Yehova Mudzimu u ṱoḓa vhathu vhoṱhe vha tshi guda nga hae na Muvhuso wawe u re ṱaḓulu, hu sa londwi vhuimo havho. (1 Timotheo 2:3, 4) Ndi ngazwo Ṱhanzi dza Yehova vha tshi bveledza Bivhili na khandiso dzo thewaho Bivhilini uri dzi kone u shumiswa nga vhathu vhanzhi nga hune zwa nga konadzea ngaho, u katela na vha luambo lwa zwanḓa. Ndangulo yashu yo no bveledza khandiso nnzhi dza vidio nga luambo lwa zwanḓa. a Dzenedzo vidio dzi wanala nga nyambo dza zwanḓa dzi fhiraho 100. Ri bveledza hani dzenedzo khandiso na u dzi phaḓaladza? Ndi tshanduko dzifhio dze ra dzi ita nga u ya ha tshifhinga?

 Khandiso dza luambo lwa zwanḓa dzi bveledzwa nga vhaṱalutshedzeli u mona na shango. Vhaṱalutshedzeli vha tea u lugiselela zwavhuḓi khandiso dzine vha khou ḓo dzi ṱalutshedzela. Vha kona u khetha uri vha ḓo ṱalutshedzela hani enea mafhungo nga luambo lwa zwanḓa. Vho no fhedza, vha rekhoda vidio ya yeneyo khandiso. Zwazwino hu na zwigwada zwa 60 zwa vhaṱalutshedzeli zwine zwa ṱalutshedzela khandiso dza Bivhili tshifhinga tshoṱhe na zwa 40 zwine zwa ṱalutshedzela nga zwiṅwe tshifhinga.

 Tshifhingani tsho fhiraho, zwo vha zwi tshi ḓura u bveledza vidio dza luambo lwa zwanḓa. Khamera dza dzividio na zwiṅwe zwishumiswa zwo vha zwi tshi ḓura u fhira zwino. Zwiṅwe hafhu, vidio dzo vha dzi tshi tea u rekhodiwa studio tshe ra vha ri tshi tea u ḓifhaṱela riṋe vhaṋe. Nga zwiṅwe zwifhinga, ro vha ri tshi tea u vusulusa tshifhaṱo ra tshi ita studio. Zwoṱhe zwo fhelela zwo vha zwi tshi nga ita tshelede i fhiraho R515 000.

 U itela u shumisa miṋeelo zwavhuḓi, ndangulo yashu yo shuma nga maanḓa u itela u khwinisa na u leludza nḓila ine ha ṱalutshedzelwa ngayo. Nga zwenezwo, ri shumisa zwishumiswa zwa musalauno zwi sa ḓuri, zwine zwa shuma zwavhuḓi. Nṱhani ha u shumisa studio, vhaṱalutshedzeli vha ita luvhondo ludala lune lwa vhidzwa green screen nahone vha rekhodela dzinedzi vidio ofisini dzavho. Arali hu tshi ṱoḓea vhaṱalutshedzeli vho engedzeaho u itela u rekhoda, a vho ngo tsha tea u tou ḓa studio, vha nga rekhoda tshipiḓa tshavho ofisini yavho kana hayani.

 Ri dovha ra ita na software ine ya thusa vhaṱalutshedzeli uri vha kone u ita mushumo wavho. Zwenezwo zwi ita uri vhaṱalutshedzeli vha kone u bveledza khandiso dza luambo lwa zwanḓa nga tshifhinga tshiṱuku u fhira mathomoni. Vhahashu vha a zwi dzhiela nṱha zwenezwi. Muṅwe wahashu ane a pfi Alexander o ri: “Hu vho bviswa vidio nnzhi dza luambo lwa zwanḓa u fhira mathomoni. Zwi a ntakadza vhukuma. Ndi ṱalela dzenedzi vidio ḓuvha ḽiṅwe na ḽinwe.

 Ano maḓuvha ri shumisa tshelede i sa swiki R86 000 u itela u renga zwishumiswa zwine zwa tea u shumiswa nga vhaṱalutshedzeli. Zwenezwi zwi ita uri ri kone u bveledza vidio nga nyambo dzo engedzeaho dza luambo lwa zwanḓa.

 Musi vhaṱalutshedzeli vha tshi fhedza u rekhoda khandiso dza luambo lwa zwanḓa, dzi tea u ṋewa vhathu. Tshifhingani tsho fhiraho, ro vha ri tshi bveledza dzikhasethe na dzi-DVD, fhedzi zwo vha zwi tshi ḓura, zwi mushumo munzhi nahone zwi tshi ḽa tshifhinga. Dzenedzo khasethe na DVD dzo vha dzi tshi rumelwa kha khamphani ya nnḓa uri dzi itwe nga vhunzhi. Nga 2013 fhedzi, ro shumisa tshelede i fhiraho R34 000 000 u itela u bveledza DVD dza luambo lwa zwanḓa.

