Dzangano ḽa United Nations ḽo vhiga zwi tevhelaho:

•    U bva nga dzi 7 dza October 2023 u swika nga dzi 23 dza October 2023, kha nndwa ya Isiraele na Gaza ho vhulawa vhathu vha fhiraho 6 400 nahone ha huvhala vha 15 200, vhe vhunzhi havho vha vha vhe vhadzulapo. Zwiṅwe hafhu, vhaṅwe vhanzhi vho kombetshedzea u shavha miḓini yavho.

•    U bva nga dzi 24 dza September 2023, nndwa ya Russia na Ukraine yo ita uri hu vhulawe vhadzulapo vha Ukraine vha 9 701 nahone ha huvhala vha 17 748.

 Bivhili i ṋea fhulufhelo ḽifhio vhathu vhane vha khou tambula nga nṱhani ha nndwa?

 Bivhili yo dzula yo amba uri Mudzimu u ḓo “fhelisa nndwa ḽifhasini ḽoṱhe.” (Phisalema 46:9) U ḓo shumisa Muvhuso u re ṱaḓulu u itela u fhelisa mivhuso yoṱhe ya vhathu. (Daniele 2:44). Muvhuso wa Mudzimu u ḓo vhofholola vhathu.

 Ṱhogomelani zwine Yesu Kristo Khosi ya Muvhuso wa Mudzimu a ḓo zwi ita:

•    “U ḓo tshidza mushai ane a lila a tshi ṱoḓa thuso, na a ḓiṱukufhadzaho na muṅwe na muṅwe a si na muthusi. U ḓo pfela vhuṱungu vha si na zwavho, u ḓo tshidza vhashai. U ḓo vha lamulela musi vha tshi khou tsikeledzwa na musi vhe khakhathini.”—Phisalema 72:12-14.

 Mudzimu u ḓo shumisa Muvhuso wawe u itela u fhelisa tshoṱhe vhuṱungu na makhaulambilu zwo ḓiswaho nga dzinndwa na dzikhakhathi.

•    “U ḓo phumula miṱodzi yoṱhe maṱoni avho, lufu a lu tsha ḓo vha hone, u ṱungufhala, u lila na vhuṱungu a zwi tsha ḓo vha hone. Zwithu zwa kale zwo fhela.”—Nzumbululo 21:4.

 Hu si kale Muvhuso wa Mudzimu u ḓo ḓisa tshanduko khulwane kha ḽifhasi. Bivhili yo dzula yo amba nga ha “dzinndwa na nga ha mivhigo ya dzinndwa” zwine ra zwi vhona ṋamusi. (Mateo 24:6) Zwenezwi na zwiṅwe zwiitea zwi sumbedza uri ri khou tshila “maḓuvhani a vhufhelo” ha mivhuso ya vhathu.—2 Timotheo 3:1.