Nga dzi 9 October 2024, vha World Wildlife Fund vho ṋea muvhigo u si wavhuḓi u sumbedzaho nḓila ine phukha dza ḓaka dza khou kwamea ngayo nga zwine vhathu vha khou zwi ita. Wo sumbedza uri “u bva nga 1970 u swika nga 2020, tshivhalo tsha phuka dza ḓaka tsho fhungudzea nga phesenthe dza 73”. Wonoyo muvhigo wo dovha wa amba uri: “Ri vha ri sa khou ṋaṋisa musi ri tshi amba uri zwine zwa ḓo itea nga miṅwaha miṱanu i tevhelaho zwi ḓo kwama vhukuma vhutshilo kha ḽifhasi.”

 Zwi a pfesesea uri vhunzhi ha vhathu vha a akhamadzwa nga mivhigo i fanaho na yeneyi. Shango ḽashu ri a ḽi funa nga maanḓa nahone a ri ṱoḓi u vhona phukha dzi tshi khou pfa vhuṱungu. Ri ḓipfa nga yeneyi nḓila ngauri Mudzimu o ri sika uri ri dzi ṱhogomele.—Genesi 1:27, 28; Mirero 12:10.

 Nga zwenezwo, ni nga kha ḓi ḓivhudzisa uri: ‘Naa ri ḓo kona u tsireledza phukha dza ḓaka? Bivhili i ri mini nga hazwo?’

 Hu sa londwi vhuḓidini hoṱhe vhune ra nga vhu ita u itela u tsireledza phukha dza ḓaka, ndi Mudzimu fhedzi ane a nga kona u dzi tsireledza. Kha Nzumbululo 11:18, Bivhili i amba uri Mudzimu u ḓo “fhelisa vha tshinyadzaho ḽifhasi.” Yeneyo vese i ri gudisa zwithu zwivhili:

1.  1. Mudzimu ha nga ḓo tendela vhathu vha tshi tshinyadza ḽifhasi lwa tshoṱhe.

2.  2. Mudzimu u ḓo dzhia vhukando hu si kale. Ri zwi ḓivha hani? Nga nṱhani ha uri ṋamusi hu na khonadzeo khulwane vhukuma ya uri vhathu vha nga fhelisa phukha dzoṱhe dza daka.

 Mudzimu u ḓo ita mini u itela u tandulula yeneyi thaidzo? U ḓo shumisa muvhuso wawe wa ṱaḓulu u vhusa ḽifhasi ḽoṱhe. (Mateo 6:10) Wonoyo muvhuso u ḓo funza vhathu vhane vha thetshelesa na u vha gudisa u ṱhogomela na u tsireledza phukha dza ḓaka.—Yesaya 11:9.