Tshigwada Tshi Langaho tshi khou ṱoḓa nga mbilu yoṱhe uri hu vhe na zwifhaṱo zwine zwa ḓo thusa kha uri mushumo wa u huwelela u bvele phanḓa. Sa tsumbo, nga ṅwaha wa tshumelo wa 2023, khamphani dzine dza shumiswa nga ofisi dza madavhi dza Ṱhanzi dza Yehova, dzo shumisa miḽioni dzi fhiraho 500 dza dzidoḽara u itela u renga, u fhaṱa, u lugisa na u ṱhogomela Holo dzine ra farela khadzo miṱangano ya vhege iṅwe na iṅwe na dza maguvhangano u mona na shango. a Hu na iṅwe tshelede ye ya shumiswa nga zwivhidzo u mona na shango u itela u ṱhogomela Holo dzavho.

 Zwiṅwe hafhu, miṋeelo i dovha ya shumiswa u itela u fhaṱa na u ṱhogomela zwifhaṱo zwa madavhi zwine zwa thusa u dzudzanya na u tikedza mushumo wa u huwelela shangoni ḽoṱhe. Ro leludza mushumo une wa itwa madavhini u itela u shumisa yeneyo tshelede u fhaṱa na u vusulusa Holo dza Ṱhanzi dza Yehova dzine dza shumiselwa u fara miṱangano vhege iṅwe na iṅwe na dza maguvhangano. Naho zwo ralo, zwi ṱoḓa tshelede nnzhi u lugisa, u vusulusa kana u pfulusa zwifhaṱo zwa madavhi. Ndi ngani zwenezwo zwi zwa ndeme? Madavhi a tikedza hani mushumo wa ndeme wa u huwelela? Kha ri vhone.

 Vhunzhi ha ofisi dza madavhi dzo no fhedza miṅwaha ya 30 kana 40 dzi hone! Vho Nicholas vhane vha vha kha Muhasho wa u Fhaṱa wa Shango Ḽoṱhe, vho ṱalutshedza uri: “Naho tshifhaṱo tshi tshi khou ṱhogomelwa zwavhuḓi, hu a swika hune tsha ṱahala tsha vha na thaidzo. U tshi vusulusa zwi thusa uri tshi bvele phanḓa tshi tshi khou shumiswa lwa tshifhinga tshilapfu.”

 Zwifhaṱo zwa Bethele zwi tea u vusuluswa u itela u tendelana na tshanduko dza ndangulo. Sa tsumbo, mbalo ya vhahuweleli yo no engedzea nga maanḓa u bva tshifhinga tshee vhunzhi ha ofisi dza madavhi dza fhaṱwa. U itela u tikedza vhenevha vhahuweleli, ho vha hu tshi khou ṱoḓea vhaṅwe vhathu vho engedzeaho vhane vha nga thusa kha dzenedzi ofisi. Nga nṱhani ha zwenezwo, ofisi dza madavhi dze dza vha dzo linganela dzo thoma u vha ṱhukhu nga nṱhani ha u engedzea ha vhathu.

 Tshiṅwe tshithu tsha ndeme ndi u tsireledzea. Nga nṱhani ha uri ri khou tshila maḓuvhani a vhufhelo a ḽino shango, khombo dza mupo dzi khou ya dzi tshi engedzea. (Luka 21:11) Musi ri tshi shumisa thekiniki dza tshi zwino zwino u itela u vusulusa zwenezwo zwifhaṱo, zwi ita uri zwenezwo zwifhaṱo zwi vhe zwo tsireledzeaho. Zwi dovha zwa ita uri zwi lelutshele vhahashu u dzudzanya mushumo wa u phalala na u bvela phanḓa na u tikedza mushumo wa u huwelela na nga murahu ha musi ho vha na khombo dza mupo.

 Nga fhasi ha vhulivhisi ha Tshigwada Tshi Langaho, vhahashu vho vusulusa na u lugisa zwifhaṱo zwa madavhi zwa 43 nga ṅwaha wa tshumelo wa 2023. Zwi amba uri hafu ya zwifhaṱo zwa madavhi u mona na shango zwo vha zwi tshi khou lugiswa kana u vusuluswa. Ṱhogomelani tsumbo dzi si gathi dzine dza sumbedza uri ndi ngani wonoyu mushumo u wa ndeme.

