Bivhili yo amba uri “lushaka lu ḓo lwa na luṅwe lushaka” na uri hu ḓo vha na khombo nnzhi nga tshifhinga tsha “vhufhelo ha shango.” (Mateo 24:3, 7) Nga ṅwaha wa tshumelo wa 2023, ro vhona zwe Bivhili ya amba zwi tshi khou itea. a Hu sa londwi dzinndwa na khombo dza mupo dze dza vha hone kha mashango a ṱoḓaho u vha 100, Ṱhanzi dza Yehova vho sumbedza lufuno lune Yehova a vha nalwo. Nga nḓila-ḓe?

 Nga ṅwaha wa tshumelo wa 2023 , vhahashu vho kwamea nga khombo dza mupo kana khombo dzo vhangwaho nga vhathu dzi fhiraho 200. U itela u thusa vhahashu vho welwaho nga khombo, ho shumiswa tshelede i fhiraho rannda dza 189 miḽioni, i bvaho kha miṋeelo ya shango ḽoṱhe. Vhunzhi ha vhahashu vho dovha vha shumisa tshelede dzavho u itela u thusa vhahavho vho welwaho nga khombo vhane vha dzula tsini na hune vha dzula hone. Kha ri vhone uri miṋeelo yashu yo shumiswa hani u itela u thusa vhahashu vhe vha kwamea kha dziṅwe khombo mbili.

 Kha vhuṅwe vhupo ngei Nigeria hu dzulela u vha na miḓalo. Fhedzi miḓalo ye vha hone nga October 2022 yo tshinyadza vhukuma u fhira ye ya vhuya ya vha hone kha miṅwaha ya fumi yo fhiraho. Yeneyo miḓalo yo tshinyadza tshipiḓa tshihulwane vhukuma tsha fhethu he vhathu vha vha vha tshi lima hone nahone vhathu vha fhiraho miḽioni mbili vho tea u pfuluwa mahayani avho. Davhi ḽa Nigeria ḽo mbo ḓi dzudzanya uri hu thomiwe komiti ya u thusa vhahashu vho welwaho nga khombo, uri vhahashu vha thusiwe nga zwine vha khou zwi ṱoḓa na u vha thusa u dzula vhe na lutendo lwo khwaṱhaho.

•   Vhahuweleli vha 7 505 vho tea u pfuluwa mahayani avho

•   Mahaya a vhahashu a 860 o tshinyadzwa

•   Ho kumbiwa Holo dza 90 dza Ṱhanzi Dza Yehova na Holo nthihi ya Guvhangano

 Ho shumiswa tshelede i fhiraho R4 738 138 u itela u thusa vhahashu vho welwaho nga khombo. Yo shumiselwa:

•   U renga raisi, ṋawa na dzinoodles

•   Zwithu zwa nḓuni zwi ngaho maḓirasi na nethe dza vhunyunyu

•   U vusulusa kana u fhaṱulula mahaya o tshinyadzwaho

 Vhahashu vho ita hani vhungoho ha uri miṋeelo i shumiswa zwavhuḓi? Vho ṱola zwifhaṱo zwoṱhe nga vhuronwane u itela u vhona uri ndi zwifhio zwine vha nga zwi vusulusa. Arali tshifhaṱo tshi tshi khou tea u fhaṱululwa nga huswa, tsho vha tshi tshi fhaṱiwa nga nḓila yo leluwaho, yo ḓoweleaho henefho.

 Vhahashu vha a livhuwa vhukuma nge vha thusiwa. Munwe wahashu wa tshifumakadzini o ri: “Miḓalo yo tshinya vhutshilo hashu ngauri yo kumba masimu na mahaya ashu. Ro vha ro takala vhukuma musi vhahashu vha tshi ḓa nga ḽeneḽo ḓuvha u itela u ri thusa na u ri isa fhethu ho tsireledzeaho. Ro takala na u fhirisa musi vhahashu vha tshi ri ḓisela zwiḽiwa zwi bvaho ofisini ya davhi. Ro vha ri si na na maipfi musi ri tshi vhona hu tshi itea zwo ṅwalwaho kha Yohane 13:34, 35. . . . Lufuno lwa vhukuma lu hone. Nṋe na vha muṱa wanga ri khou livhuwa nga maanḓa vhahashu nge vha ḓa vha ri thusa nga tshifhinga tsho teaho.”

 Vhaṅwe kha honoho vhupo vho vhona nḓila ye vhahashu vha thusa ngayo vhahavho vho welwaho nga khombo. Vhamusanda vha vhuponi ha Sabagreia, Bayelsa vho amba uri: “Hu na kereke nnzhi hafha shangoni, fhedzi ndi Ṱhanzi dza Yehova fhedzi vhane vha ita zwithu zwi fanaho na hezwi. . . . Ndangulo ya vhoiwe, ndi iṅwe ya khwinesa ḽifhasini ḽoṱhe.

