Nga ṅwaha wa 2020, ho vha na khombo nnzhi dza mupo nahone dziedzi ḽa COVID-19 ḽo mbo ḓi thoma nahone ḽa phaḓalala na shango ḽoṱhe. Ṱhanzi dza Yehova dzo thusa hani vhathu vho kwameaho?

 Nga ṅwaha wa tshumelo wa 2020, a Komiti Ya U Dzudzanya Ya Tshigwada Tshi Langaho yo ṋea thendelo ya uri hu shumiswe tshelede i linganaho R418 989 760 u itela u thusa vhathu vho welwaho nga khombo. Eneo masheleni o thusa vhathu vho welwaho nga khombo dzi fhiraho 200. Dzenedzo khombo dzi katela dziedzi ḽa COVID-19, ḓumbumazwikule, miḓalo ngei Afurika, ṱhahelelo ya zwiḽiwa ngei Venezuela na gomelelo ngei Zimbabwe. Tshelede yo ṋeelwaho yo thusa kha u renga zwiḽiwa, maḓi, fhethu ha u dzula, zwiambaro, mishonga u katela na zwithu zwa u kunakisa, u lugisa na u fhaṱulula zwifhaṱo. Kha ri vhone dziṅwe tsumbo dza zwithu zwe zwa itwa u itela u thusa vhathu vho welwaho nga khombo.

 COVID-19. Dziedzi ḽa COVID-19 ḽo kwama vhahashu u mona na shango, ḽo vha tsikeledza na u ita uri vha vhe na ṱhahelelo ya masheleni. U itela u vha thusa, ho vhumbiwa Komiti Dza U Thusa Vho Welwaho Nga Khombo (DRC) dzi fhiraho 800 u mona na shango. Vhahashu vhane vha shuma kha dzenedzi komiti vho vha vha tshi sedza zwine vhahashu vha zwi ṱoḓa na u rumela mivhigo nga u ṱavhanya. Yeneyo mivhigo yo thusa Komiti Ya U Dzudzanya uri i vhone uri i nga thusa hani.

 Nga ṅwaha wa 2020, dzi-DRC dzo thusa vhathu vhanzhi uri vha wane zwiḽiwa, maḓi, zwithu zwa u kunakisa na mishonga. Kha dziṅwe bulege, dzi-DRC dzo shuma na vhahulwane vha tshivhidzo vha henefho u itela u thusa vhahashu uri vha kone u wana thuso ya muvhuso.

 Na vhathu vhane vha si vhe Ṱhanzi dza Yehova vho ṱhogomela mushumo washu wa u thusa vho welwaho nga khombo. Sa tsumbo, Vho Field Simwinga vhane vha vha muofisiri wa tshiṱiriki tsha ngei Nakonde Zambia, vho vhudza vhahashu vha ri: “Ri khou livhuwa nga maanḓa nḓila ye na thusa ngayo miṱa yo kwameaho nga tshifhinga tsho teaho.”

 Ṱhahelelo Ya Zwiḽiwa Ngei Angola. Nga nṱhani ha dziedzi ḽa COVID-19, ho vha na ṱhahelelo ya zwiḽiwa ngei Angola nahone zwo ita uri na mitengo ya zwiḽiwa i gonye. Vhunzhi ha vhahashu vho wana zwi tshi vha konḓela u renga zwiḽiwa.

 Davhi ḽa Brazil ḽo humbelwa uri ḽi ise zwiputo zwa zwiḽiwa kha vhahashu vha ngei Angola. U itela uri vha shumise zwavhuḓi tshelede yo ṋeelwaho, vhahashu vho ita ṱhoḓisiso nga ha nḓila ine vha nga renga ngayo zwiḽiwa zwi zwinzhi na nḓila ine vha nga zwi rumela ngayo. Tshiputo tshithihi tsho rengwa nga tshelede i ṱoḓaho u vha R329,21 nahone tshi tshi lemela khilogramu dzi ṱoḓaho u vha 20. Kha tshenetsho tshiputo ho vha hu na raisi, ṋawa na mapfura a u bika. U swika zwino ho no rumelwa zwiputo zwa 33 544 zwi lemelaho khilogireme dza 653000. Zwenezwi zwithu zwoṱhe zwo ita uri vhathu vha fhiraho 50 000 vha wane zwiḽiwa!

 Vhahashu vha ḓipfa hani nga thuso ye vha i wana? Alexandre ane a dzula Angola kha tshiṅwe tshipiḓa tshi re kule na ḓorobo, o ri: “Ndi a zwi vhona uri Yehova u a mpfuna na uri a thi ndoṱhe. Ndangulo ya Yehova i ndzhia ndi wa ndeme!” Vho-Mariza vhane vha khou alusa ṅwana wavho vhe vhoṱhe, vho ri: “Yehova o pfa tshililo tshanga. Ndi a mu livhuwa na ndangulo yawe!”

