“Minwahani i si gathi yo fhiraho, a hu na we a vha a tshi humbula uri ri nga wana khandiso dzashu kha zwishumiswa zwa elekitironiki.” Naa ni a tendelana na zwenezwo? Eneo ndi maipfi o ambiwaho nga wahashu Vho-Geoffrey Jackson, kha nyambo i ṱuṱuwedzaho i re kha muvhigo wa vhurathi wa 2020 u bvaho kha Tshigwada tshi Langaho. Musi vha tshi bvela phanḓa vho ri: “Zwino ri a ḓivhudzisa uri, ro vha ri tshi ḓo kona hani u sedzana na dziedzi ḽa Corona arali ro vha ri si na zwishumiswa zwi ngaho JW Library?” Lwa miṅwaha minzhi, Yehova o vha a tshi khou ri lugiselela uri ri kone u sedzana na vhuimo vhu fanaho na honovhu.”

 Yehova o vha a tshi khou ri lugiselela nga nḓila-ḓe? Ho itwa mini u itela u bveledza app ya JW Library? Ho vha hu tshi ṱoḓea mini u itela u i khwinisa na u ita uri i dzule i kha vhuimo havhuḓi?

 Nga May 2013, Tshigwada tshi Langaho tsho humbela vha muhasho wa MEPS Programming vha re ofisini khulwane dza Ṱhanzi dza Yehova uri vha bveledze app ine ya vha na Bivhili ya Ṱhalutshedzelo Ya Shango Ḽiswa yo vusuluswaho. Vho-Paul Willies vhane vha shuma kha muhasho wa MEPS Programming vho ri: “Ro vha ri sa athu u vhuya ra bveledza app ine ya shuma kha dzifounu. Fhedzi ro vhumba tshigwada, ra litsha u shuma miṅwe mishumo, ra shumisana na miṅwe mihasho u itela u bveledza yeneyi app na zwi re khayo. Ro rabela lunzhi nahone Yehova a ri thusa. Nga murahu ha miṅwedzi miṱanu, yeneyo app yo mbo ḓi bviswa muṱanganoni wa ṅwaha muṅwe na muṅwe!”

 Ro vha ri tshi tea u dovha ra ita uri yeneyo app i vhe ḽaiburari ya vhukuma i re na khandiso nnzhi na nyambo nnzhi. Nga January 2015, app yashu yo vha yo no vha na khandiso nnzhi dza Tshiisimane. Nga murahu ha miṅwedzi ya rathi vhathu vho vha vha tshi vho kona u downlouda dzenedzo khandiso nga dziṅwe nyambo nnzhi.

 U bva tsheetsho, vhahashu vho no khwinisa yeneyi app nga nḓila nnzhi. Vho ita uri hu vhe na dzividio na khandiso dzashu dzoṱhe, vha ita na uri zwithu zwoṱhe zwine ra zwi shumisa miṱanganoni yashu ya tshivhidzo zwi vhe fhethu huthihi. Vho dovha vha ita uri musi ri tshi vula vese i re Bivhilini ri wane khandiso dzi wanalaho kha Research Guide dzine dza ṱalutshedza zwi re kha yeneyo vese.

 Ḓuvha ḽiṅwe na ḽiṅwe, JW Library i vulwa kha zwishumiswa zwa elekitironiki zwa miḽioni dza malo nahone ṅwedzi muṅwe na muṅwe i vulwa kha zwishumiswa zwi fhiraho 15 miḽioni! Ndi mini zwine zwa ṱoḓea uri yeneyo app i shume zwavhuḓi kha zwenezwo zwishumiswa? Wahashu Vho-Willies vha a ṱalutshedza: “App i dzula i tshi khou khwiniswa. Ri dzula ri tshi khou dzhenisa zwithu zwiswa kha app na u ita uri i thuse vhathu na uri zwi vha lelutshele u i shumisa. Nga nṱhani ha uri zwishumiswa zwa elekitironiki zwi dzula zwi tshi khwiniswa, ri tea u dzula ri tshi khwinisa app yashu uri i kone u shuma zwavhuḓi kha zwenezwo zwishumiswa zwo khwiniswaho. Samusi ri tshi dzula ri tshi khou engedza khandiso na zwithu zwo rekhodiwaho kha JW Library, ri tea u dovha ra khwinisa software yashu na u ita uri i dzule i tshi khou shuma zwavhuḓi.” Kha nyambo dzoṱhe dzi re kha JW Library, zwino hu na khandiso dzi ṱoḓaho u vha 200 000 na zwithu zwi fhiraho 600 000 zwi thetsheleswaho u katela na dzividio!

 Hu ṱoḓea zwishumiswa zwinzhi uri app i dzule i tshi khou shuma zwavhuḓi. Ri tea u dovha ra badela tshelede u itela u shumisa dziṅwe phurogireme dza khomphyutha. Mutengo wa ḽaisentsi nthihi ndi R21 591.08 nga ṅwaha. Zwiṅwe hafhu, Phurogireme ya MEPS i shumisa tshelede i ṱoḓaho u vha R143 940.50 ṅwaha muṅwe na muṅwe u itela u renga zwishumiswa zwine zwa thusa u ita uri app i bvele phanḓa i tshi khou shuma zwavhuḓi kha dzikhomphyutha ntswa, dzitablet na dzifounu.

