Vhathu u mona na shango ḽoṱhe vha khou sedzana na mufhiso wo kalulaho na khombo dzine dza khou vhangwa nga wonoyo mufhiso. Ṱhogomelani mivhigo i tevhelaho:

•   “Kha miṅwaha yoṱhe ya 174 yo fhiraho ye khayo ha thoma u rekhodiwa dzithempharetsha u mona na shango ḽoṱhe, ho waniwa uri hoyu ṅwedzi wa June ndi wone wo fhisesaho u fhira yoṱhe ye ya vhuya ya rekhodiwa.”—National Oceanic and Atmospheric Administration, U.S. Department of Commerce, 13 July, 2023.

•   “Ngei Italy, Spain, France, Germany na Poland vha khou sedzana na mufhiso wo kalulaho hu ne thempharetsha dza lavhelelwa uri dzi ḓo gonya dza swika 48°C kha zwiṱangadzime zwa Sicily na Sardinia. Wonoyo ndi wone mufhiso wo kalulesaho kha yo rekhodiwaho kha ḽa Europe.”—European Space Agency, 13 July, 2023.

•   “Musi ḽifhasi ḽi tshi ṋaṋa u fhisa, ri lavhelela uri hu ḓo dzula hu tshi na mvula khulu zwine zwa ḓo ita uri hu vhe na miḓalo i tshinyadzaho.”—Vho Stefan Uhlenbrook, mulanguli wa hydrology, water na cryosphere kha World Meteorological Organization, 17 July, 2023.

 Naa yeneyi mivhigo ya mutsho wo kalulaho i a ni vhilaedzisa? Ṱhogomelani zwine Bivhili ya zwi amba nga ha ḽeneḽi fhungo ḽa ndeme.

 Ee. Mufhiso wo kalulaho wa shango ḽoṱhe na mutsho wo kalulaho zwi tshimbidzana na zwe Bivhili ya dzula yo zwi amba uri zwi ḓo itea tshifhingani tshashu. Sa tsumbo, Yesu o dzula o amba uri ri ḓo vhona zwithu “zwi ofhisaho.” (Luka 21:11) U engedzea ha mufhiso u mona na shango ḽoṱhe zwo ita uri vhathu vhanzhi vha vhe ne nyofho dza uri vhathu vha ḓo ita uri ḽifhasini hu si tsha tshilea.

 A zwo ngo ralo. Mudzimu o sika ḽifhasi uri vhathu vha tshile khaḽo lwa tshoṱhe, ha nga ḓo tendela vhathu vha tshi ḽi fhelisa. (Phisalema 115:16; Muhuweleli 1:4) O fhulufhedzisa uri u ḓo “fhelisa vha tshinyadzaho ḽifhasi.”—Nzumbululo 11:18.

 Bivhili i sumbedza uri Mudzimu a nga kona u tsireledza ḽifhasi kha zwithu zwine zwa nga ḽi tshinyadza nahone u ḓo zwi ita.

•   “[Mudzimu] u dzikisa ḓumbu; magabelo a lwanzhe a dzika.” (Phisalema 107:29) Mudzimu u na maanḓa a u langa mutsho. A nga kona u tandulula thaidzo dzoṱhe dza mupo dzine dza ita uri vhathu vha shengele.

•   “U ṱhogomela ḽifhasi, wa ḽi ita uri ḽi vhe na zwibveledzwa zwinzhi zwavhuḓi.” (Phisalema 65:9) Mudzimu u ḓo fhaṱutshedza ḽifhasi a ita uri ḽi vhe pharadiso.

 U itela u guda zwo engedzeaho nga ha zwine Bivhili ya zwi fhulufhedzisa uri ḽifhasi ḽi ḓo vusuluswa, vhalani thero i re na tshiṱoho tshine tsha ri “Who Will Save the Earth?”