Nga July 2022, ho vha na mivhigo ya mufhiso u songo ḓoweleaho u mona na shango:

•   “Vha muvhuso wa China vho sevha vhathu uri lwa vhuvhili kha uno ṅwedzi hu ḓo fhisa vhukuma kha ḓorobo dza 70.”—25 July 2022, CNN Wire Service.

•   “Nga nṱhani ha uri hu na mufhiso u songo ḓoweleaho u mona na Europe u ne wa khou fhisa vhukuma, hu na mililo ya ḓaka kha mashango manzhi.”—17 July 2022, The Guardian.

•   “Ḓoroboni nnzhi kha ḽa United States ho vha na mufhiso u re nṱha vhukuma we wa vha u sa athu vhuya wa vha hone. Wonoyo mufhiso u khou phaḓalala u tshi ya vhubvaḓuvha na kha zwiṅwe zwipiḓa zwa tshipembe na vhukovhela.”—24 July 2022, The New York Times.

 Zwenezwi zwithu zwoṱhe zwi amba mini? Naa hu ḓo swika hune shango ḽa ḓo vha ḽi sa tsha dzulea khaḽo? Naa Bivhili yo dzula yo amba hu tshe nga phanḓa nga ha mufhiso wo kalulaho?

 Ee. U fhisesa hune ha vha hone hu tshimbidzana na zwe Bivhili ya dzula yo zwi amba uri zwi ḓo itea tshifhingani tshashu. Sa tsumbo, Yesu o dzula o amba hu tshe nga phanḓa uri ri “ḓo vhona zwi ofhisaho” kana “zwi tshuwisaho vhukuma.” (Luka 21:11; Good News Translation) Nga nṱhani ha u engedzea ha mufhiso u mona na shango ḽoṱhe, vhaṅwe vhathu vha a ofha uri zwithu zwine vhathu vha ita zwi nga ita uri shango ḽi sale ḽi si tsha dzulea.

 Hai. Mudzimu o sika shango uri vhathu vha dzule khaḽo lwa tshoṱhe. (Phisalema 115:16; Muhuweleli 1:4) Samusi o fhulufhedzisa, a nga si tendele vhathu vha tshi tshinyadza ḽifhasi. U ḓo “fhelisa vha tshinyadzaho ḽifhasi.”—Nzumbululo 11:18.

 Kha ri haseledze nga ha vhuporofita vhuvhili vhune ha sumbedza zwine Mudzimu a ḓo zwi ita kha ḽifhasi:

•   “Hu ḓo takala soga na shango, na midavhi ya soga i ḓo takala ya ḓala maluvha.” (Yesaya 35:1) Mudzimu a nga si tendele shango ḽi tshi vha soga ḽi sa tshilei khaḽo, nṱhani hazwo u ḓo ḽi lugisa.

•   “U ṱhogomela ḽifhasi, wa ḽi ita uri ḽi vhe na zwibveledzwa zwinzhi zwavhuḓi.” (Phisalema 65:9) Mudzimu u ḓo ita uri ḽifhasi ḽi vhe pharadiso.

 U itela u guda zwo engedzeaho nga ha uri tshanduko dza mutsho dzine dza khou itea dzi tshimbidzana hani na vhuporofita vhu re Bivhilini, vhalani thero “Climate Change and Our Future—What the Bible Says.”

 U itela u guda zwo engedzeaho nga ha zwine Bivhili ya zwi fhulufhedzisa nga ha uri ḽifhasi ḽi ḓo dovha ḽa lugiswa, vhalani thero “Who Will Save the Earth?”