Vhathu u mona na shango ḽoṱhe vha na dzangalelo kha u sa ḽa ṋama, u ambara zwiambaro zwo itwaho nga dziphukha, u sa farwa zwavhuḓi ha phukha kana zwiṅwe zwi tshimbidzanaho na zwenezwo.

•   “Vhaṅwe vhathu vha tshila nga nḓila ine hu sa vhe na u tambudzwa ha zwipuka, u zwi shumisa sa zwiḽiwa, kha u ita zwiambaro kana u zwi shumisela zwiṅwe zwithu.”—The Vegan Society.

 Vhaṅwe vhathu vha tshila nga yeneyi nḓila ngauri vha vhilaela nga ha mupo, mutakalo kana nga nṱhani ha vhurereli, hu si nga uri vha na ndavha na zwipuka fhedzi.

•   “U tshila nga yeneyi nḓila zwo fhambana na u sa ḽa zwiṅwe zwiḽiwa nga nṱhani ha mutakalo ngauri vhathu vhane vha tshila nga yeneyi nḓila, vha ri zwi tou vha phetho ine muthu ene muṋe a ḓidzhiela yone na uri ndi zwine muthu muṅwe muṅwe a nga zwi ita uri ḽifhasi ḽi vhe fhethu havhuḓi.”—Britannica Academic.

 Naa u tshila nga yeneyi nḓila zwi nga tandulula thaidzo dza kha ḽifhasi? Bivhili i ri mini nga hazwo?

 Bivhili i bvisela khagala uri Musiki washu Yehova a Mudzimu u dzhia vhathu vhe vha nṱha kha zwipuka na uri o vha ṋea maanḓa a u zwi vhusa. (Genesi 1:27, 28) Nga u ya ha tshifhinga, Mudzimu o tendela vhathu uri vha ḽe zwipuka. (Genesi 9:3) Naho zwo ralo, ha ṱoḓi zwipuka zwi tshi fariwa lwa tshiṱuhu.—Mirero 12:10.

 Bivhili i sumbedza uri u ḽa kana u sa ḽa ṋama ndi tsheo ya muthu nga eṱhe. b Tsheo ine ra i ita kha heḽi sia ai iti uri Mudzimu a ri dzhie ri vhathu vha khwine. (1 Vhakorinta 8:8) A hu na muthu ane a tea u sasaladza tsheo ine muṅwe a i dzhia kha ḽeneḽi sia.—Vharoma 14:3.

 Bivhili i bvisela khagala uri nḓila ine ra khetha u tshila ngayo, i nga si tandulule thaidzo dzine dza vha hone. Vhunzhi ha thaidzo dzi vha hone nga nṱhani ha politiki, inkonomi na nḓila ine vhathu vha tshila ngayo nahone ahuna muthu ane a nga dzi tandulula. Bivhili i ri:

•   “Zwo kombamaho zwi nga si onyoloswe.”—Muhuweleli 1:15.

 Musiki washu u ḓo tandulula thaidzo dzoṱhe dzine ra ṱangana nadzo. Bivhili i ṱalusa nga lwa pfanyisedzo zwine a ḓo zwi ita.

•   “Nda vhona ḽiṱaḓulu ḽiswa na ḽifhasi ḽiswa; ngauri ḽiṱaḓulu ḽa kale na ḽifhasi ḽa kale zwo lovha na lwanzhe a lu tsheeho.”—Nzumbululo 21:1.

 Mivhuso ya vhathu ine ya vha “ḽiṱaḓulu ḽa kale,” i ḓo dzhielwa vhudzulo nga “ḽiṱaḓulu ḽiswa,” zwine zwa ambela kha Muvhuso wa Mudzimu u re ṱaḓulu. Muvhuso wa Mudzimu u ḓo fhelisa “ḽifhasi ḽa kale,” zwine zwa ambela kha vhathu vhavhi, wa vhusa “ḽifhasi ḽiswa,” zwine zwa ambela kha vhathu vhane vha ṱoḓa u vhuswa ngawo.

 Muvhuso wa Mudzimu u ḓo ita uri zwi konadzee tshoṱhe u tshila nga mulalo na zwipuka.—Yesaya 11:6-9.