Ṅwedzi muṅwe na muṅwe ri lavhelela nga maṱo matswuku u wana mbekanyamushumo dzine dza ri khwaṱhisa lutendo na vidio dzine dza bviswa kha Khasho Ya JW. Fhedzi vhunzhi ha vhahashu Afrika a vha koni u wana dzenedzi mbekanyamushumo kha Inthanethe. Ndi ngani?

 Fhethu hunzhi Afrika Inthanethe i a konḓa u wanala. Kanzhi hune ya wanala hone, i a ongolowa kana u ḓura nga maanḓa. Sa tsumbo, muṅwe mulavhelesi wa ḽiisela ngei Madagascar, o ya fhethu hu re na inthanethe u itela u downlouda Khasho Ya JW i no bva ṅwedzi muṅwe na muṅwe. O badeliswa R 235.63, ine ya vha tshelede ine vhaṅwe vha i hola nga vhege.

 Naho hu na dzenedzi thaidzo, vhathu vha dzimiḽioni ngei Afurika vha nga ḓiphiṋa nga Khasho Ya JW vha sa shumisi Inthanethe. Nga nḓila-ḓe?

 U bva nga 2017, ho itwa ndugiselelo ya uri vhathu vhane vha dzula tshipembe ha Sahara Afurika vha ṱalele Khasho Ya JW kha tshiṱitshi tsha TV tshi re kha satellite. Tshenetshi tshiṱitshi tshi hashwa mahala nahone tshi nga ṱalelwa tshifhinga tshiṅwe na tshiṅwe nga nyambo dza 16.

 U itela uri zwenezwo zwi konadzee, Ṱhanzi dza Yehova vha badela tshiṱitshi tsha TV u itela uri vha kone u hasha zwithu kha satellite. Satellite ine ya shumiswa, i swikelela mashango a 35 a re tshipembe ha Sahara Afurika. Vha badela tshelede i fhiraho R 179 567.04 nga ṅwedzi. Nga zwiṅwe zwifhinga vha badela tshelede yo engedzeaho u itela u hasha zwiṅwe zwiitea kha tshiṅwe tshiṱitshi. Zwenezwi zwi ita uri vhathu vhanzhi vha ḓiphiṋe nga mabuthano kana zwiitea zwo khetheaho, u fana na musi vho dalelwa nga muimeleli wa davhi.

 Vhathu vhanzhi u katela na vhane vha si vhe Dziṱhanzi, vha ṱalela tshiṱitshi tsha JW tshi re kha satellite kha TV dzavho mahayani. Fhedzi vhaṅwe vhahashu a vha na tshelede ya u renga zwishumiswa zwine zwa ṱoḓea u itela u ṱalela tshiṱitshi tsha JW tshi re kha satellite. U itela u vha thusa, Holo Dza Ṱhanzi Dza Yehova dzi fhiraho 3 670 dzo pangiwa dzi-satellite na zwiṅwe zwishumiswa zwine zwa ita uri vhahashu vha kone u ṱalela Khasho Ya JW vhe henefho holoni. U renga zwenezwo zwishumiswa na u zwi rumela, hu ṱoḓea tshelede i ṱoḓaho u vha R 1 047.47 arali Holo Ya Ṱhanzi Dza Yehova i na TV kana projector. Fhezi arali hu si na TV kana projector, zwenezwi zwishumiswa zwi nga rengwa nga tshelede i ṱoḓaho u vha R 7 930.88.

 Vhahashu vha livhuwa zwi tshi bva mbiluni u vha na tshenetshi tshiṱitshi. Muṅwe muhulwane wa tshivhidzo ngei Cameroon o ri: “Kha muṱa washu, tshenetshi tshiṱitshi, tshi tou nga maṋa ri vhukati ha soga.” Wahashu Vho Odebode vhane vha dzula Nigeria vha ri: “Ri ṱalela tshenetshi tshiṱitshi luraru nga vhege. Vhana vhanga vha dzula vho lavhelela zwenezwi zwifhinga nga maṱo matswuku. Vha a humbela uri ri ṱalele tshenetshi tshiṱitshi na nga zwiṅwe zwifhinga.” Rose ane na ene a dzula Nigeria u ri: “Ndo takala nga uri nṱhani ha uri ndi dzule ndo ṱalela mafhungo tshifhinga tshoṱhe, ndi vho ṱalela tshiṱitshi tsha JW tshi re kha satellite. Musi ndo ṱalela mafhungo ndo vha ndi tshi khukhulisea na BP yanga i tshi gonya. Fhedzi Khasho Ya JW i a nṱuṱuwedza na u ita uri ndi dzike. Ndi tshone tshiṱitshi tshine nda tshi funesa. Tshi tou vha tshifhiwa tshi bvaho ha Yehova.”

 Muṅwe mulavhelesi wa ḽiisela ngei Mozambique, u amba uri kha ḽiisela ḽawe, Holo Dza Ṱhanzi Dza Yehova dzo pangiwa zwishumiswa zwine zwa ita uri vha kone u ṱalela tshiṱitshi tsha JW tshi re kha satellite. Vhahashu vha re kha zwenezwo zwivhidzo, vha swika tshifhinga tsha muṱangano tshi sa athu thoma u itela u ṱalela Khasho Ya JW.

 Buthanoni ḽa dzitshaka ḽa 2019 ḽe ḽa farelwa Johannesburg Afurika Tshipembe, tshenetsho tshiṱitshi tsho shumiswa u itela uri vhahashu vha re fhethu ha 9 ho fhambanaho vha pfe dzi nyambo u katela na dze dza ṋekedzwa nga Muraḓo Wa Tshigwada Tshi Langaho. Sphumelele ane a shuma kha Muhasho Wa Broadcasting Afurika Tshipembe, o ri: “Tshifhingani tsho fhiraho, ro vha ri tshi ita uri vhahashu vha wane dzenedzo nyambo kha Inthanethe. Fhedzi zwenezwo zwi ṱoḓa uri Inthanethe i vhe i yavhuḓi na u renga datha. Tshiṱitshi tsha JW tshi re kha satellite a tshi ḓuri nahone zwo leluwa u tshi shumisa.”

 Ri livhuwa miṋeelo ya vhoiwe ine ya tikedza mushumo wa shango ḽoṱhe. I ita uri vhahashu vhanzhi Afurika vha ṱalele Khasho Ya JW. Ri livhuwa zwi tshi bva mbiluni miṋeelo ya vhoiwe ine na i ita ni tshi shumisa nḓila dzo fhambanaho dzi re kha donate.pr418.com.