Yehova u a funa u gudisa vhathu vhawe. Ndi ngazwo ndangulo yawe yo thoma zwikolo zwine zwa gudisa vhagudiswa u ita mishumo ye vha ṋewa tshumeloni ya Yehova. Tshiṅwe tshazwo ndi Tshikolo Tsha Vhahuweleli Vha Muvhuso (SKE). Kha yeneyi miṅwaha, ndangulo ya Mudzimu yo livhisa ṱhogomelo kha u khwinisa zwine zwa funzwa na zwifhaṱo zwine zwa shumiswa u farela zwenezwi zwikolo. Tshipikwa tshihulwane ndi u ita uri zwi lelutshele vhagudisi u gudisa na vhagudiswa u guda. Miṋeelo yaṋu i khou thusa hani uri zwenezwi zwithu zwi kone u itea?

 Lwa miṅwaha minzhi, zwikolo zwa ndangulo zwo vha zwi tshi farelwa Holoni Dza Ṱhanzi Dza Yehova na Holoni Dza Maguvhangano. Zwino ndi ngani ho vusuluswa zwiṅwe zwifhaṱo kana ho fhaṱiwa zwiṅwe zwifhaṱo zwiswa, zwine zwa shumiselwa u fara zwikolo zwa ndangulo fhedzi? Kha ri ambe nga ha zwiitisi zwiraru.

 Hu na ṱhoḓea khulwane. Vho Christopher Mavor, vhane vha vha muthusi wa Komiti Ya Tshumelo Ya Tshigwada Tshi Langaho vho ṱalutshedza uri: “Ofisi dza madavhi dzo ri ḓivhadza uri hu khou ṱoḓea vhathu vhanzhi vhane vha ḓo thusa kha mushumo wa u huwelela. Sa tsumbo nga 2019, davhi ḽa Brazil ḽo vha ḽi tshi khou ṱoḓa vhathu vha ṱoḓaho u vha 7 600 vha bvaho kha tshikolo tsha SKE u itela u thusa tsimuni ya davhi ḽavho.” Davhi ḽa United States ḽo ḓivhadza uri hu khou ṱoḓea vhavulanḓila vhane vha ḓo gudisa vhaṅwe u huwelela nga tshigariki fhethu ha vhomuthumunzhi, u huwelela vhuimazwikepe na u huwelela dzidzhele. Hu dovha ha ṱoḓea vhahashu vhane vha ḓo shuma kha Muhasho Wa U Fhaṱa (LDC) na kha Komiti Ya Vhulamukanyi Na Vhuongelo (HLC). Vho ṱhaphudzaho tshikolo tsha SKE vha nga thusa kha yeneyi mishumo.

 Vhathu vhanzhi vhane vha ṱoḓa u ya SKE. Madavhi manzhi o no ṱanganedza fomo dza vhathu vhane vha ṱoḓa u ya tshikoloni tsha SKE, vhane zwa zwino vha si kone u vha ṱanganedza vhoṱhe nga khathihi. Sa tsumbo ngei davhini ḽa Brazil, vho ṱanganedza fomo dza 2 500 dza vhane vha khou ṱoḓa u ya SKE nga ṅwaha muthihi fhedzi. Fhedzi nga nṱhani ha uri a vha na zwifhaṱo zwinzhi, vho kona u ṱanganedza vhagudiswa vha 950 fhedzi.

 Fhethu ha u dzula ho teaho. Kanzhi musi zwikolo zwo farelwa Holoni Dza Ṱhanzi Dza Yehova kana Holoni Dza Maguvhangano, vhagudiswa vha dzula mahayani a vhahashu. Zwenezwi zwi konadzea fhedzi kha mashango ane ha farwa kilasi dzi si gathi nga ṅwaha. Fhedzi kha mashango ane vha fara kilasi nnzhi, a zwi konadzei uri vhahashu vha ṱanganedze vhagudiswa lwa miṅwedzi minzhi kha ṅwaha. Zwino hu na zwifhaṱo zwe vhagudiswa vha itelwa zwone zwi re tsini na kilasi dzavho.

 Tshifhaṱo tshi re na kilasi nthihi na fhethu hune vhagudisi na vhagudiswa vha ṱoḓaho u vha 30 vha nga dzula hone, tshi nga ḓura dzimiḽioni, zwi tshi ya nga fhethu na zwiṅwe zwiitisi.

