Nga dzi 24 February 2022, Russia yo ṱhasela Ukraine, zwenezwo zwo ita uri vhathu vhanzhi vha shavhele kha maṅwe mashango ngauri vhutshilo havho ho vha vhu khomboni. a

 Nataliia wa ngei Kharkiv, Ukraine o ri: “Ho vha hu tshi khou thuthuba dzibomo, zwo vha zwi tshi khou ofhisa lune a thi ḓivhi uri ndi nga zwi ṱalutshedza hani. Musi ri tshi pfa uri hu na zwidimela zwa u thusa vhathu vhane vha khou shavha, na riṋe ro mbo ḓi ṱuwa. Ro vha ri tshi tea u siya zwithu zwoṱhe ngauri muṅwe na muṅwe o vha o tendelwa u dzhia kubege fhedzi. Ro vha ri tshi nga kona u dzhia mabambiri a ndeme, mishonga, maḓi na zwiliwanyana. Ro sia zwoṱhe ra gidimela tshiṱitshini tsha tshidimela, dzibomo dzi tshi khou thuthuba nga henefho tsini.”

 Nadija wa ngei Kharkiv, Ukraine o ri: “Ro vha ri sa vhuyi ra humbula uri hu ḓo vhuya ha vha na nndwa. Ndo pfa hu tshi khou thuthuba kha dziṅwe ḓorobo, na mafasiṱere o vha a tshi khou dzinginyea. Ndo mbo ḓi dzhia zwithu zwa ndeme fhedzi nda ṱuwa. Ndo bva hayani nga matsheloni nga 8 nda ṋamela tshidimela tshine tsha khou ya Lviv, ndi tshi swika henefho, nda kona u ṋamela bisi ya u ya Poland.”

Kha heyi thero

•  Ndi mini zwine zwa ita uri vhathu vha shavhele kha maṅwe mashango?

•  Ndi mini zwine zwa nga thusa vhathu vho shavhelaho kha maṅwe mashango uri vha vhe na fhulufhelo?

•  Naa Bivhili i nga thusa vhathu vho shavhelaho kha maṅwe mashango?

 Ndi mini zwine zwa ita uri vhathu vha shavhele kha maṅwe mashango?

 Vhathu vha Ukraine vho shavhela kha maṅwe mashango ngauri vha khou ṱhaselwa nga maswole a Russia. Fhedzi Bivhili i ri vhudza nga ha zwiṅwe zwithu zwine zwa ita uri vhathu vha shavhele kha maṅwe mashango:

•   Mivhuso ya vhathu u mona na shango i khou balelwa u ṋea vhathu zwine vha zwi ṱoḓa. Kanzhi mivhuso i shumisa maanḓa ayo u itela u langa vhathu na u vha fara nga nḓila i si yavhuḓi.—Muhuweleli 4:1; 8:9.

•   Saṱhane Diabolo ane a vha “muvhusi wa shango,” u na ṱhuṱhuwedzo mmbi kha vhathu. Ndi ngazwo Bivhili i tshi amba uri: “Shango ḽoṱhe ḽi zwanḓani zwa muvhi.”—Yohane 14:30; 1 Yohane 5:19.

•   Nga nnḓa ha thaidzo dze vhathu vha vha nadzo lwa miṅwaha minzhi, zwazwino ri khou tshila kha tshifhinga tshee Bivhili ya dzula yo amba nga hatsho. Yo ri: “Maḓuvhani a vhufhelo hu ḓo vha na zwifhinga zwi lemelaho zwi konḓaho u sedzana nazwo.” (2 Timotheo 3:1) Ri zwi vhona nga nndwa dzine dza vha hone, khombo dza mupo, u ṱahela ha zwiḽiwa na malwadze. Zwenezwo ndi zwithu zwine zwa ita uri vhathu vha shavhele kha maṅwe mashango.—Luka 21:10, 11.

 Ndi mini zwine zwa nga thusa vhathu vho shavhelaho kha maṅwe mashango uri vha vhe na fhulufhelo?

