U mona na shango ḽoṱhe, hu na vhathu vha ṱoḓaho u vha 70 miḽioni vha sa koni u pfa na u amba. Vha shumisa nyambo dza zwanḓa dzi fhiraho 200. Zwi ṱungufhadzaho ndi uri vhaṅwe vhathu a vha vha fari zwavhuḓi. Sa tsumbo:

•   Dzangano ḽa National Association of the Deaf (U.S.) ḽo ri: “Shangoni ḽoṱhe, pfanelo dza vhane vha sa koni u pfa na u amba dzi dzhielwa fhasi.”

•   Vha World Federation of the Deaf vhone vha ri: “Kha mashango o pfumaho, vhathu vha sa koni u pfa na u amba ndi vhone vhane vha tambula u fhira vhaṅwe vhathu vhoṱhe. Ndi ngazwo zwi tshi vha konḓela u wana pfunzo yo teaho na mishumo.”

 Mudzimu u dzhia hani vhathu vha sa koni u pfa na u amba? Bivhili i ri mini nga hazwo? Nahone Ṱhanzi Dza Yehova vha khou vha thusa hani?

Mudzimu U Dzhia Hani Vhathu Vha Sa Koni U Pfa Na U Amba?

 Bivhili i amba uri Yehova a Mudzimu u na ndavha navho. U ṱoḓa vha tshi fariwa zwavhuḓi na u vhuyelwa nga pfunzo ine a ri ṋea yone.

 Luṅwalo: “U songo sema muthu o dzingaho nḓevhe.”—Levitiko 19:14.

 Luṅwalo: “Mudzimu ha ṱaluli.”—Mishumo 10:34.

 Luṅwalo: “Yesu a fara lwendo . . . , [a] huwelela mafhungo maḓifha a Muvhuso.”—Mateo 9:35.

 Luṅwalo: Yesu o dovha a ita uri vho “dzingaho nḓevhe vha pfe, vha sa koni u amba vha ambe.”—Marko 7:37.

 Luṅwalo: “Ndi hone hu tshi ḓo thivhululwa nḓevhe dza vho dzingaho.”—Yesaya 35:5.

 Zwine zwa amba zwone: Yehova o dzula o amba uri vha sa koni u pfa na u amba vha ḓo fhola.—Yesaya 29:18.

Nḓila Ine Ṱhanzi Dza Yehova Vha Thusa Ngayo Vha Sa Koni U Pfa Na U Amba

 Sa Ṱhanzi Dza Yehova ri vhudza vhathu vha sa koni u pfa na u amba mulaedza u ṋeaho fhulufhelo shangoni ḽoṱhe. Ri zwi itisa hani? Ri ṱalutshedzela Bivhili na vidio dzo thewaho Bivhilini nga nyambo dza zwanḓa dzi fhiraho 100. Ri gudisa vhathu Bivhili nga luambo lwa zwanḓa, ra dovha ra vha na zwivhidzo zwine khazwo ha shumiswa luambo lwa zwanḓa. Ri ita zwenezwi zwithu zwoṱhe ri sa badelisi vhathu vhane vha ṱoḓa thuso ya Mudzimu. Ndi ngani? Ngauri Yesu o amba uri: “No ṋewa mahala, ṋeani nga mahala.”—Mateo 10:8.

 Ni nga wana zwenezwi zwithu zwoṱhe kha inthanethe kana na zwi downlouda. Ni nga ita zwi tevhelaho:

 Ni nga dzhena kha JW.ORG na puṱedza kubogisi kune na ḓo ku wana henefho nṱha ku re na maḽeḓere u itela u wana luambo lwa zwanḓa lune na lu ṱoḓa.

 Ni nga downlouda app ya JW Library Sign Language ya mahala. Kha yeneyo app ni ḓo kona u downlouda dzividio kana u dzi ṱalela henefho.

Ndi Zwifhio Zwithu Zwine Ra Vha Nazwo?