 Angola. Vho Matt vhane vha vha muraḓo wa Komiti Ya Davhi ḽa Angola vho ri: “Ro vha na ndugelo ya u vhona vhuporofita vhu re kha Hagai 2:7 vhu tshi itea nga nḓila yo khetheaho. Nga miṅwaha ya 10 fhedzi, ho vha na nyengedzeo ya vhahuweleli nga phesenthe dza 60! U itela u tikedza vhenevho vhahuweleli, muṱa wa Bethele wo vha u khou tea u engedzea kararu. Fhedzi nga nṱhani ha uri zwifhaṱo zwa Bethele zwo vha zwi zwiṱuku, a ro ngo kona u ramba vhathu vhanzhi nga nḓila ye ra vha ro lavhelela ngayo. Zwenezwo zwo ita uri miraḓo ya Bethele i shume nga maanḓa na u shuma awara dzo engedzeaho u itela uri mushumo u kone u itea.”

 Ho vha na vhahashu vhe vha nangiwa u itela uri vha vhone uri ndi mini zwine vha nga zwi ita uri davhi ḽi vhe ḽihulwane. Vhenevho vhahashu vho vhona uri tsha khwiṋe ndi uri hu vusuluswe tshenetsho tshifhaṱo tsha davhi. Fhedzi nga murahu ha musi vho no ita ṱhoḓisiso, vho ṱhogomela uri u tshi vusulusa hu ḓo vha hu si u shumisa miṋeelo ya vhahashu nga vhuṱali. Nṱhani hazwo, vho ḓa na muhumbulo wa u tou renga na u vusulusa tshifhaṱo tshe tsha vha tshi nga henefho tsini. Vho Matt vho ri: “Musi wonoyo muhumbulo u tshi ḓiswa kha Komiti Ya Davhi, ro humbula u nga arali ra renga tshenetsho tshifhaṱo na u tshi vusulusa, tshi nga si fane na tshifhaṱo tshe riṋe vhaṋe ra tshi fhaṱa. Fhedzi zwa zwino ri khou kona u vhona uri tshi khou ri shumela zwavhuḓi. Yehova o fhaṱutshedza yeneyo phetho.”

 Zwi nga kha ḓi itea uri tshifhingani tshi ḓaho, davhi ḽa Angola ḽi ṱoḓe u engedzwa. Naho zwo ralo, tshifhaṱo tshiswa u katela na dzirumu dza dzikhonthina dzi re henefho Bethele na nnḓu dze vha tou hira dzi re nnḓa ha Bethele, zwa zwino zwi khou thusa nga maanḓa u tikedza mbalo ya vhahuweleli ine ya khou engedzea.

 Dzhapani. Zwifhaṱo zwa davhi ḽa Dzhapani zwo fhaṱwa hu ṱoḓaho u vha miṅwaha ya 40 yo fhiraho nahone vhunzhi hazwo a zwi athu vusuluswa nga nḓila khulwane. Naho vhahashu vho shuma nga maanḓa u ṱhogomela zwenezwi zwifhaṱo, ho no fhela tshifhinga tshilapfu zwi hone ri tshi khou zwi shumisa. Ndi ngazwo zwa zwino ri tshi khou zwi vusulusa nga nḓila khulwane.

 Na vhutshilo ha Bethele ho no shanduka. Hu sa athu swika ṅwaha wa 2015, muṱa wa Bethele wo vha u tshi bikelwa zwiḽiwa nga matsheloni, masiari na nga madekwana. Nga nṱhani ha zwenezwo, rumu nnzhi dza Bethele ya Dzhapani dzo vha dzo itwa dzi na kukhishi kuṱuku. Zwa zwino, miraḓo ya Bethele i vho ḓibikela vhunzhi ha zwiḽiwa. Musi hu tshi vusuluswa, ho itwa uri rumu dza Bethele dzi vhe na khishi khulwane ine vhathu vha nga kona u ḓibikela khayo. Wahashu wa tshifumakadzini Kumiko ane a shuma kha davhi ḽa Dzhapani o ri: “Heyi khishi i ita uri ndi ḓipfe ndi hayani nahone i dovha ya nthusa uri ndi kone u tshimbidzana na tshanduko ntswa dza Bethele.”

 Mushumo une wa itwa kha davhi ḽa Dzhapani ndi tshipiḓa tsha ndeme kha mushumo wa shango ḽoṱhe wa Ṱhanzi dza Yehova. (Mateo 28:19, 20) Davhi ḽa Dzhapani ndi ḽiṅwe ḽa madavhi mavhili ane a phirintha Bivhili yoṱhe yo fhelelaho. Ngauralo, samusi hu tshi khou vusuluswa, tshiṅwe tshithu tshine tsha khou itwa ndi u pangwa ha mutshini une wa dobela buse na zwibambiri zwine zwa wa musi hu tshi khou phirinthiwa, u itela u tsireledza vhathu vhane vha shuma kha zwa u Phirintha. U renga na u panga wonoyo mutshini zwo ri dzhiela tshelede i ṱoḓaho u vha doḽara dza miḽioni nthihi, fhedzi u vha hone hawo, zwi thusa uri hu kone u phirinthiwa na u rumelwa kha maṅwe mashango khandiso dzine dza ita uri ri dzule ri na lutendo lwo khwaṱhaho. Bivhili ndi yone ya ndemesa u fhira dziṅwe khandiso dzoṱhe.

