Naa no no zwi ṱhogomela uri zwi vho konḓa u khethekanya zwine zwa vha ngoho na mazwifhi? Vhathu vha vho tenda zwithu zwi tshi ya nga nḓila ine vha ḓipfa na u humbula ngayo nṱhani ha u sedza vhuṱanzi na zwi re zwa ngoho. U mona na shango ḽoṱhe, vhathu vhanzhi a vha tendi uri hu na ngoho.

 Zwenezwo a si zwiswa. Miṅwahani i ṱoḓaho u vha 2 000 yo fhiraho, Muvhusi wa Roma Pontio Pilato o vhudzisa Yesu nga nḓila ya u mu hoya a ri: “Ngoho ndi mini?” (Yohane. 18:38) Naho Pilato a songo lindela Yesu a tshi fhindula, mbudziso yawe yo vha i ya ndeme. Bivhili i nga ni thusa u ḓivha zwi re zwa ngoho na zwi re mazwifhi kha ḽeneḽi shango ḽo ḓalaho vhathu vha sa ḓivhi ntswu na tshena musi zwi tshi ḓa kha enea mafhungo.

Naa ngoho i hone?

 Ee. Bivhili i shumisa ipfi “ngoho” musi i tshi ambela kha zwithu zwine zwa vha na vhuṱanzi na zwo lugaho. I amba uri Yehova a Mudzimu ndi ene Tshisima tsha ngoho, i mu vhidza uri ndi “Mudzimu wa ngoho.” (Phisalema 31:5) Bivhili i na ngoho i bvaho kha Mudzimu, i vhambedza yeneyo ngoho na tshedza ngauri i ri thusa uri ri si ḓaḓe u fana na vhaṅwe vhathu vha ḽino shango.—Phisalema 43:3; Yohane 17:17.

Ngoho ni nga i wana hani?

 Mudzimu ha ṱoḓi ri tshi ṱanganedza ngoho i bvaho Bivhilini ri songo thoma ra humbulisisa. Nṱhani hazwo, u ṱoḓa ri tshi i ṱolisisa ri tshi shumisa ṱhalukanyo yashu nṱhani ha u ḓitika nga maḓipfele ashu. (Vharoma 12:1) U ṱoḓa ri tshi mu ḓivha na u mu funa nga “ṱhalukanyo” yashu yoṱhe nahone u ri ṱuṱuwedza uri ri sedzuluse riṋe vhane uri zwine ra khou zwi guda Bivhilini ndi ngoho.—Mateo 22:37, 38; Mishumo 17:11.

U zwifha zwo thoma hani?

 Bivhili i amba uri u zwifha zwo thoma na Saṱhane Diabolo swina ḽa Mudzimu, ane Bivhili ya mu vhidza uri ndi “khotsi a vhane vha zwifha.” (Yohane 8:44) O amba mazwifhi nga ha Mudzimu kha vhathu vha u thoma. (Genesi 3:1-6, 13, 17-19; 5:5) U bva tsheetsho, Saṱhane o bvela phanḓa a tshi phaḓaladza mazwifhi na u dzumba ngoho nga ha Mudzimu.—Nzumbululo 12:9.

Ndi ngani u zwifha zwo ḓowelea nga maanḓa ṋamusi?

 Tshifhingani tshine ra khou tshila khatsho, tshine Bivhili ya ri ndi ‘maḓuvha a vhufhelo,’ Saṱhane u khou ṱuṱuwedza na u xedza vhathu u fhira naho hu lini. Vhathu vha anzela u amba mazwifhi u itela u fhura vhaṅwe. (2 Timotheo 3:1, 13) U zwifha zwo ḓowelea na kha vhurereli vhunzhi ṋamusi. Samusi Bivhili yo dzula yo zwi amba, ṋamusi vhathu “vha ṱoḓa vhafunzi vhane vha ḓo vha vhudza zwine zwa takadza nḓevhe dzavho,” vha “litsha u thetshelesa ngoho.”—2 Timotheo 4:3, 4.

Ndi ngani ngoho i ya ndeme?

 Ngoho i ita uri vhathu vha kone u fhulufhelana. Musi vhathu vha sa fhulufhelani, zwi ita uri vha si anḓane nahone vha si vhe na vhukonani. Bivhili i amba uri Mudzimu u ṱoḓa ri tshi mu gwadamela nga ngoho. I ri: “Vha mu rabelaho [Mudzimu] vha fanela u mu rabela u tendelana na muya na ngoho.” (Yohane 4:24) U itela u guda uri ngoho i re Bivhilini i nga ni thusa hani u ḓivha mazwifhi ane a ambiwa nga vhurereli na uri ni nga ita hani uri a si tsha ni langa, vhalani thero dzi re na tshiṱoho “Lies That Make God Seem Unlovable.”

Ndi ngani Mudzimu a tshi ṱoḓa ndi tshi ḓivha ngoho?

 Mudzimu u ṱoḓa uri ni wane vhutshilo ha tshoṱhe nahone ni tea u guda ngoho nga hae u itela u vhu wana. (1 Timotheo 2:4) Arali na guda zwine Mudzimu a zwi funa na zwine a si zwi fune nahone na tshila u tendelana nazwo, Mudzimu u ḓo vha khonani yaṋu. (Phisalema 15:1, 2) Mudzimu o rumela Yesu kha ḽifhasi uri a gudise vhathu ngoho. Mudzimu u ṱoḓa ri tshi thetshelesa zwe Yesu a zwi funza.—Mateo 17:5; Yohane 18:37.

Naa Mudzimu u ḓo vhuya a fhelisa u zwifha?

 Ee. Mudzimu u a zwi vhenga musi vhathu vha tshi fhura vhaṅwe nga u vha zwifhela. U fhulufhedzisa uri u ḓo fhelisa vhoṱhe vhane vha bvela phanḓa vha tshi zwifha. (Phisalema 5:6) Musi Mudzimu a tshi ita nga u ralo, u ḓo ita uri hu itee zwe a zwi fhulufhedzisa zwa uri: “Mulomo une wa amba ngoho u ḓo dzula u hone lini na lini.”—Mirero 12:19.