuku. Vhukando vhuhulwane he nda vhu dzhia ndi ha musi nṋe na musidzana we nda vha tshi funana nae ri tshi vhingana nga lwa mulayo.

Ndo vhinga ndi na miṅwaha ya 24 nahone ndi na vhana vhararu. Ndo vha ndi tshi fanela u wana mushumo u re mulayoni. Naho zwo ralo, ndo vha ndi songo funzea nahone hu si na fhethu he nda vhuya nda shuma hone. Ndo dovha nda rabela vhukuma kha Yehova. Nga zwenezwo, ndo ya u ṱoḓa mushumo. Ndo vhudza vhatholi uri ndi ṱoḓa u shandula vhutshilo hanga na u ita mushumo wa ḓuvha nga u fulufhedzea. Nga zwiṅwe zwifhinga, ndo ṱalutshedza uri ndi khou guda Bivhili nahone ndi tama u vha mudzulapo wa khwine. Vhatholi vhanzhi vho hana u nthola. Mafheleloni, musi ndo no ṱalutshedza nga ha matshilele anga a kale kha iṅwe nyambedzano ya mushumo, mutholi o ri: “A thi ḓivhi uri ndi ngani, fhedzi hu na tshithu tshine tsha mmbudza uri ndi fanela u ni thola.” Ndi a tenda uri yeneyi yo vha i phindulo ya thabelo yanga. Nga u ya ha tshifhinga, nṋe na mufumakadzi wanga ro lovhedzwa sa Ṱhanzi dza Yehova.

Ṋamusi ndi khou tshila nga nṱhani ha u shumisa maitele a Bivhili na u tshila nga nḓila ine Mukriste a fanela u tshila ngayo. Ndi na muṱa wanga wavhuḓi. Ndi ḓiphina nga u vha na luvalo lwo kunaho ndi na vhungoho ha uri Yehova o nkhangwela.

Lwa miṅwaha ya 14 yo fhiraho, ndo shuma vhuḓinḓani ha tshifhinga tshoṱhe, ndi tshi thusa vhaṅwe u guda zwine Bivhili ya zwi funza nahone zwazwino, mufumakadzi wanga na ene o dzhenela vhuḓinḓa ha tshifhinga tshoṱhe. Lwa miṅwaha ya 30 yo fhiraho, ndo takalela u thusa vhashumisani na nṋe vha 22 uri vha thome u gwadamela Yehova. Ndi kha ḓi ya mavhengeleni—fhedzi hu si u fhura vhathu sa zwe nda vhuya nda zwi ita. Zwino ndi ṱoḓa u vha ṋea tshiṅwe tshithu: fulufhelo ḽa u tshila shangoni ḽiswa ḽa tshifhingani tshi ḓaho ḽine ḽa ḓo vha ḽi si na vhafhuri.—Psalme ya 37:10, 11.