 Vhahashu vho ita vhungoho ha uri Bivhili dzi bvele phanḓa dzi tshi khou phirinthiwa naho hu tshi khou vusuluswa. Vho Trey vhane vha vha muraḓo wa Komiti ya Davhi ḽa Dzhapani vho ri: “Musi hu tshi khou itwa mushumo wa u vusulusa, ndangulo yashu yo vha i tshi khou bvisa ṱhalutshedzelo dza Bivhili nga nyambo nnzhi nahone vhathu vhanzhi u mona na shango vho vha vha tshi khou ṱoḓa Bivhili. Vhathu na mihasho yo fhambanaho, vho vha vha tshi tea u shumisana u itela u dzudzanya uri hu ḓo pangwa lini mitshini miswa na uri hu ḓo phirinthiwa lini.” Naho ho vha na dzenedzi khaedu, vhukati ha miṅwedzi ya March na August 2023, ho phirinthiwa Bivhili dzi ṱoḓaho u vha 220 000. Zwenezwi zwoṱhe zwo itea musi mushumo muhulwane wa u vusulusa u tshi khou itwa hune ha Phirinthiwa hone. Ho itwa yeneyi mishumo yoṱhe hu songo vhuya ha shumiswa tshelede yo engedzeaho.

 Tshiṅwe tshithu tsha ndeme tshine tsha khou sedziwa kha hoyu mushumo wa u vusulusa, ndi u vhulunga muḓagasi. Hu ḓo pangwa dzi solar panel dzine dza ḓo thusa uri ri vhulunge tshelede i ṱoḓaho u vha doḽara dza 120 000 ṅwaha muṅwe na muṅwe. Hu ḓo dovha ha pangwa mafasiṱere o itwaho nga ngilasi tharu dzo ṱumanyiswa. Na zwenezwo zwi ḓo thusa kha u vhulunga muḓagasi, zwa ita uri ri vhulunge tshelede i ṱoḓaho u vha doḽara dza 10 000 nga ṅwaha. Naho zwenezwi zwithu zwine zwa vhulunga muḓagasi zwi tshi ḓura nga maanḓa, hu anganyelwa uri zwi ḓo ri thusa u vhulunga tshelede i fhiraho doḽara dza miḽioni tharu na hafu musi ri tshi khou zwi shumisa. Zwi ḓo dovha zwa thusa kha u tsireledza mupo.

 Wonoyu mushumo wa u fhaṱa une wa khou itwa kha enea madavhi mavhili, u ita uri ri vhone uri ndi mushumo mungafhani une wa tea u itwa uri zwifhaṱo zwa Bethele zwi kone u tikedza mushumo wa u huwelela. Fhedzi mushumo u kha ḓi vha munzhi. Aaron ane a shuma kha Muhasho Wa U Fhaṱa Wa Shango Ḽoṱhe o ri: “Vhahashu vho no ita mushumo munzhi, fhedzi hu na mushumo munzhi une wa kha ḓi tea u itwa.” Wonoyu mushumo woṱhe u ḓo itwa hani? Aaron o dovha a ri: “Nga nnḓa ha miṋeelo ya vhahashu ine ya thusa kha yeneyi mishumo ya ndeme, ri dovha ra livhuwa vhahashu ngauri vha a ḓiimisela u tikedza nga u ḓifunela kha yeneyi mishumo. Ri livhuwa na vhane vha khou dzudzanya uri vha kone u thusa tshifhingani tshi ḓaho. Musi vhahashu vha tshi khou ri tikedza nga yeneyi nḓila, zwi vha zwi tshi khou sumbedza uri Yehova u khou fhaṱutshedza wonoyu mushumo.”—Phisalema 110:3.

 Mishumo yoṱhe ya u fhaṱa na u vusulusa zwifhaṱo zwa ndangulo, i tikedzwa nga miṋeelo ya u ḓifunela. Vhunzhi ha yeneyo miṋeelo i itwa kha donate.pr418.com. Ri khou livhuwa nga maanḓa u vha na mafunda ha vhoiwe.