DZULANI NO FHAṰUWA!
Vhuvemu Vhune Ha Khou Itwa Kha Zwa Politiki—Bivhili I Ri Mini Nga Hazwo?
Kha zwa politiki hu khou itwa vhuvemu nga maanḓa, zwenezwi zwi khou ita uri vhathu shangoni ḽoṱhe vha tshuwe.
Ngei Mexico, ho vhulawa vhorapolitiki vha 39 (ndi mbalo khulwane u fhira naho hu lini), ha dovha ha vha na vhuṅwe vhuvemu vhune ha khou itwa kha zwa politiki, zwenezwi zwo tshuwisa vhathu na u ita uri vha si tsha livhisa ṱhogomelo kha tshifhinga tsha u voutha tsha 2023-2024.
Na ngei Yuropa hu na vhuvemu vhunzhi vhune ha khou itea kha zwa politiki. Sa tsumbo, nga 15 May 2024 ho ṱoḓa u vhulawa prime minister vha Slovakia.
Vhathu vha Amerika vho tshuwa nga maanḓa nge nga 13 July 2024 ha ṱoḓa u vhulawa Vho Donald Trump vhe vha vhuya vha vha muphuresidennde.
Ndi ngani hu na vhuvemu vhunzhi nga u rali kha zwa politiki? Naa zwi ḓo vhuya zwa fhela? Bivhili i ri mini nga hazwo?
Zwo dzula zwo ambiwa uri vhathu vha nga si anḓane nga nṱhani ha zwa politiki
Bivhili yo dzula yo amba uri tshifhingani tshashu tshine tsha vha ‘maḓuvha a vhufhelo,’ vhathu vhanzhi vha ḓo ḓifara nga nḓila ine ya ita uri hu vhe na u hanedzana na vhuvemu.
“Maḓuvhani a vhufhelo hu ḓo vha na zwifhinga zwi lemelaho zwi konḓaho u sedzana nazwo. Ngauri vhathu . . . a vha nga livhuwi, a vha nga fhulufhedzei, . . . a vha nga tendelani na vhaṅwe, . . . vha ḓo ita zwa dzikhakhathi, . . . vha ḓo vha vhafheṱi, vha ḓo vha na swili, vha ḓikukumusa.”—2 Timotheo 3:1-4.
Bivhili yo dovha ya amba uri nga tshenetshi tshifhinga vhathu vha ḓo lwa na muvhuso nahone hu ḓo vha na dzikhakhathi kha zwa politiki. (Luka 21:9) Fhedzi, zwenezwi zwithu zwi nga si dzule zwi hone.
U fheliswa ha vhuvemu vhune ha itwa kha zwa politiki
Bivhili yo amba uri Mudzimu u ḓo fhelisa mivhuso ya vhathu, ha vhusa muvhuso wawe u re ṱaḓulu.
“Mudzimu wa ṱaḓulu u ḓo vhumba muvhuso une wa . . . ḓo kwasha na u fhelisa yeneyi mivhuso yoṱhe, wa ima u woṱhe lini na lini.”—Daniele 2:44.
Muvhuso wa Mudzimu u ḓo ita uri vhathu vha vhe na vhuthihi wa ita na uri hu vhe na mulalo shangoni ḽoṱhe.
Yesu Kristo ane a vha muvhusi wa wonoyo Muvhuso u vhidzwa “Mukololo wa Mulalo,” nahone u ḓo ita vhungoho ha uri ‘mulalo u si vhe na magumo.’—Yesaya 9:6, 7.
Vhane vha vha fhasi ha wonoyo Muvhuso vha khou guda u tshila nga mulalo. Ndi ngazwo Bivhili i tshi ri: “Mabanga avho vha ḓo ita madzembe ngao mapfumo avho vha ḓo ita makhavha ngao. Lushaka a lu tsha ḓo lwa na luṅwe lushaka, a vha tsha ḓo dovha vha guda u lwa.”—Yesaya 2:3, 4.
U itela u guda zwo engedzeaho, vhalani thero “U Ḓo Ni Itela Mini?” na u ṱalela vidio Muvhuso Wa Mudzimu Ndi Mini?