 Nga nṱhani ha uri ri na JW Library, a ri tsha shumisa tshelede nnzhi kha u gandisa, u bainda na u rumela dzikhandiso. Sa tsumbo, kha ri ambe nga ha bugwana U Ṱolisisa Maṅwalo Ḓuvha Ḽiṅwe na Ḽiṅwe. Ro gandisa kopi dzi ṱoḓaho u vha 12 miḽioni dza bugwana U Ṱolisisa Maṅwalo ya 2013. Fhedzi kha bugwana U Ṱolisisa Maṅwalo ya 2020, ro gandisa kopi dzi ṱoḓaho u vha miḽioni ṱhanu naho ho no vha na nyengedzeo ya vhahuweleli vha ṱoḓaho u vha 700 000. Ndi ngani ho vha na yeneyo tshanduko? Ndi nga nṱhani ha uri vhahashu vhanzhi vha vho vhala ndimana ya ḓuvha kha JW Library. a

 JW Library i dovha ya thusa nga nḓila nnzhi vhane vha i shumisa. Wahashu Geneviève ane a dzula ngei Canada, u amba uri app i mu thusa uri a dzule a tshi guda tshifhinga tshoṱhe. O ri: “Arali ndo vha ndi tshi tea u thoma nda kuvhanganya bugu dzoṱhe dzine nda dzi ṱoḓa uri ndi gude, zwo vha zwi tshi ḓo nkonḓela u guda matsheloni maṅwe na maṅwe. Nga nṱhani ha uri ndi na app, ndi sokou dzhia tablet yanga nahone i vha i na zwithu zwoṱhe zwine nda khou zwi ṱoḓa. U dzula ndi tshi guda zwo khwaṱhisa lutendo lwanga na u ita uri ndi vhe na vhushaka ha tsini-tsini na Mudzimu.”

 Heyi app i khou ri thusa nga maanḓa-maanḓa zwino nga tshino tshifhinga tsha dziedzi ḽa Corona. Charlyn wa ngei United States o ri: “Samusi dziedzi ḽa Corona ḽo phaḓalala na shango ḽoṱhe, ho no fhela ṅwaha ndi sa vhoni khandiso dzashu ntswa dzo gandiswaho. Fhedzi JW Library i na zwithu zwoṱhe zwine ra zwi ṱoḓa uri ri dzule ri na lutendo lwo khwaṱhaho. Ndi livhuwa Yehova nge a ri ṋea tshenetshi tshifhiwa.”

 Vhathu vhanzhi vha ḓipfa nga nḓila i fanaho na ya Faye ane a dzula ngei Philippines. O ri: “Ndi shumisa yeneyi app nthihi fhedzi uri ndi dzule ndi na vhushaka ha tsini na Yehova. Ndi thoma nga u vhala zwi re khayo matsheloni maṅwe na maṅwe. Ndi thetshelesa zwi re khayo musi ndi tshi khou ita mishumo yanga. Ndi shumisa yeneyi app u itela u lugiselela miṱangano. Ndi shumisa yone u itela u lugiselela zwine nda ḓo zwi guda na mugudiswa wanga wa Bivhili. Ndi ṱalela dzividio khayo musi ndi tshi wana kufhinga. Ndi vhala khayo Bivhili kana dziṅwe thero musi ndo lindela ḽainini. Ndi yavhuḓisa.”

 Heyi app i thusa nga maanḓa na vhuḓinḓani. Sa tsumbo, musi muṅwe wahashu wa tshifumakadzini wa ngei Cameroon a tshi khou huwelela, o vha a tshi ṱoḓa u shumisa luṅwalo lwe a vhona lu tshi khou shumiswa nga wahawe wa tshifumakadzini vhegeni dzi si gathi dzo fhiraho. Fhedzi o vha o hangwa uri yeneyo vese i wanala ngafhi. O ri: “Zwi takadzaho ndi uri ndo humbula maipfi a yeneyo vese. Ndo vula Bivhili yanga kha app nda ṱoḓa eneo maipfi. Ndo mbo ḓi wana yeneyo vese nga u bonya ha iṱo. Musi ndi tshi shumisa app, ndi kona u wana vese nnzhi dzine nda vha ndo dzi hangwa nga zwiṅwe zwifhinga.”

 U ṋeela ha vhoiwe zwi tshi bva mbiluni ni tshi shumisa nḓila dzo sumbedzwaho kha donate.pr418.com, zwo ita uri ri kone u vha na app ya JW Library, u i khwinisa na u ita uri i dzule i tshi shuma zwavhuḓi u itela u thusa vhahashu u mona na shango ḽoṱhe. Ri livhuwa u ṋeela ha vhoiwe zwi tshi bva mbiluni.

1. Nga October 2013—Ho bviswa app i re na Bivhili ya Ṱhalutshedzelo ya Shango Ḽiswa yo vusuluswaho

2. Nga January 2015—Dziṅwe khandiso dzo thoma u vha hone nga Tshiisimane nahone nga murahu dza vha hone na nga dziṅwe nyambo

3. Nga November 2015—Ho dzheniswa tshishumiswa tsha u talela

4. Nga May 2016—Ho dzheniswa tshiteṅwa tsha miṱangano

5. Nga May 2017—Ho dzheniswa tshiteṅwa tsha u ṅwalela dzinotsi

6. Nga December 2017—Ho dzheniswa tshiteṅwa tshine tsha ita uri ri kone u shumisa Bivhili ya Study Bible

7. Nga March 2019—Ho dzheniswa tshiteṅwa tshine tsha ita uri ri kone u downlouda zwithu zwine zwa thetsheleswa, u ṱalela dzividio na u wana khandiso dzi re kha Research Guide

8. Nga January 2021—Ho dzheniswa tshiteṅwa tshine tsha ita uri ri kone u wana zwithu zwoṱhe zwi re kha bugu Ḓiphiṋeni Nga Vhutshilo Lwa Tshoṱhe!