Kha vhathu vhanzhi-vhanzhi vhane vha dzula Latin Amerika, hu na vhongwaniwapo vhanzhi vhane vha vha na nyambo dzavho na mvelelo dzavho. Vhunzhi ha vhenevho vhathu ndi vhahashu vhane vha dzhiela nṱha mvelelo yavho. U itela u thusa vhenevho vhathu uri vha ḓivhe Mudzimu, vha ṱalutshedzela na u phaḓaladza khandiso dza Ṱhanzi dza Yehova nga nyambo dza vhongwaniwapo vha Latin Amerika dzi fhiraho 130. a Fhedzi vhaṅwe vhavho vha a pikiswa nga nṱhani ha uri vho khetha u gwadamela Yehova na uri vha hana u shela mulenzhe kha mikhuvha i sa tshimbidzani na zwine Bivhili ya zwi funza yo ḓoweleaho hune vha dzula hone. Miṋeelo yaṋu yo shumiswa hani u itela u vha thusa?

 Ngei Mexico, vhahashu vha Vhahuichol vhane vha dzula thavhani dza Jalisco, vho hana nga nḓila yavhuḓi u shela mulenzhe kha mikhuvha ya vhurereli ine ya lwisana na zwine Bivhili ya zwi amba. b Fhedzi zwenezwo zwo sinyuwa vhaṅwe vhadzulapo vha henefho. Nga dzi 4 December 2017, tshigwada tsho sinyuwaho tsho ṱhasela Ṱhanzi dza Yehova na vhaṅwe vhathu vha si gathi vhe vha vha vhe navho. Tshenetsho tshigwada tsho vha pandela miḓini yavho, tsha tshinyadza thundu dzavho nahone vha amba uri vha ḓo vhulaya muṅwe na muṅwe ane a ḓo lingedza u vhuya.

 Ṱhanzi dzine dza dzula ḓoroboni ya nga tsini dzo mbo ḓi thusa vhenevho vhahashu. Fhedzi ndi mini zwe zwa vha zwi tshi nga itwa uri vha kone u vhuyelela mahayani avho? Wahashu ane a pfi Agustín o ri: “Ro vha ri si na tshelede ya u ṱoḓa ḽoyara nahone ro vha ri sa ḓivhi uri ri nga ya ngafhi u itela u wana thuso ya zwa mulayo.”

 Samusi vhahashu vho vha vhe si tsheena mbofholowo ya u gwadamela Mudzimu, davhi ḽa ngei Amerika Kati ḽo mbo ḓi dzhia vhukando nga u bonya ha iṱo. Tsha u thoma, vho humbela mapholisa a henefho uri a ite ṱhoḓisiso kha yeneyo milandu. Tsha vhuvhili, vho wana thendelo kha Komiti ya u Dzudzanya ya Tshigwada tshi Langaho tsha Ṱhanzi dza Yehova uri vha shume na Muhasho wa zwa Mulayo u re ngei ofisini khulwane. Musi vho no ita zwenezwo, vho mbo ḓi vula mulandu vha tshi itela u imelela vhahashu vha Vhahuichol. Wonoyo mulandu wo mbo ḓi fhedzisela wo swika Khothe Khulwane ya Khaṱhulo ya ngei Mexico.

 Tshigwada tsha maḽoyara a bvaho mashangoni o fhambanaho tsho amba uri samusi vhathu vha tshi tea u ṱhonifha mvelele ya vhongwaniwapo na vhongwaniwapo vha tea u ṱhonifha na u tsireledza mbofholowo ya vhathu vhavho vhoṱhe. A hu na mikano musi zwi tshi ḓa kha ndugelo dza vhathu.

 Nga dzi 8 July 2020, Khothe Khulwane ya Khaṱhulo yo dzhia tsheo i tshi ima na Ṱhanzi dza Yehova. Vho amba uri vhathu vhoṱhe vho pandelwaho vha tea u humela mahayani avho. Vho-Agustín vhe ha ambiwa nga havho afho nṱha, vho sumbedza nḓila ye vhone na vhaṅwe vha ḓipfa ngayo, vho ri: “Ro takala nahone ri livhuwa nga maanḓa zwe vhahashu vha ri itela zwone. Ro vha ri sa ḓo kona u ita tshithu arali vha vhe vha songo ri thusa.”

