Ho anganyelwa uri hu ḓo vha na vhathu vha ṱoḓaho u vha 5 biḽioni vhane vha ḓo ṱalela FIFA World Cup yo thomaho nga dzi 20 November ine ya ḓo fhela nga dzi 18 December 2022. Vhathu vhanzhi vha humbula uri tshenetsho tshiitea tshihulwane tshi nga ita zwi fhiraho u sokou ita uri vhathu shango ḽoṱhe vha vhe na vhuthihi musi vha tshi khou ṱalela yeneyi mitambo.

•   Vho Nelson Mandela vhe vha vha vhe muphuresidennde wa Afurika Tshipembe vho ri: “Mitambo i na maanḓa a u shandula shango. I dovha ya ṱuṱuwedza ya ita na uri vhathu vha vhe na vhuthihi nga nḓila yo khetheaho.”

•   Muphuresidennde wa FIFA Vho Gianni Infantino vho ri: “Bola i ita uri vhathu vha vhe na vhuthihi na fhulufhelo, ya ita uri vha takale, ya dovha ya vha ṱuṱuwedza, ya ita uri vha funane nahone i dovha hafhu ya ita uri vha vhone uri hu na zwiṅwe zwine vha fana ngazwo.” a

 Naa World Cup kana miṅwe mitambo i nga kona u ita zwenezwo zwithu? Naa hu na fhulufhelo ḽa uri hu ḓo vha na mulalo na vhuthihi?

 World Cup ya uno ṅwaha yo ita uri vhathu vha humbule nga zwi fhiraho u sokou ṱalela bola. Yeneyi mitambo yo ita uri vhathu vha ambe nga ha mafhungo a zwa politiki ane a kwama pfaneleo dza vhathu, u khethululana na zwa ikonomi.

 Naho zwo ralo, vhathu vha a ḓiphiṋa nga u ṱalela mitambo ya dzitshaka i fanaho na World Cup. Fhedzi yeneyo mitambo i nga si ite uri hu vhe na vhuthihi lwa tshoṱhe naho vhathu vhanzhi vha tshi tama uri zwi vhe nga u ralo. Nṱhani hazwo, i ita uri vhathu vha fhambane na uri vha si vhe na vhuthihi. Zwenezwo zwi sumbedza uri ri khou tshila kha tshifhinga tshine Bivhili ya tshi vhidza ‘maḓuvha a vhufhelo.’—2 Timotheo 3:1-5.

 Bivhili i ri ṋea fhulufhelo ḽa uri hu ḓo vha na vhuthihi shangoni ḽoṱhe. I fhulufhedzisa uri vhathu vhoṱhe kha ḽifhasi, vha ḓo vha na vhuthihi nga fhasi ha Muvhuso wa ṱaḓulu u ne wa vhidzwa “Muvhuso wa Mudzimu.”—Luka 4:43; Mateo 6:10.

 Yesu Kristo khosi ya wonoyo Muvhuso u ḓo ita vhungoho ha uri hu vhe na mulalo ḽifhasi ḽoṱhe. Zwine Bivhili ya zwi amba:

•   “Muvhuya u ḓo bvelela, na mulalo u ḓo anda.”—Phisalema 72:7.

•   “U ḓo tshidza mushai ane a lila a tshi ṱoḓa thuso . . . U ḓo vha lamulela musi vha tshi khou tsikeledzwa na musi vhe khakhathini.”—Phisalema 72:12, 14.

 Na ṋamusi, pfunzo dza Yesu Kristo dzo ita uri vhathu vha dzimiḽioni vhane vha bva kha mashango a 239 vha vhe na vhuthihi. Vho guda u funa vhathu vhoṱhe na vhane vha bva kha vhubvo kana lushaka lu sa fani na lwavho. U itela u wana zwo engedzeaho, vhalani mutevhe wa dzi thero u re na tshiṱoho “Ni nga litsha hani u vhenga vhaṅwe?”