 Bivhili i amba uri Yehova b Musiki washu ndi Mudzimu ane a funa na u pfela vhuṱungu vhathu vho shavhelaho kha maṅwe mashango. (Dotoronomio 10:18) U fhulufhedzisa uri u ḓo tandulula thaidzo dza vhenevho vhathu a tshi shumisa muvhuso wawe u re ṱaḓulu. Wonoyo ndi Muvhuso wa Mudzimu une wa ḓo dzhiela vhudzulo mivhuso ya vhathu. (Daniele 2:44; Mateo 6:10) Yehova u ḓo fhelisa Saṱhane Diabolo a tshi shumisa Muvhuso wawe. (Vharoma 16:20) Wonoyo Muvhuso u ḓo vhusa shango ḽoṱhe, wa ita uri vhathu vha si tsha fhandekanywa nga dzibodara. Vhathu vha shango ḽoṱhe vha ḓo vha muṱa u re na vhuthihi. A hu na muthu ane a ḓo dovha a sia haya hawe a shavhela kha ḽiṅwe shango, ngauri Bivhili i fhulufhedzisa uri: “Vhoṱhe vha ḓo dzula fhasi ha minḓirivhe na mihuyu yavho, a hu na ane a ḓo vha tshuwisa, ngauri ho amba Yehova wa mavhuthu.”—Mika 4:4.

 Ndi Muvhuso wa Mudzimu fhedzi une wa nga kona u tandulula thaidzo dza vhenevho vhathu. Yehova u ḓo shumisa Muvhuso wawe u fhelisa thaidzo dzine dza ita uri vhathu vha shavhele kha maṅwe mashango. Ṱhogomelani dziṅwe dza thaidzo dzine a ḓo dzi fhelisa:

•   Dzinndwa. Yehova u ḓo “fhelisa nndwa.” (Phisalema 46:9) U itela u ḓivha uri Yehova u ḓo fhelisa hani dzinndwa, vhalani thero ine ya ri, “Peace on Earth—How Will It Come?”

•   U tsikeledzwa na dzikhakhathi. Yehova “u ḓo vha lamulela musi vha tshi khou tsikeledzwa na musi vhe khakhathini.” (Phisalema 72:14) U itela u pfesesa nḓila ine vhathu vha nga shandula ngayo mavhonele avho a si avhuḓi, vhalani thero dzi re fhasi ha tshiṱoho tshine tsha ri, “Ni Nga Litsha Hani U Vhenga Vhaṅwe.”

•   Vhushai. Yehova “u ḓo tshidza mushai ane a lila a tshi ṱoḓa thuso.” (Phisalema 72:12) U itela u vhona nḓila ine Yehova a ḓo fhelisa ngayo zwine zwa ita uri hu vhe na vhushai, vhalani thero ine ya ri, “Is a Fair Economic System Possible?”

•   Nḓala. “Hu ḓo vha na mavhele manzhi kha ḽifhasi.” (Phisalema 72:16) U itela u ḓivha uri Mudzimu u ḓo ita hani uri hu si tsha vha na nḓala, vhalani thero ine ya ri, “A World Without Hunger?”

 Naa Bivhili i nga thusa vhathu vho shavhelaho kha maṅwe mashango?

 Ee. Bivhili a i vha ṋei fhulufhelo fhedzi, i dovha ya vha thusa u sedzana na thaidzo dzine vha vha nadzo zwino.

 Zwine Bivhili ya zwi amba: “Ni songo vhilaedziswa nga tshithu, fhedzi zwoṱhe zwine zwa ni vhilaedzisa ni vhudze Mudzimu nga thabelo, nga u humbela zwi tshi bva mbiluni ni tshi mu livhuwa; Mudzimu a tshi shumisa Kristo Yesu u ḓo ni ṋea mulalo une vhathu vha si kone u u pfesesa, wa tsireledza mbilu dzaṋu na mihumbulo yaṋu.”—Vhafilipi 4:6, 7.

 Zwine zwa amba zwone: Humbelani Mudzimu uri a ni thuse uri ni vhe na mulalo kha vhuimo vhuṅwe na vhuṅwe vhune na nga ḓiwana ni khaho. Vhalani thero ine ya ri, “Philippians 4:6, 7—‘Do Not Be Anxious About Anything.’”