Ṱhanzi dza Yehova vha ita mushumo wa ndeme u itela u thusa vhathu mashangoni a fhiraho 200. Fhedzi ndi mashango a ṱoḓaho u vha 35 fhedzi ane a kona u ḓibadelela tshinyalelo a tshi shumisa miṋeelo yao. Tshinyalelo dzi badelwa hani mashangoni ane a shaya?

 Tshigwada Tshi Langaho tshi sedza uri Ṱhanzi dza Yehova u mona na shango ḽoṱhe, vha ṱoḓa mini u itela u gwadamela Yehova na u huwelela mafhungo maḓifha. Tshelede i a vhalelwa zwavhuḓi u itela uri i shumiswe nga nḓila yo teaho. Arali davhi ḽa wana tshelede i fhiraho ine ḽa ṱoḓa u i shumisa, ḽi ita uri yo salaho i fhiwe mashango ane a shaya. Musi hu tshi itwa zwenezwi, hu vha hu tshi khou tevhelwa tsumbo ya Vhakriste vha tshifhingani tsha kale vhe vha thusa vha shayaho “nga zwinzhi zwine [vha vha] nazwo.” (2 Vhakorinta 8:14) Vho shumisa zwinzhi zwe vha vhe nazwo u itela u thusa Vhakriste vha shayaho.

 Vhahashu vhe vha thuswa nga tshelede i bvaho kha maṅwe madavhi vha ḓipfa hani? Sa tsumbo, shangoni ḽa Tanzania hu na vhathu vhanzhi vhane vha tshila nga tshelede i re fhasi ha R33.38 nga ḓuvha. Tshelede i bvaho kha maṅwe mashango yo thusa tshivhidzo tsha Mafinga uri tshi kone u vusulusa Holo ya Muvhuso. Tshenetsho tshivhidzo tsho ṅwala uri: “U bva tshee ha vusuluswa Holo yashu, tshivhalo tsha vhathu vhane vha ḓa miṱanganoni tsho no engedzea! Ri livhuwa nga maanḓa ndangulo ya Yehova na vhahashu u mona na shango ḽoṱhe, vhe vha ita uri zwi konadzee uri ri ḓiphine nga u gwadamela Yehova ri fhethu hashu ha vhurabeli ho nakaho nga u rali.”

 Dziedzi ḽa COVID-19 ḽo ita uri vhaṅwe vhahashu vha Sri Lanka vha ṱahelewe nga zwiḽiwa. Vhaṅwe vhe vha kwamea ndi wahashu Vho-Imara Fernando na murwa wavho muṱuku Enosh. Fhedzi zwi takadzaho ndi uri miṋeelo ine ya bva kha maṅwe mashango yo ita uri vha wane thuso. Vho ita garaṱa nahone vha ṅwala khayo uri: “Ri livhuwa vhahashu vhe vha sumbedza uri vha a ri funa kha zwenezwi zwifhinga zwi konḓaho. Zwi a ri takadza vhukuma u vha miraḓo ya wonoyu muṱa wa vhahashu nahone ri rabelela uri Yehova a bvele phanḓa a tshi thusa vhahashu vhoṱhe kha enea maḓuvha a vhufhelo.”

 Vhahashu vha a ṋea vhaṅwe zwine vha nazwo hu sa londwi uri vha dzula ngafhi. Sa tsumbo, Enosh o ita kubogisi kuṱuku kwa u vhulunga tshelede uri a kone u ṋeela u itela u thusa miṱa ine ya shaya. Guadalupe Álvarez na ene u sumbedza u vha na mafunda nga nḓila i fanaho. U dzula kha tshiṅwe tshipiḓa tsha shango ḽa Mexico hune vhathu vha si gathi vha holelwa tshelede ṱhukhu kana a vha shumi na luthihi. Fhedzi u ita zwoṱhe zwine a nga kona u itela u ṋeela. O ṅwala uri: “Ndi livhuwa Yehova nga uri ndi wavhuḓi na uri u na lufuno lu sa shanduki. Ndi a zwi ḓivha uri muṋeelo wanga u ḓo engedza kha zwine vhahashu vha ṋeela nahone u ḓo shumiswa u itela u thusa vhahashu vhane vha shaya.”

 Ofisi dza davhi dzi a takalela u rumela tshelede kha mashango ane a shaya. Wahashu Vho-Anthony Carvalho vhane vha shuma sa muraḓo wa Komiti ya Davhi ngei Brazil vho ri: “Lwa miṅwaha minzhi, shango ḽashu ḽo vha ḽi tshi ṱoḓa u tikedzwa nga tshelede i bvaho kha maṅwe mashango. Yeneyo thikhedzo yo ita uri hu vhe na nyengedzeo khulwane. Fhedzi zwino vhuimo hashu ho no shanduka, ri vho kona na u thusa vhaṅwe. Vhahashu vha Brazil vha sedza mushumo wa u huwelela une wa khou itwa shangoni ḽoṱhe, vha vhona zwine vha nga ita u itela u thusa.”

 Ṱhanzi dza Yehova vha nga thusa hani vhahavho vhane vha shaya? A vha rumeli tshelede nga ho livhaho ofisini ya davhi ya ḽiṅwe shango, fhedzi vha ṋeela kha mushumo wa shango ḽoṱhe. Vhathu vha nga ṋeela vha tshi shumisa mabogisi a miṋeelo zwivhidzoni zwavho. Enea mabogisi o ṅwalwa u pfi “Worldwide Work” kana vha nga ṋeela kha donate.pr418.com. Ri livhuwa nga maanḓa miṋeelo yoṱhe.