 U Thusa Zimbabwe Nga Musi Wa Gomelelo. Nga ṅwaha wa tshumelo wa 2020, ho vha na gomelelo ḽihulu Zimbabwe ḽe ḽa ṱoḓa u ita uri vhathu vhanzhi vha sike nga nḓala. Ṱhanzi nnzhi dza Zimbabwe dzo vha na ṱhahelelo ya zwiḽiwa.

 Ho vhumbiwa dzi-DRC ṱhanu u itela u thusa vhahashu nga u vha ṋea zwiḽiwa. Vhahuweleli vhanzhi vho thusa nga u paka zwiḽiwa, u zwi ṋamedza kha dzigoloi kana u hadzima goloi dzavho. b Nga ṅwaha wa tshumelo wa 2020, ho shumiswa tshelede i linganaho R10 348 463,48 u itela u thusa vhathu vha fhiraho 22 700 uri vha wane zwiḽiwa!

 Kha vhuṅwe vhuimo, vhahashu vho vha vho no fhedza zwiḽiwa zwe vha vha vhe nazwo musi vha tshi wana thuso. Musi zwiḽiwa zwi tshi swika, vhahashu vho renda Yehova. Vhaṅwe vho thoma na u imba nyimbo dza ndangulo.

 Kha iṅwe bulege, tshilikadzi mbili dzine dza vha Ṱhanzi dza Yehova dzo ya kha muṱangano wa ḽiṅwe dzangano ḽi si ḽa muvhuso he ha vha hu tshi khou ambiwa nga ha u ṋea vhathu zwiḽiwa. Fhedzi kha wonoyo muṱangano, ho mbo ḓi thoma u ambeswa nga zwa politiki nahone vhenevho vhahashu a vho ngo tenda u ita zwe vha vhudzwa uri vha zwi ite u itela u wana zwiḽiwa. Musi vha tshi bva kha wonoyo muṱangano, vho holedzwa nahone vha vhudzwa uri: “Ni songo ḓa kha riṋe ni tshi ṱoḓa zwiḽiwa!” Fhedzi nga murahu ha vhege mbili, vhahashu vho sikwa kha yeneyo bulege nahone vha ṋea vhenevho vhahashu zwiḽiwa. Vho ita zwenezwo dzangano ḽi si ḽa muvhuso ḽi sa athu ḓisa zwiḽiwa!

 Mushumo wa u thusa vhathu vho welwaho nga khombo Zimbabwe wo ita uri vhathu vha ṱoḓe u ḓivha mafhungo maḓifha. Sa tsumbo, kha ri ambe nga ha Prisca ane a dzula fhethu hu re mahayani. Naho gomelelo ḽo ita uri vhutshilo vhu konḓe, Prisca o vha a tshi ya u huwelela nga Ḽavhuraru na nga Ḽavhuṱanu. O ita zwenezwo na nga tshifhinga tsha u lima. Vhathu vha muvhunduni wahawe vho vha vha tshi mu goḓa vha tshi ri: “Ni ḓo vhulayisa muṱa waṋu nga nḓala nga nṱhani ha u tshimbila haṋu ni tshi funza Bivhili.” Prisca o vha a tshi vha fhindula a ri: “Yehova ha athu vhuya a laṱedza vhashumeli vhawe.” Hu sa athu fhela tshifhinga tshilapfu, o wana zwiḽiwa zwi bvaho ndanguloni yashu. Zwenezwo zwo kwama vhahura vha Prisca lwe vha mu vhudza uri: “Mudzimu ha athu vhuya a ni laṱedza, ri ṱoḓa u guda zwo engedzeaho nga hae.” Zwino vhahura vhawe vha sumbe vha vho thetshelesa miṱangano ya tshivhidzo ine ya hashwa kha radio.

 Samusi vhufhelo vhu tsini, ri ḓo bvela phanḓa ri tshi sedzana na khombo dza mupo. (Mateo 24:3, 7) Ri livhuwa nga mbilu yoṱhe miṋeelo ya vhoiwe ine na i ṋeela ni tshi shumisa nḓila dzo fhambanaho dzi re kha donate.pr418.com. Yeneyo miṋeelo i shumiswa u thusa vhahashu vho welwaho nga khombo nga u vha ṋea zwine vha zwi ṱoḓa nga tshifhinga tsho teaho.