 Na vhahashu vha dzulaho muvhunduni wa San Juan de Ilumán ngei Ecuador vho pikiswa nga nḓila i fanaho. Henefho ndi hune ha dzula vhongwaniwapo vhanzhi vha Otavalo. Nga 2014 musi vho no wana bammbiri dzoṱhe dza thendelo dzine dza ṱoḓea, vho thoma u fhaṱa Holo ya Ṱhanzi dza Yehova. Fhedzi mufunzi o ranga phanḓa tshigwada tsha vhathu vha fhiraho 100 nahone vha imisa wonoyo mushumo wa u fhaṱa. Vhathu vha henefho vho mbo ḓi thivhela Ṱhanzi dza Yehova uri vha si tsha kuvhangana u itela u gwadamela Mudzimu.

 Muhasho wa zwa mulayo u re davhini ḽa Ecuador wo shumisana na muhasho u re ofisini khulwane u itela u lwela vhathu vha tshenetsho tshivhidzo uri vha kone u gwadamela Mudzimu vho vhofholowa. Vhahashu vho vhiga wonoyo mulandu khothe. Zwenezwo zwo ita uri vhathu vha henefho vha litshe u vha pikisa nahone vha tendela tshenetsho tshivhidzo uri tshi dovhe tshi fare miṱangano na uri vha fhedzise u fhaṱa Holo yavho ya Ṱhanzi dza Yehova. Fhedzi u itela u tsireledza ndugelo dza vhahashu tshifhingani tshi ḓaho, vhaimeleli vhashu vho humbela khothe khulwane uri i ite phetho kha fhungo ḽa ndeme ḽa uri: Naa vhongwaniwapo vha tea u ṱhonifha ndugelo dza vhathu?

 Nga dzi 16 July 2020, Khothe Khulwane ya Ecuador yo thetshelesa wonoyo mulandu. Vhahashu vhane vha shuma sa maḽoyara vha ngei Ecuador vho imelela tshivhidzo. Ho dovha ha vha na vhahashu vhaṋa vha maḽoyara vha bvaho kha maṅwe mashango vha re na tshenzhelo vhe vha amba na khothe. Nga nṱhani ha vhulwadze ha COVID-19, vho amba vhe mashangoni o fhambanaho vha tshi shumisa videoconference. Tshenetshi ndi tshiitea tsha u thoma tshe khothe ya tendela vhaimeleli vha Ṱhanzi dza Yehova vha bvaho kha maṅwe mashango vha tshi vha imelela Dziṱhanzi nga yeneyi nḓila. c Tshenetshi tshigwada tsho amba zwo ambiwaho nga vhaimeli vha zwa mulayo vha maṅwe mashango vhe vha khwaṱhisedza uri vhongwaniwapo a vha xelelwi nga ndugelo dza muthu nga eṱhe nga nṱhani ha uri vha dzula muvhunduni wa vhongwaniwapo.

 Vhahashu vha ngei Otavalo vho lavhelela nga maṱo matswuku u pfa uri Khothe i ḓo dzhia phetho ifhio. Musi vha tshee vho lindela yeneyo phetho, vho kwamea vhukuma nga thuso ye vha i wana. Vho-César vhane vha vha muhulwane wa tshivhidzo tsha Ilumán Quichua vho ri: “Ndi Yehova fhedzi ane a nga itela vha si gathi zwithu zwinzhi a tshi shumisa ndangulo yawe.”

 Vhoṱhe vhane vha khou shuma sa maḽoyara kha wonoyo mulandu ndi Ṱhanzi dza Yehova nahone vha takalela u thusa vha sa badelwi. Fhedzi u lugiselela wonoyo mulandu na u amba khothe, zwi ṱoḓa tshelede na tshifhinga. Maḽoyara ashu na vhaṅwe vhahashu, vho fhedza awara dzi fhiraho 380 vha tshi khou lugiselela wonoyu mulandu na dziṅwe awara dza 240 vha tshi khou ṱalutshedzela zwiṅwe zwithu zwine zwa ṱoḓea kha wonoyu mulandu wa Mexico. Maḽoyara a ṱoḓaho u vha 40 a bvaho kha maṅwe mashango, o fhedza awara nnzhi kha mulandu wa Ecuador. Ro i wana ngafhi tshelede ine ya ṱoḓea u itela u imelela vhahashu? Ndi miṋeelo ya vhoiwe ye na i ita ni tshi shumisa nḓila dzo fhambanaho dzo sumbedzwaho kha donate.pr418.com. Ri livhuwa u ṋeela ha vhoiwe zwi tshi bva mbiluni.