 Kanzhi zwikolo zwi vha fhethu ho fhumulaho hu re kule na ḓorobo, fhedzi hu ne ha vha na zwiṋamelo zwa vhomuthumunzhi. Kanzhi hu nangwa fhethu hu re na vhahuweleli vhanzhi vhane vha ḓo thusa tshikoloni na u ṱhogomela zwifhaṱo na zwishumiswa.

 Zwenezwo zwifhaṱo zwi na dzi laiburari, fhethu hune vhagudiswa vha nga vhala hone, dzikhomphyutha, printhara na zwiṅwe zwishumiswa. Kanzhi hu vha hu na fhethu hu ne vhagudisi na vhagudiswa vha nga ḽela hone. Hu dovha ha vha na hune vha nga ita hone nyonyoloso na u ḓigeḓa.

 Na dzikilasi dzo itiwa nga nḓila ya vhulondi. Vho Troy vhane vha shuma kha Muhasho Wa U Fhaṱa Wa Shango Ḽoṱhe (WDC) u re ngei Warwick, New York vho ri: “Ro amba na vha Muhasho Wa Zwikolo Zwa Ndangulo uri vha ri thuse nga pulane dza kilasi dzine dza ḓo thusa vhagudiswa uri vha gude nga ho leluwaho. Vho ri vhudza uri dzikilasi dzi tea u vha khulwane lungafhani, nḓila ine dza tea u dzudzanywa ngayo, mavhone ane a tea u shumiswa na zwishumiswa zwine zwa ṱoḓea u itela u tamba vidio.” Musi zwi tshi ḓa kha zwishumiswa zwa audio, Vho Zoltan vhane vha vha mugusi wa tshikolo tsha SKE ngei Hungary vho ri: “Mathomoni ro vha ri si na khudzaipfi, zwino ro vha ri tshi tea u humbudza vhagudiswa lwo vhalaho uri vha ambele nṱha. Zwazwino a i tsha vha thaidzo ngauri ṱafula ḽiṅwe na ḽiṅwe ḽi na khudzaipfi.

 U khwiniswa ha zwifhaṱo, zwo kwama hani vhagudisi na vhagudiswa? Vho Angela vhe vha ya tshikoloni tsha SKE ngei Palm Coast, Florida, U.S.A vho amba uri: “Ndi fhethu havhuḓi ho dzikaho, zwithu zwoṱhe zwo dzudzanyea u katela na kilasi na fhethu hune ra dzula hone. Zwenezwo zwi ri thusa uri ri tou fombe kha u guda.” Vho Csaba vha re mugudisi ngei Hungary, vha takalela uri vha a kona u ḽa na vhagudiswa vho dzula fhethu huthihi. Vha amba uri musi vha tshi khou ḽa vhoṱhe, “vhagudiswa vha amba vho vhofholowa nga ha vhone vhaṋe na zwe zwa itea vhutshiloni havho. Zwenezwo zwi ita uri ri vha ḓivhe khwine. Musi ri tshi vha ḓivha khwine, zwi ita uri ri vha gudise u tendelana na ṱhoḓea dzavho.”

 Vhagudisi na vhagudiswa vha dzhia zwenezwo zwifhaṱo zwo khwiniswaho sa tshifhiwa tshi bvaho kha Yehova, ane a vha ‘Mufunzi washu Muhulwane.’ (Yesaya 30:20, 21) Wahashu wa tshifumakadzini wa ngei Philippines we a ya tshikoloni tsha SKE kha tshifhaṱo tsho shandulwaho tsha vha tshikolo, o ri: “Tshenetsho tshikolo tsho ri humbudza uri a ri sokou vha vhagudiswa, fhedzi ri vhaeni vha Yehova vho khetheaho. U khou ṱoḓa uri ri ḓiphiṋe musi ri tshi khou guda ipfi ḽawe nga vhuronwane.”

 Ri kona u fhaṱa zwenezwo zwifhaṱo zwa tshikolo, u zwi vusulusa na u zwi ṱhogomela ri tshi shumisa miṋeelo ya vhoiwe ine vhunzhi na i ṋeela ni tshi shumisa donate.pr418.com. Ri livhuwa nga maanḓa mafunda a vhoiwe.