 Nga February 2023, Chile ho vha na mililo i fhiraho 400 ye ya tshinyadza zwihulu. Ho swa fhethu huhulwane nga maanḓa u katela na zwiṅwe zwithu zwa ndeme zwine zwa wanala henefho Chile. Vhathu vha ṱoḓaho u vha 8 000 vho pfuluswa mahayani avho. Nga u ṱavhanya musi mulilo u tshi kha ḓi tou bva u tshinyadza, ofisi ya davhi yo mbo ḓi dzudzanya uri hu ye u thusiwa vhahashu vho welwaho nga khombo.

•   Vhahuweleli vha 222 vho pfuluswa mahayani avho

•   Mahaya a 20 o tshinyadzwa

 Ho shumiswa tshelede i fhiraho R3 790 370 u itela u thusa vhahashu vho welwaho nga khombo. Yo shumiselwa:

•   U renga zwiḽiwa na maḓi

•   Peṱirolo, zwithu zwa u kunakisa na mishonga

•   U fhaṱulula mahaya o tshinyadzwaho

 Vha muṅwe muṱa vho vha vho akhamala musi vha tshi wanulusa uri zwithu zwoṱhe zwe vha vha vhe nazwo zwo vha zwo swa nga mulilo, u katela na muḓi wavho na bindu ḽavho. Zwenezwi zwo ita uri vha sale vha si na mushumo une vha nga u ita uri vha wane tshelede ya u ḓiṱhogomela. Musi tshiwo tshi tshi kha ḓi tou bva u itea, zwo vha zwi tshi vha ṱungufhadza vhukuma musi vha tshi sedza he nnḓu yavho ya vha i hone. Fhedzi vho thoma u ḓipfa vhe khwine musi vha tshi vhona nnḓu yavho i tshi khou fhaṱululwa. Lufuno lwe vhahavho vha vha sumbedza lwone lwo vha thusa u konḓelela. Vhahashu vha wonoyo muṱa vho vha vho kwamea nga lufuno lwe vha sumbedzwa lwone lwe na vhone vha ya u thusa nga u ḓifunela musi hu tshi khou fhaṱululwa nnḓu ya muṅwe wahashu.

 Vhunzhi ha vhahashu vho vha vho kwamea vhukuma nga mushumo we wa itwa u itela u thusa vho welwaho nga khombo. Munwe wahashu o ri: “Ndugiselelo ya Yehova ya uri hu vhumbiwe Komiti Ya U Thusa Vho Welwaho Nga Khombo ndi yavhuḓi nga maanḓa. Nga ḓuvha ḽi tevhelaho musi khombo i tshi kha ḓi tou bva u itea, vhahashu vho vha vho no swika vha tshi khou thusa vhahavho nga zwine vha zwi ṱoḓa. Zwi a ṱuṱuwedza vhukuma u vhala nga ha nḓila ye vhahashu vho welwaho nga khombo kha maṅwe mashango vha thuswa ngayo. Fhedzi zwi vha zwi nga iṅwe nḓila musi zwi tshi itea kha iwe. Zwi ita uri ni livhuwe ndangulo nga ho engedzeaho; u livhuwa nḓila ine vhahashu vha edzisa ngayo Yehova; nḓila ine vha ri ṱhomela ngayo nga zwine ra zwi ṱoḓa uri vhutshilo vhu bvele phanḓa, uri ri vhe na mutakalo wavhuḓi na uri ri dzule ri na lutendo lwo khwaṱhaho. Ro kona u vhona lufuno lune Yehova a vha nalwo.”

 Musi ri tshi khou sendela vhufheloni ha ḽino shango, khombo dza mupo dzi ḓo bvela phanḓa na u engedzea. (Luka 21:10, 11) Fhedzi Khosi yashu Yesu Kristo u khou shumisa tshivhidzo tsha Vhukriste u itela u ri sumbedza uri u na riṋe “misi yoṱhe u swika vhufheloni ha shango.” (Mateo 28:20) Miṋeelo ya vhoiwe ya mushumo wa shango loṱhe ine na i ṋeela kha donate.pr418.com na nga dziṅwe nḓila, u katela na tshifhinga na nungo dzine na dzi shumisa, zwi sumbedza uri ni ṱoḓa u tikedza Muvhuso na Khosi yawo ya lufuno. Ri khou livhuwa uri ni dzula ni tshi sumbedza u vha na mafunda.