Ṅwaha muṅwe na muṅwe, vhahashu vha re tshumeloni yo khetheaho ya tshifhinga tshoṱhe vha a rambiwa Tshikoloni tsha Gilead. Tshenetsho tshikolo tshi farelwa Watchtower Educational Center ngei Patterson, kha ḽa New York. a Kha tshenetshi tshikolo, vhagudiswa vha guda nḓila dza u ita mishumo yo fhambanaho nga nḓila i bvelelaho ndanguloni ya Yehova. Zwine vha zwi guda kha tshenetshi tshikolo, zwi vha thusa uri vha kone u khwaṱhisa vhathu vha Mudzimu zwivhidzoni na ofisini dza davhi u mona na shango ḽoṱhe.

 Tshikolo tsha Gilead ndi tsha vhathu vha bvaho mashangoni oṱhe. Sa tsumbo, kiḽasi ya vhu-147 ye ya vha hone nga 2019 yo vha i na vhagudiswa vha 56 vha bvaho mashangoni a 29. Vhagudiswa vhane vha rambiwa Gilead vha vha vhe kha tshumelo yo khetheaho ya tshifhinga tshoṱhe, vhaṅwe vha shuma Bethele, vhaṅwe ndi vhalavhelesi vha ḽiisela, vharumiwa kana vhavulanḓila vho khetheaho.

 Hu thoma u lugiselelwa hu tshee ho sala tshifhinga tshilapfu uri vhagudiswa vha thome u gudiswa. Muhasho Wa Zwa Vhuendedzi (WHQ Travel) u re ngei Ofisini Khulwane dza Shango Ḽoṱhe, u rengela vhagudiswa vho rambiwaho tshikoloni thikhithi dza bufho. Kha kiḽasi ya vhu-147, nga u tou angaredza mugudiswa muṅwe na muṅwe o vha a tshi tea u badela R 16 393.00 u ya Patterson na u humela shangoni ḽa hawe. Vhagudiswa vha bvaho Solomon Islands, vho ṋamela mabufho maṋa u ya Patterson nahone musi vha tshi humela shangoni ḽa havho, vho ṋamela mabufho mararu. Zwenezwo zwo ita uri vha tshimbile khilomithara dzi fhiraho 35 400! Mugudiswa muṅwe na muṅwe o badela tshelede i linganaho R 35 073.39! U itela u vhulunga tshelede, Muhasho Wa Zwa Vhuendedzi (WHQ Travel) u shumisa app ya kha khomphyutha u itela u wana thikhithi dzi sa ḓuri. Musi ho no rengiwa thikhithi, yeneyo phurogireme ya khomphyutha i bvela phanḓa i tshi sedza lwa dzivhege na miṅwedzi u itela u vhona arali mutengo wo tsa. Muhasho Wa Zwa Vhuendedzi (WHQ Travel) u shumisa thikhithi na dzi-voucher dzo ṋeelwaho nga vhaṅwe.

 Vhagudiswa vhanzhi vha ṱoḓa visa uri vha tendelwe u dzhena shangoni ḽa United States. Muhasho wa zwa Mulayo u re Ofisini Khulwane dza Shango Ḽoṱhe, u thusa vhagudiswa uri vha wane visa. Nga u tou angaredza hu ṱoḓea R 7 777.14 uri mugudiswa a ṅwaliswe na u wana visa.

 Ri vhuyelwa hani nga zwine vhagudiswa vho yavho kha tshenetsho tshikolo vha zwi guda? Vho-Hendra Gunawan ndi muhulwane wa tshivhidzo ngei Asia. Tshivhidzoni tshavho hu na vhavhingani vho yaho tshikoloni tsha Gilead. Vho-Hendra vho ri: “U thomani tshivhidzoni tshashu ho vha hu si na vhavulanḓila vha tshifhinga tshoṱhe. U bva tshee vhenevho vhavhingani vha swika, u fhisea na u ḓiimisela havho zwo ṱuṱuwedza vhaṅwe uri vha thome u vula nḓila. Nga murahu, muṅwe wahashu o rambiwa Tshikoloni tsha Vhahuweleli vha Muvhuso kana SKE!”

 Vho-Sergio Panjaitan vha shuma Bethele ngei Asia na vhahashu vho yaho tshikoloni tsha Gilead. Vho ri: “Zwe vha guda a zwi vhuyedzi vhone fhedzi, zwi vhuyedza na riṋe. Vho guda zwithu zwinzhi! Vha vhudza vhaṅwe zwe vha zwi guda nahone a vha ḓidzhii vhe vha ndeme u fhira vhaṅwe. Zwenezwi zwi a ri ṱuṱuwedza zwa dovha zwa ita uri na riṋe ri ṱuṱuwedze vhaṅwe.”

 Ndangulo i kona hani u badela tshenetshi tshikolo? I shumisa tshelede ine vhathu vha i ṋeela kha mushumo wa shango ḽoṱhe. Vhanzhi vha ṋeela vha tshi shumisa donate.pr418.com. Ri livhuwa miṋeelo ya vhoiwe ine ya tikedza tshenetshi tshikolo tsha vhagudiswa vha bvaho shangoni ḽoṱhe.