Buthano ḽa 2020 ḽo vha ḽi sa fani na maṅwe. Ḽo vha buthano ḽa u thoma u rekhodiwa na u itwa uri ḽi wanale kha Inthanethe! Fhedzi vhunzhi ha vhahashu vha ngei Malawi na Mozambique, vho kona u ṱalela na u thetshelesa buthano vha sa shumisi Inthanethe. Zwenezwi zwo konadzea hani?

 Komiti ya u Dzudzanya na ya u Funza ya Tshigwada tshi Langaho yo ṋea thendelo yo khetheaho ya uri vhahashu vha Malawi na Mozambique vha ṱalele buthano kha TV na u thetshelesa kha radio. Ndi ngani vhahashu vho tendelwa uri vha ite nga u ralo? Data dzi a ḓura nga maanḓa shangoni ḽa Malawi nahone ndi vhahashu vha si gathi vhane vha kona u dzi renga. Wahashu Vho-William Chumbi vhane vha vha muraḓo wa Komiti ya Davhi ḽa Malawi vho ri: “Vhahashu vho vha vha tshi ḓo kona u wana fhedzi buthano hu tshi shumisa Radio kana TV.” Vho-Luka Sibeko vhane na vhone vha vha muraḓo wa Komiti ya Davhi ḽa Malawi vho ri: “Ngavhe ri vhe ri songo wana buthano hu tshi shumiswa TV na radio, ho vha hu tshi ḓo vhuyelwa vhahashu vha si gathi fhedzi kha davhi ḽashu.” Na kha shango ḽa Mozambique, ndi vhahashu vha si gathi vhe vha vha vha tshi kona u swikelela u renga zwishumiswa zwa elekitironiki na data.

 Nga nṱhani ha dziedzi ḽa COVID-19, zwiṅwe zwiṱitshi zwa TV na zwa radio zwo vha zwi tshi vho hasha miṱangano ya tshivhidzo. a Vhahashu vho humbela zwenezwo zwiṱitshi uri vha kone u hasha na buthano.

 Vhahashu vha Malawi vho sedzana na vhuimo vhu konḓaho. Kanzhi zwenezwi zwiṱitshi zwa khasho zwi tendela mbekanyamushumo i tshi hashwa lwa awara nthihi fhedzi. Vhaṋe vha zwiṱitshi vha ofha uri arali mbekanyamushumo ya vha ndapfu, vhathu vha ḓo bvafha u i thetshelesa yoṱhe. Fhedzi vhahashu vho ṱalutshedza uri mushumo une ra u ita u thusa vhathu vhoṱhe. Naho ri kha lockdown, ri khou ḓivhadza mafhungo maḓifha a khuthadzaho a bvaho Bivhilini ane a thusa vhathu uri vha vhe vhadzulapo vhavhuḓi na uri vha takale muṱani. Musi vhaṋe vha zwiṱitshi vha tshi pfa zwenezwo, vho mbo ḓi tendela vhahashu uri vha hashe buthano.

 Ngei Malawi, buthano ḽo hashwa kha tshiṱitshi tshithihi tsha TV na kha tshiṱitshi tshithihi tsha radio. Zwenezwo zwiṱitshi zwivhili zwi wanala u mona na ḽoṱhe ḽa Malawi nahone vhathu vhanzhi vha nazwo. Ngei Mozambique, buthano ḽo haswa kha tshiṱitshi tshithihi tsha TV na kha zwiṱitshi zwa 85 zwa radio.

 Kha eneo mashango mavhili, ho shumiswa tshelede i linganaho R422 921.75 u itela u hasha buthano kha TV. Ha shumiswa tshelede i ṱoḓaho u vha R299 657.60 u itela u hasha buthano kha radio. Kha tshiṱitshi tshiṱuku mutengo wa u hasha kha radio wo vha u tshi thoma kha R224.74 nahone kha tshiṱitshi tshihulwane u tshi thoma kha R41 607.46.

 Vhahashu vho shuma nga maanḓa u itela uri vha shumise miṋeelo zwavhuḓi. Sa tsumbo ngei Malawi, vhahashu vho ambedzana na vhaṋe vha zwiṱitshi uri vha fhungudzelwe mutengo, u katela na u fhungudzelwa muṅwe mutengo nga phesenthe dza 30. Zwenezwo zwo ita uri hu vhulungwe tshelede i linganaho R25 635.71. Ngei Mozambique, zwiṅwe zwiṱitshi zwo vha zwo ḓiimisela u fhungudzela vhahashu mutengo nga nṱhani ha uri Ṱhanzi dza Yehova vha ḓivhelwa uri vha a fhulufhedzea nahone vha badela nga tshifhinga.

 Vhahashu vha livhuwa nga maanḓa uri vho kona u ṱalela na u thetshelesa buthano kha zwiṱitshi zwine vha vha nazwo. Wahashu Vho-Patrick vhane vha vha muhulwane wa tshivhidzo ngei Malawi vho ri: “Ri livhuwa vhahashu vha Tshigwada tshi Langaho nga zwithu zwoṱhe zwe vha ri itela zwone nga tshifhinga tsha dziedzi ḽa Corona.” Wahashu Vho-Isaac vhane na vhone vha bva Malawi, vho ri: “A ri na zwishumiswa zwa elekitironiki, ndi ngazwo ro takala nga maanḓa uri ndangulo ya Yehova yo ita ndugiselelo ya uri ri kone u thetshelesa buthano kha radio. Nga nṱhani ha yeneyi ndugiselelo, muṱa wanga woṱhe wo kona u vhuyelwa nga buthano. Zwenezwi zwo ri sumbedza uri Yehova u a funa vhathu vhawe.”

 Buthano ḽa 2020 ḽo vha ḽi ḽa u thoma kha muṅwe muhuweleli wa ngei Mozambique. O ri: “Ndugiselelo ya uri ri ṱalele buthano kha TV yo nkhumbudza uri Yehova ndi Mudzimu Ramaanḓaoṱhe. Dziedzi ḽa Corona a ḽo ngo kona u mu thivhela uri a ri ṋee zwithu zwine zwa ri khwaṱhisa lutendo na uri a ri ṋee zwone ri mahayani ashu. Ndo vhona vhuṱanzi ha uri vhathu vha Yehova vha a funana. Ndi na vhungoho ha uri hovhu ndi hone vhurereli ha ngoho.”

 Vho-Wyson vhane vha vha muhulwane wa tshivhidzo vho ri: “Ndi livhuwa nḓila ye mulanda a fhulufhedzeaho a ri ṱhogomela ngayo nga tshino tshifhinga tsha dziedzi ḽa Corona. Ndugiselelo ya uri ri ṱalele buthano kha TV na u ḽi thetshelesa kha radio, yo thusa na u vhuyedza vhathu vhanzhi vhane vha shaya vhukuma u fana na riṋe vhane vha dzula kha tshenetshi tshipiḓa tsha shango ḽi shayaho.”

 Komiti ya u Dzudzanya na Komiti ya u Funza dzo ita ndugiselelo yo khetheaho ya uri buthano ḽa 2021 na ḽone ḽi hashwe kha TV na kha radio kha maṅwe mashango. Ri i wana ngafhi tshelede ya u hasha buthano nga yeneyi nḓila? Ri i wana kha tshelede ine ya ṋeelwa u mona na shango ḽoṱhe. Vhunzhi ha yeneyo tshelede i ṋeelwa hu tshi shumiswa nḓila dzo fhambanaho dzi re kha donate.pr418.com. Ri livhuwa u ṋeela ha vhoiwe zwi tshi bva mbiluni.