 Bivhili nga luambo lwa zwanḓa. Bivhili ya Ṱhalutshedzelo Ya Shango Ḽiswa Ya Maṅwalo Makhethwa ya luambo lwa zwanḓa lwa Amerika, yo vha yone ya u thoma u bviswa yo fhelela nga luambo lwa zwanḓa. Ṅwaha muṅwe na muṅwe na dziṅwe nyambo dza zwanḓa dza kha maṅwe mashango dzi khou vha na Bivhili yo fhelelaho kana zwipiḓa zwayo zwa Ṱhalutshedzelo Ya Shango Ḽiswa. (U itela u vhona uri ndi nyambo dzifhio dza zwanḓa dzi re na Bivhili kana u ṱalela Bivhili nga luambo lwa zwanḓa, iyani kha bogisi “ Bivhili ya Ṱhalutshedzelo Ya Shango Ḽiswa ya luambo lwa zwanḓa.”)

•   U itela u ḓivha mushumo une ra u ita u itela u vha na Bivhili ya luambo lwa zwanḓa, ṱalelani vidio The Complete New World Translation Is Available in ASL.

•   Uri ni ḓiphiṋe nga u guda Bivhili, downloudani app ya JW Library Sign Language. Kha heyi app ni a kona u nanga vese ine na ṱoḓa u i ṱalela nga luambo lwa zwanḓa.

•   Vho Dmytro na Vho Vita ndi vhabebi vha sa koni u pfa na u amba, fhedzi vhana vhavho vha a kona u pfa na u amba. Vhonani uri muṱa wavho u vhuyelwa hani nga u ṱalela Bivhili nga luambo lwa zwanḓa ḓuvha na ḓuvha.

 Vidio dzine dza gudisa nga ha Bivhili. Ṱhanzi Dza Yehova dzo ita vidio dza luambo lwa zwanḓa dzine dza thusa vhathu u pfesesa na u shumisa zwine Bivhili ya zwi amba nga ha . . .

•   Vhavhingani na miṱa

•   Vhaswa

•   Vhana

 U guda Bivhili ni tshi khou thuswa nga muṅwe muthu. Gudani Bivhili nga luambo lwa zwanḓa ni tshi thuswa nga muṅwe ni sa dzhaisiwi nga muthu. Humbelani u dalelwa uri ni vhone uri yeneyi ngudo i fariwa hani.

 Vho Jeson Senajonon vha dzula Philippines. Sedzani uri u guda havho na Ṱhanzi Dza Yehova Bivhili zwo vha thusa hani uri vha vhe na vhushaka ha tsini na Mudzimu.

 Vho Mario Antúnez vho vha vhe mufunzi ngei Honduras. Vhonani uri vho wana hani phindulo Bivhilini dza mbudziso dzavho, kha zwe vha zwi amba kha thero “I Had More Questions Than Answers.”

 Zwivhidzo na zwiitea. Ri na zwivhidzo zwiṱuku na zwihulwane zwa luambo lwa zwanḓa shangoni ḽoṱhe. Henefho vhathu vha luambo lwa zwanḓa vha kuvhangana hone u itela u guda na u renda Mudzimu vhege iṅwe na iṅwe. Hu dovha ha vha na zwiitea zwihulwane zwine zwa vha hone ṅwaha muṅwe na muṅwe, hune vhathu vha guda zwinzhi nga ha Bivhili. Zwivhidzoni zwashu na kha zwiitea zwine ra vha nazwo, hu vha hu na muthu ane a nga thusa muthu ane a sa kone u pfa, u amba na u vhona uri a vhuyelwe. Ri dovha ra vha fha na bugu dza braille nga mahala.

•   Wanani tshivhidzo tsini na hune na dzula hone.

•   Ḓivhani nga ha mabuthano na maguvhangano ane ra vha nao ṅwaha muṅwe na muṅwe.

•   Ivhani hone musi ri tshi humbula lufu lwa Yesu, tshine tsha vha tshiitea tsha ndeme vhukuma kha ṅwaha.

 Vho José Luis Ayala vha dzula Mexico. Vho bebwa vha sa koni u pfa na u amba, nga murahu vha swinga na maṱo. Vhonani uri vho thuswa hani u vha mugudisi wa Bivhili a fhiseaho.