Nga Swondaha nga dzi 20 dza November 2022, muṱangano wa COP27 United Nations Climate Change wo mbo ḓi fhela. Vharangaphanḓa na vhaḓivhalea vhe vha vha vhe hone kha wonoyo muṱangano, vho tendelana uri vha ḓo kuvhanganya masheleni a u ṋea mashango a shayaho musi hu tshi vha na khombo dzi vhangwaho nga tshanduko dza mutsho (climate change). Fhedzi vhoṱhe vha a tenda uri zwenezwo zwi nga si ite uri dzenedzo khombo dzi si tsha vha hone.

•   Nga dzi 19 dza November 2022, secretary-general wa United Nations o amba uri: “Ndo takala nge ra tendelana uri ri ḓo vhetshela masheleni thungo a u thusa vho kwameaho nga khombo dzi vhangwaho nga mutsho. Fhedzi ri a zwi ḓivha uri hu si kale zwi nga si tsha thusa nga tshithu . . . Shango ḽoṱhe ḽi khou tou ṋaṋa u tshinyala, hu ḓo swika tshifhinga tshine ra sa tsha ḓo kona u thusa nga tshithu.”

•   Nga dzi 20 dza November 2022, Vho Mary Robinson vhane vha vha muphuresidennde wa kale wa Ireland na vhane vha vha UN High Commissioner wa Human Rights vho ri: “Hu si kale shangoni ḽoṱhe hu nga kha ḓi itea uri hu vhe na khombo dzi ofhisaho vhukuma dzine dza ḓo kwama muṅwe na muṅwe.”

 Vhaswa vha a vhilaela nga maanḓa nga ha vhumatshelo ha ḽino shango. Naa mivhuso i nga kona u shumisana u itela u lugisa vhuimo ha ḽino shango samusi vho fhulufhedzisa? Bivhili i ri mini nga hazwo?

 Bivhili i ri vhudza uri naho mivhuso i tshi nga kona u thusa fhaḽa na fhaḽa, i nga si kone u tandulula thaidzo dzine dza vhangwa nga u shanduka ha mutsho. Ṱhogomelani uri ndi ngani:

•   “Zwo kombamaho zwi nga si onyoloswe.”—Muhuweleli 1:15.

   Zwine zwa amba zwone: Mivhuso i nga si kone u ita zwoṱhe zwine ya ṱoḓa ngauri vhathu a vho ngo sikelwa u ḓivhusa. (Yeremia 10:23) Naho mivhuso ya shumisana, i nga si kone u tandulula thaidzo dza shango naho vha lingedza lungafhani.

•   “Ngauri vhathu vha ḓo funa vhone vhaṋe fhedzi, . . . a vha nga tendelani na vhaṅwe.”—2 Timotheo 3:2, 3.

   Zwine zwa amba zwone: Bivhili yo dzula yo amba uri kha tshino tshifhinga, vhathu vhanzhi vha ḓo humbulela vhone vhaṋe fhedzi nahone a vha nga ḓiimiseli u shumisana u itela u vhuyedza vhaṅwe.

 Vhumatshelo ha ḽino shango a ho ngo ḓitika nga zwine mivhuso ya ri fhulufhedzisa zwone. Mudzimu o ri ṋea Muvhusi ane ra nga mu fhulufhela ane a vha Yesu Kristo. Bivhili i amba hezwi nga hae:

•   “Muvhuso [u] kha shaḓa ḽawe. U ḓo pfi Mueletshedzi Wavhuḓi, Mudzimu wa Maanḓa, Khotsi wa Lini na Lini, Mukololo wa Mulalo.”—Yesaya 9:6, ṱhaluso i re magumoni a siaṱari.

 Yesu ndi Khosi ya Muvhuso wa Mudzimu kana muvhuso wa ṱaḓulu. (Mateo 6:10) U na maanḓa na vhuṱali nahone u ṱoḓa u ṱhogomela shango na vhadzulapo vhaḽo. (Phisalema 72:12, 16) Wonoyo muvhuso u ḓo “fhelisa vha tshinyadzaho ḽifhasi” na u ita uri ḽifhasi ḽi dovhe ḽi vhe ḽavhuḓi.—Nzumbululo 11:18; Yesaya 35:1, 7.

 U itela u guda zwinzhi nga zwine zwa nga tandulula thaidzo dzine dza vhangwa nga mutsho, vhalani thero “Climate Change and Our Future—What the Bible Says.”