 Vhathu vhane vha shumisa luambo lwa zwanḓa, vho vha vha tshi dzhiela nṱha yeneyo ndugiselelo. Fhedzi zwo vha zwi songo leluwa u shumisa vidio tshifhinga tshoṱhe ngauri dzikhasethe na dzi-DVD dzo vha dzi tshi khou engedzea. Nga zwiṅwe zwifhinga, ho vha hu tshi ṱoḓea DVD dzo vhalaho u itela u rekhoda bugu nthihi ya Bivhili. Wahashu wa ngei Brazil ane a pfi Gilnei o ri: “Musi ri tshi ṱoḓa u vhala luṅwalo, ro vha ri tshi tea u ṱoḓa khasethe yo teaho, nga murahu ra ṱoḓa vese ine ra khou ṱoḓa u i vhala. Zwo vha zwi tshi khou konḓa badi.” Wahashu wa tshifumakadzini ane a pfi Rafayane ane a shumisa DVD dza luambo lwa zwanḓa o ri: “U ita pfunzo ya Bivhili ya muthu nga eṱhe zwo vha zwi tshi netisa. Ro fhedza tshifhinga tshinzhi ri tshi khou sedza maṅwalo na dzi-reference.” Musi vhahashu vha tshi ya u huwelela, vho vha vha tshi ṱuwa na dzi-DVD kana dzikhasethe u itela u dzi tamba kha TV ya ṋemuḓi ane a takalela. Vhaṅwe vhahashu vho vha vha tshi ṱuwa na zwishumiswa zwa u tamba dzi-DVD. Nga murahu ha tshifhinga, vhunzhi ha vhahashu vho mbo ḓi vha na zwishumiswa zwa u tamba DVD zwine zwa vha na tshikirini. Bobby wa United States o ri: “Arali wo no vhala vese u tshi khou ṱoḓa u vhala iṅwe yo fhambanaho na yeneyo, wo vha u tshi tea u panga iṅwe DVD. Zwo vha zwi tshi ḽa tshifhinga, zwi tshi ita uri ri si kone u shumisa Bivhili zwavhuḓi musi ri tshi khou amba na muthu.”

 Nga 2013, ndangulo ya Yehova yo bvisa app ya JW Library Sign Language. Yeneyo app i ita uri vhahashu vha kone u downlouda na u tamba vidio dza luambo lwa zwanḓa kha founu kana tablet dzavho. Yeneyo app yo thoma u bviswa nga luambo lwa zwanḓa lwa America. Nga 2017, yeneyo app yo thoma u wanala nga nyambo dzoṱhe dza zwanḓa. Vhahashu u mona na shango ḽoṱhe vho vha vho takala vhukuma. Wahashu wa tshinnani ane a pfi Juscelino wa ngei Brazil o ri: “A tho ngo vhuya nda zwi kholwa! Ndo dzula ndi tshi humbula nga ha nḓila ine Tshigwada Tshi Langaho tsha funa ngayo riṋe vhathu vha luambo lwa zwanḓa. Vha ṱoḓa uri ri bvele phanḓa ri tshi vha Vhakriste vho vhibvaho u fana na vhaṅwe vhane vha amba dziṅwe nyambo. Ndo vha ndo takala nga maanḓa nahone yeneyo app yo ita uri ndi ṱoḓe u vhala Bivhili nga ho engedzeaho.”

 Ṋamusi, ri ita dzividio dzoṱhe dza luambo lwa zwanḓa, ra dzi panga kha website yashu na kha app ya JW Library Sign Language. Zwenezwo zwi ita uri khandiso dzoṱhe dza luambo lwa zwanḓa dzi ṱalutshedzelwe, u rekhodiwa na u phaḓaladzwa nga maḓuvha a si gathi nṱhani ha uri zwi dzhie miṅwedzi kana miṅwaha. Vhunzhi ha khandiso dza luambo lwa zwanḓa dzi bviswa khathihi na khandiso dza dziṅwe nyambo.

 Ṱhogomelani zwe zwa ambiwa nga vhaṅwe vhahashu vhane vha amba luambo lwa zwanḓa. Wahashu wa tshifumakadzini ane a pfi Klízia o ri: “A hu na iṅwe ndangulo ine ya ṱhogomela vhathu vha luambo lwa zwanḓa u fana na ndangulo yashu ine ya ri ṋea zwine ra zwi ṱoḓa u itela u khwaṱhisa lutendo lwashu nga nḓila yo leluwaho. Zwine ndangulo ya Yehova ya ri itela zwone a zwi vhambedzwi na tshithu.” Vladimir o ri: “Dzenedzo vidio dzi ntsumbedza uri Yehova u na ndavha na vhathu vhane vha amba luambo lwa zwanḓa u fana na nḓila ine a vha na ndavha ngayo na vhathu vhane vha amba dziṅwe nyambo.”

 Kanzhi vidio dzashu dza luambo lwa zwanḓa dzo ṅwaliwa uri: “Heyi khandiso a i rengiswi. Ndi tshipiḓa tsha mushumo wa u gudisa Bivhili wa shango ḽoṱhe u tikedzwaho nga miṋeelo ya u ḓifunela.” Ri livhuwa nga maanḓa miṋeelo ya vhoiwe ine kanzhi na i ita kha donate.pr418.com. Yeneyo miṋeelo i ri thusa uri ri kone u bveledza Bivhili na khandiso dzo thewaho Bivhilini, uri zwi kone u waniwa nga vhathu vhoṱhe u katela na vhane vha amba luambo lwa zwanḓa.