Politiki i fhandekanya vhathu u mona na shango ḽoṱhe. Nga 2022, vha Pew Research Center vho ita ṱhoḓisiso kha mashango a 19. Ho wanuluswa uri vhatikedzi vha mahoro o fhambanaho vha phesenthe dza 65 vhane vha dzula kha eneo mashango a vha dzuli murunzi muthihi.

 Hune na dzula hone, naa no no zwi ṱhogomela uri vhathu vha khou ṋaṋa u fhandekanywa nga politiki? Ndi ngani? Naa hu na thandululo? Ṱhogomelani zwine Bivhili ya zwi amba.

 Bivhili yo dzula yo amba uri tshifhingani tshashu tshine tsha vha tshifhinga tsha ‘maḓuvha a vhufhelo,’ vhathu vha ḓo vha na zwiito zwine zwa fhandekanya vhathu.

•   “Fhedzi ḓivha hezwi: Maḓuvhani a vhufhelo hu ḓo vha na zwifhinga zwi lemelaho zwi konḓaho u sedzana nazwo. Ngauri vhathu vha ḓo funa vhone vhaṋe fhedzi . . . a vha nga tendelani na vhaṅwe”—2 Timotheo 3:1-3.

 Naho mivhuso i tshi shuma nga maanḓa u itela u takadza vhathu vhayo, zwenezwo a zwi khou konadzea. Nga nṱhani ha uri vhathu vha dzhia zwithu nga nḓila i sa fani, zwi a vha konḓela nahone nga tshiṅwe tshifhinga a zwi konadzei uri vha shumisane u itela u tandulula thaidzo. Zwenezwo zwi khwaṱhisedza zwe Bivhili ya zwi amba u bva kale.

•   “Muthu a vhusa muṅwe [u] a mu huvhadza.”—Muhuweleli 8:9.

 Naho zwo ralo, Bivhili i amba nga ha muvhuso une wa ḓo ḓisa thandululo, une murangaphanḓa wawo a ḓo tandulula thaidzo dzoṱhe dzine vhathu vha vha nadzo ṋamusi.

 Bivhili i amba uri Yesu Kristo ndi murangaphanḓa a re na vhukoni ho fhambanaho na ha vhaṅwe. Yesu u na maanḓa na lutamo lwa u ita uri vhathu vha vhe na vhuthihi.

•   “Misini yawe muvhuya u ḓo bvelela, na mulalo u ḓo anda”—Phisalema 72:7.

•   “Tshaka dzoṱhe dzi ḓo mu shumela.”—Phisalema 72:11.

 Yesu ndi murangaphanḓa ene ene ngauri u na ndavha na vhathu nahone u ṱoḓa u vha thusa, zwihuluhulu vhane vha tsikeledzwa.

•   “U ḓo tshidza mushai ane a lila a tshi ṱoḓa thuso na a ḓiṱukufhadzaho na muṅwe na muṅwe a si na muthusi. U ḓo pfela vhuṱungu vha si na zwavho, u ḓo tshidza vhashai. U ḓo vha lamulela musi vha tshi khou tsikeledzwa na musi vhe khakhathini”—Phisalema 72:12-14.

 Gudani zwo engedzeaho nga ha Muvhuso wa Mudzimu, une murangaphanḓa wawo ha vha Yesu. Wanani uri ni nga vhuyelwa na u u tikedza nga nḓila ḓe.

•   Ṱalelani vidio i re na tshiṱoho tshine tsha ri, Muvhuso Wa Mudzimu Ndi Mini?

•   Vhalani thero i re na tshiṱoho tshine tsha ri, “Muvhuso Wa Mudzimu—Muvhuso U Si Na Vhutshinyi.”