Nga 2024 hu ḓo vha na khetho nnzhi u mona na shango u fhira dze dza vhuya dza vha hone nga ṅwaha muthihi. Naho zwo ralo, vhathu vhanzhi a vha tsha fhulufhela vhorapolitiki.

•   Nga dzi 19 September 2023 vha Pew Research Center vho sumbedzisa uri musi hu tshi itwa ṱhoḓisiso kha vhathu vha Amerika, ho wanwa uri vhunzhi havho vho ri “vhorapolitiki vhanzhi vha ṱoḓa u ḓivhuyedza” nṱhani ha u thusa vhathu. a

 Vhaswa vhanzhi navho a vha fhulufheli vhorapolitiki.

•   Nga dzi 29 January 2024, The New York Times yo ri: “Vhaswa vhanzhi ṋamusi vha na ndavha nga maanḓa na u ṱoḓa u wana thandululo kha thaidzo dzi re hone, fhedzi kha ṱhoḓisiso dzo itwaho vha amba uri vhorapolitiki a vha khou wana dzenedzo thandululo.”

•   Nga dzi 22 January 2024, The Korea Times yo amba uri: “U ya nga iṅwe ṱhoḓisiso, vhaswa vhanzhi vho sumbedzisa uri vha fhulufhela nga maanḓa vhathu vhane vha posta dzividio na u vha na vhatevheli vhanzhi kha vhudavhidzano ha vhomuthumunzhi (social media) u fhira vhorapolitiki.”

 Naa ri nga fhulufhela uri vhorapolitiki vha ḓo ita uri zwithu zwi vhe khwiṋe? Ndi nnyi ane ra nga mu fhulufhela?

 Ndi zwavhuḓi uri vhathu vha ṱhogomele uri vha fhulufhela nnyi. Bivhili i ri: “Tsilu ḽi tenda zwoṱhe zwine zwa ambiwa, fhedzi wa vhuṱali u elekanya nga ha zwine a ḓo zwi ita.”—Mirero 14:15.

•   U itela uri ni kone u khetha uri ndi mafhungo afhio ane na nga a fhulufhela na ane a si vhe ngoho, vhalani thero “Protect Yourself From Misinformation.”

 Zwiṅwe hafhu, na vhorapolitiki vhane vhathu vha nga vha fhulufhela, a si zwoṱhe zwine vha nga kona u zwi ita. Ndi ngazwo Bivhili i tshi ri:

•   “Ni songo fhulufhela vharangaphanḓa kana na fhulufhela murwa muthu, ane a si kone u tshidza.”—Phisalema 146:3.

 Bivhili i amba uri Mudzimu o khetha murangaphanḓa ane a vha na vhukoni ha u ita zwithu zwoṱhe na ane ra nga mu fhulufhela. Onoyo murangaphanḓa ndi Yesu Kristo. (Luka 1:32, 33) Yesu ndi Khosi ya Muvhuso wa Mudzimu une wa vhusa u ṱaḓulu.—Mateo 6:10.

•   Gudani uri ndi ngani ni tshi nga fhulufhela Yesu na zwine a ḓo zwi ita u itela u tandulula thaidzo dzine ra ṱangana nadzo. Vhalani thero “Ndi Nnyi Ane A Ḓo Vha Khosi?” na “U Ḓo Ni Itela Mini?”