Nga dzi 19 dza May 2022, vhavhusi vha fhiraho 75 vho vhudza Security Council ya United Nations uri “COVID-19 yo ita uri hu vhe na ṱhahelelo ya zwiḽiwa, fhedzi zwazwino ṱhahelelo ya zwiḽiwa i khou ṋaṋa i tshi ya nga nṱhani ha nndwa i re hone Ukraine.” Magazini une wa vhidzwa The Economist wo amba uri “heḽi shango ḽo dzulaho ḽi na thaidzo nnzhi, ḽi ḓo dovha ḽa vha na vhathu vhanzhi vhane vha khou sika nga nḓala nga nṱhani ha heyi nndwa i re hone.” Bivhili yo dzula yo amba uri tshifhingani tshine ra khou tshila khatsho hu ḓo vha na ṱhahelelo ya zwiḽiwa, fhedzi yo dovha ya amba zwine zwa nga ri thusa u konḓelela.

•    Yesu o dzula o amba uri: “Lushaka lu ḓo lwa na luṅwe lushaka na muvhuso wa lwa na muṅwe muvhuso, ha vha na nḓala.”—Mateo 24:7.

•    Bugu ya Nzumbululo i amba nga ha vhaṋameli vhaṋa vha bere vha pfanyisedzo. Muṅwe wavho u fanyisela nndwa. Muṋameli wa bere ane a tevhela u fanyisela nḓala, tshenetshi ndi tshifhinga tshine zwiḽiwa zwa ḓo vha zwi zwiṱuku nahone zwi tshi ḓura nga maanḓa. “Nda vhona bere ntswu, o i ṋamelaho o vha o fara tshikalo. Nda pfa ipfi . . . ḽi tshi ri: ‘Khwathi ya goroi ndi dinari une wa vha muholo wa ḓuvha ḽithihi, khwathi tharu dza baḽi ndi dinari une na wone wa vha muholo wa ḓuvha ḽithihi.’”—Nzumbululo 6:5, 6, Bivhili ya Contemporary English Version.

 Zwe Bivhili ya zwi amba nga ha ṱhahelelo ya zwiḽiwa zwi khou itea zwino nga tshifhinga tshine Bivhili ya tshi vhidza ‘maḓuvha a vhufhelo.’ (2 Timotheo 3:1) U itela u guda zwo engedzeaho nga ha ‘maḓuvha a vhufhelo’ na nga ha vhaṋameli vhaṋa vha dzibere vho ambiwaho kha bugu ya Nzumbululo, ṱalelani vidio ine ya ri Vhuimo Ha Shango Ho Shanduka U Bva Nga 1914 nahone ni vhale thero ine ya ri “Vhaṋameli Vhaṋa Vha Dzibere—Ndi Vhonnyi?”

•    Bivhili i na nyeletshedzo dzine dza nga ri thusa u sedzana na vhuimo vhu konḓaho vhune ha katela ṱhahelelo ya zwiḽiwa kana u ḓura hazwo. Vhonani dziṅwe tsumbo kha thero ine ya ri “How to Live on Less.”

•    Bivhili i ri ṋea fhulufhelo ḽa uri zwithu zwi ḓo vhuya zwa luga. I fhulufhedzisa uri hu ḓo ḓa tshifhinga tshine ha “ḓo vha na mavhele manzhi kha ḽifhasi” nahone vhathu vhoṱhe vha vha na zwiḽiwa zwinzhi. (Phisalema 72:16) U itela u guda zwo engedzeaho nga ha zwine Bivhili ya fhulufhedzisa uri zwi ḓo itea tshifhingani tshi ḓaho na uri ndi ngani ni tshi nga i fhulufhela, vhalani thero ine ya ri “A Real Hope for a Better Tomorrow.”