Nga 2022, mivhuso u mona na shango yo shumisa rannda dzi fhiraho triḽioni dza 44 nndwani. A hu athu vhuya ha shumiswa tshelede nngafha nndwani. Zwenezwi zwo itiswa nga nndwa i re hone vhukati ha Russia na Ukraine. Nga April 2023 Stockholm International Peace Research Institute (SIPRI), yo ṋea muvhigo u tevhelaho nga ha zwe zwa itea nga 2022. Yo ri:

•   Tshelede ye ya shumiswa Yuropa nndwani yo “engedzea nga phesenthe dza 13. Yeneyo ndi tshelede nnzhi vhukuma ye muvhuso wa Yuropa wa i shumisa nndwani nga ṅwaha u bva nga 1991.”

•   “Shango ḽa Russia…ḽo vha ḽi ḽa vhuṱanu kha mashango ane a shumisesa tshelede nndwani. Tshelede ye ḽa i shumisa nndwani yo engedzea nga phesenthe dzi ṱoḓaho u vha 9.2, zwa ita uri ḽi vhe ḽa vhuraru kha mashango ane a shumisesa tshelede nndwani u mona na shango.”

•   Shango ḽa Amerika ḽi kha ḓi vha ḽone ḽine ḽa shumisesa tshelede nndwani, ngauri ḽi shumisa “tshelede ya phesenthe dza 39 nndwani.”

 Vho Dokotela Nan Tian vhane vha vha muṅwali wa muvhigo wa SIPRI, vho amba uri: “Miṅwahani ya zwenezwino, mivhuso i bvela phanḓa i tshi engedza tshelede ine ya i shumisa nndwani. Zwenezwi zwi sumbedza uri vhuimo ha shango ḽine ra khou tshila khaḽo vhu khou ṋaṋa u vhifha vhu tshi ya.

 Bivhili yo dzula yo amba uri mivhuso i re na maanḓa i ḓo vha na thaidzo nnzhi nahone i ḓo dzula i tshi lwa nga tshayo. Yo ri vhudza na uri ndi mini zwine zwa ḓo ḓisa mulalo wa vhukuma.

•   Bivhili i amba uri ri khou tshila ‘tshifhingani tsha vhufhelo.’—Daniele 8:19.

•   Bugu ya Daniele yo dzula yo amba uri nga tshenetsho tshifhinga mivhuso i ḓo lwa nga tshayo. Yeneyi mivhuso i ḓo ‘lwela’ u vha na maanḓa manzhi. Musi yeneyo mivhuso i tshi khou lwa, i ḓo shumisa “lupfumo” lunzhi kana tshelede.—Daniele 11:40, 42, 43.

 U itela u guda zwo engedzeaho nga ha honovhu vhuporofita vhu re Bivhilini vhu akhamadzaho, ṱalelani vidio ine ya ri, Vhuporofita Ho Iteaho—Daniele Ndima 11.

•   Bivhili i amba uri Mudzimu u ḓo fhelisa mivhuso ya vhathu. U “ḓo vhumba muvhuso une wa sa ḓo fheliswa. Wonoyo muvhuso a u nga ṋewi vhaṅwe vhathu. U ḓo kwasha na u fhelisa yeneyi mivhuso yoṱhe, wa ima u woṱhe lini na lini.”—Daniele 2:44.

•   Hu si kale, Yehova a Mudzimu u ḓo ita zwithu zwine vhathu vha nga si kone u zwi ita. U ḓo ḓisa mulalo wa vhukuma, wa tshoṱhe. Nga nḓila-ḓe? Muvhuso wawe wa ṱaḓulu u ḓo fhelisa zwihali zwoṱhe na dzinndwa.—Phisalema 46:8, 9.

 U itela u guda zwo engedzeaho nga ha zwine Muvhuso wa Mudzimu wa ḓo zwi ita, vhalani thero ine ya ri, “Under God’s Kingdom ‘Peace Will Abound.’”