THERO I RE KHA GWATI | NDI AFHIO MAVHONELE A MUDZIMU NGA HA NNDWA?
Mavhonele A Mudzimu Nga Ha Nndwa Ḓanani Ḽa U Thoma Ḽa Miṅwaha
Vhathu vho vha vha tshi khou tsikeledzwa. U fana na vhomakhulukuku vhavho, a zwi timatimisi uri Vhayuda vha ḓanani ḽa u thoma ḽa miṅwaha vho rabela lunzhi-lunzhi vha tshi ṱoḓa thuso kha Mudzimu, nga nṱhani ha uri vha ṱoḓa u vhofhololwa kha u tsikeledzwa nga Muvhuso wa Roma. Nga zwenezwo, vho pfa nga ha Yesu. Naa u ḓo sumbedza uri ndi ene Messia o dzulaho o ambiwa nga hae hu tshee nga phanḓa? A zwi mangadzi uri vhanzhi vho “fulufhela uri o vha e ene muthu we a vha a tshi fanela u vhofholola Isiraele” kha vhatsikeledzi vhavho vha Vharoma. (Luka 24:21) Fhedzi a vho ngo wana thuso. Nṱhani hazwo, nga 70 C.E., mmbi ya Vharoma yo ḓa ya lozwa Yerusalema na thembele yawo.
Ho itea mini? Ndi ngani Mudzimu a songo lwela Vhayuda, sa zwe a zwi ita tshifhingani tsho fhiraho? Kana ndi ngani a songo vha tendela vha tshi ḓilwela u itela u ḓivhofholola kha u tsikeledzwa? Naa mavhonele a Mudzimu nga ha nndwa o shanduka? Hai. Fhedzi hu na zwithu zwo shandukaho vhukuma kha Vhayuda. Vho landula Yesu Murwa wa Mudzimu sa Messia. (Mishumo 2:36) Nga zwenezwo, sa lushaka, vho xelelwa nga vhushaka havho ho khetheaho na Mudzimu.—Mateo 23:37, 38.
Lushaka lwa Vhayuda na Shango ḽalwo ḽo Fulufhedziswaho a lwo ngo tsha ḓiphina nga u tsireledzwa nga Mudzimu, nahone Mudzimu ho ngo tsha tendela kana u tsireledza Vhayuda musi vha tshi ya u lwa. Samusi Yesu o dzula o zwi amba, phaṱhutshedzo dzine dza ḓiswa nga u takalelwa nga Mudzimu dzo bviswa kha lushaka lwa Isiraele lwa ṋama dza iswa kha lushaka luswa lune lwa vha lushaka lwa muya, zwino Bivhili i lu vhidza “Isiraele wa Mudzimu.” (Vhagalata 6:16; Mateo 21:43) Tshivhidzo tsha Vhakriste vho ḓodzwaho nga muya tsho sumbedza u vha Isiraele wa Mudzimu wa muya. Ḓanani ḽa u thoma ḽa miṅwaha, vho vhudzwa nga ho livhaho uri: “Zwino ni vhathu vhawe.”—1 Petro 2:9, 10.
Samusi zwino Vhakriste vha ḓanani ḽa u thoma ḽa miṅwaha vhe “vhathu vha Mudzimu,” naa Mudzimu o vha lwela u itela u vha vhofholola kha u tsikeledzwa nga Vharoma? Kana naa o vha tendela vha tshi ḓilwela kha vhatsikeledzi vhavho? Hai, ho ngo vha tendela. Ndi ngani? Musi Mudzimu a tshi dzhia phetho ya uri hu ḓo vha na nndwa, ndi Mudzimu ane a dzhia phetho ya uri yeneyo nndwa i ḓo vha hone lini, samusi zwo sumbedzwa kha thero yo fhiraho. Mudzimu ho ngo lwela Vhakriste vha ḓanani ḽa u thoma ḽa miṅwaha, kana u vha tendela uri vha dzhenele nndwa dza shango. Zwi tou vha khagala uri ḓanani ḽa u thoma ḽa miṅwaha ho vha hu si tshifhinga tsha Mudzimu tsha u lwisana na vhuvhi na u tsikeledzwa.
Nga zwenezwo, u fana na vhashumeli vha Mudzimu vha tshifhingani tsha kale, vhenevho Vhakriste vha ḓanani ḽa u thoma ḽa miṅwaha vho vha vha tshi fanela u lindela tshifhinga tsha Mudzimu tsha u fhelisa vhuvhi na u tsikeledzwa tshi tshi swika. Nga tshenetsho tshifhinga, Mudzimu ho ngo vha tendela vha tshi ḓilwela kha maswina avho. Yesu Kristo o bvisela zwenezwi khagala kha pfunzo dzawe. Sa tsumbo, ho ngo vhudza vhatevheli vhawe uri vha ḓidzhenise kha dzinndwa, nṱhani hazwo, o vha vhudza uri: “Bvelani phanḓa ni tshi funa maswina aṋu, ni rabelele vhane vha ni tovhola.” (Mateo 5:44) Musi Yesu a tshi vhudza vhafunziwa vhawe uri hu ḓo vha na tshifhinga tshine Yerusalema ḽa ḓanani ḽa u thoma ḽa miṅwaha ḽa ḓo vutshelwa nga mmbi ya Vharoma, o vha vhudza uri vha songo lwa, fhedzi vha shavhe nahone vho ita nga u ralo.—Luka 21:20, 21.
Zwiṅwe hafhu, muapostola Paulo o ṅwala uri: “Ni songo ḓilifhedzela, . . . ngauri ho ṅwalwa u pfi: ‘Ndifhedzo ndi yanga; ndi ḓo lifhedza, Yehova u ralo.’” (Vharoma 12:19) Paulo o vha a tshi khou redza zwe Mudzimu a zwi amba maḓanani a miṅwaha o fhiraho samusi zwo ṅwalwa kha Levitiko 19:18 na Doiteronomio 32:35. Samusi zwo sumbedzwa kha thero yo fhiraho, nḓila ye Mudzimu a lifhedzela ngayo vhathu vhawe zwifhingani zwa kale ho vha hu u vha thusa u lwa na maswina avho. Nga zwenezwo, maipfi a Paulo a sumbedza uri mavhonele a Mudzimu nga ha nndwa ho ngo shanduka. Ḓanani ḽa u thoma ḽa miṅwaha, Mudzimu o vha a tshi kha ḓi dzhia nndwa sa nḓila yo teaho ya u lifhedzela vhashumeli vhawe na u fhelisa u tsikeledzwa na vhuvhi ho fhamba-fhambanaho. Naho zwo ralo, samusi zwo vha zwo ralo na tshifhingani tsho fhiraho, ndi Mudzimu ane a dzhia phetho ya uri yeneyo nndwa i ḓo vha hone lini, na uri ndi nnyi ane a fanela u ya nndwani.
Vhukuma, Mudzimu ho ngo tendela Vhakriste vha ḓanani ḽa u thoma ḽa miṅwaha vha tshi ya nndwani. Fhedzi hu pfi mini ṋamusi? Naa Mudzimu o tendela tshigwada tsha vhathu tshi tshi dzhenela nndwa ṋamusi? Kana naa zwino ndi tshifhinga tsha uri Mudzimu a dzhenelele nahone a lwele vhashumeli vhawe? Ndi afhio mavhonele a Mudzimu nga ha nndwa ṋamusi? Thero ya u fhedza ya wonoyu mutevhe i ḓo fhindula dzenedzo mbudziso.
