Lwa miṅwaha I fhiraho 130, Ṱhanzi Dza Yehova vha vha na Mabuthano ṅwaha muṅwe na muṅwe. Kha eneo mabuthano zwa zwino hu ṋekedzwa nyambo dzi fhiraho 40, hu a tambiwa muzika, ha vha nyambedzano, ha tambiwa na dzividio. Uri vhathu vha kone u vhuyelwa nga dzenedzo mbekanyamushumo, vha fanela u kona u dzi ‘pfa na u kona u dzi vhona’ zwavhuḓi. (Luka 2:20) Miṋeelo yaṋu i shumiswa hani u itela u ita vhungoho ha uri vhoṱhe vha a vhuyelwa nga enea mabuthano hu sa londwi hune vha dzula hone?

 Mashangoni manzhi, vhunzhi ha fhethu hune ha farelwa hone mabuthano hu vha hu na zwishumiswa zwa audio/video. Fhedzi ndi ngani ri tshi ḓa na zwishumiswa zwashu musi ri tshi hira henefho fhethu? David ane a shuma Ofisini Khulwane Dza Ṱhanzi Dza Yehova kha muhasho wa Broadcasting o ri: “Zwishumiswa zwa fhethu hunzhi hune ra hu hira a zwo ngo itwa nga nḓila ine ra nga kona u fara mbekanyamushumo ya awara dzi fhiraho rathi ine kanzhi vhathu vha vha vha tshi khou tou amba. Sa tsumbo, fhethu hune ha tambelwa hone mitambo, vha shumisa zwenezwi zwishumiswa u itela u ita nḓivhadzo pfufhi kana u tambanyana muzika. Zwikirini zwavho ndi zwa u sumbedza zwikoro zwa mutambo, khunguwedzo na u dovholola vidio pfufhi dza zwipiḓa zwa mutambo. Fhedzi riṋe ri ṱoḓa uri vhathetshelesi vhashu vha ṱalele vidio ndapfu na uri vha pfe na u pfesesa zwoṱhe zwine zwa ḓo vha zwi tshi khou ambiwa.”

 Fhethu hune ha farelwa hone mabuthano a hu fani, ndi ngazwo hu tshi tea u shumiswa zwishumiswa zwa audio/video zwo teaho henefho fhethu. Musi ho no khethiwa fhethu hune mabuthano a ḓo farelwa hone, muhasho wa Broadcasting u re ofisini ya davhi ndi wone u no khetha uri hu ḓo dzuliswa hani zwi tshi ya nga tshivhalo tsha vhathu na vhuhulwane ha fhethu hune buthano ḽa ḓo farelwa hone. Nga murahu, vhahashu vha a sedzulusa na u kala u itela u vhona uri zwipikara na zwikirini zwi nga vhewa ngafhi, vha kona u ita mutevhe wa zwishumiswa zwine zwa ṱoḓea u itela uri vhathu vhoṱhe vha kone u vhona na u pfa zwavhuḓi mbekanyamushumo.

 Mushumo wa audio/video u a konḓa, zwihuluhulu kha mabuthano ane a vha o farelwa fhethu huthihi nga nyambo nnzhi. Arali mbekanyamushumo i tshi ḓo ḓologiwa nga luṅwe luambo, vhathu vhane vha ḓo vha vha tshi khou ḓologa vha tea u kona u vhona na u pfa zwavhuḓi yeneyo mbekanyamushumo. Nahone vhahashu vha ita uri vhathu vha kone u pfa zwine zwa kha ḓologiwa nga luambo lwavho. Nga nṱhani ha zwishumiswa zwa vidio zwo khetheaho, vhathu vha nyambo dza malo vha a kona u vhona vidio nga tshifhinga tshithihi fhedzi vha tshi khou pfa nga luambo lwavho. David o dovha a ri: “A zwo ngo leluwa u shumisa zwenezwi zwishumiswa, ndi ngazwo vhahashu vhane vha zwi shumisa vha tshi tea u thoma vha gudiswa.”

 Vhunzhi ha ofisi dza davhi dzi na zwishumiswa zwa audio/video zwine zwa shumiswa ṅwaha muṅwe na muṅwe. Vhahashu vha dzudzanya uri zwenezwo zwishumiswa zwi shumiswe kha mabuthano o fhambanaho. Davhi ḽa Amerika ḽi shumisa tshelede i fhiraho R2 696 000 ṅwaha muṅwe na muṅwe u itela uri zwenezwi zwishumiswa zwi kone u iswa mabuthanoni. Fhedzi a zwi ḓuri musi zwi tshi vhambedzwa na tshelede ine ya nga shumiswa u renga zwiṅwe zwishumiswa na u zwi ṱhogomela. Steven we a thusa kha mushumo wa audio/video buthanoni ḽa Canada, o ri: “Vhahashu vhe vha vha vha tshi khou shuma kha audio/video vho ita vhungoho ha uri zwishumiswa zwoṱhe zwo pakiwa na u vhuyedzedzwa fhethu ho teaho uri zwi kone u iswa kha ḽiṅwe buthano.”

 Zwi a ḓura u hira zwishumiswa zwa audio/video nahone kanzhi zwi vha zwi kha vhuimo vhu si havhuḓi. Ndi ngazwo ri tshi tou renga zwishumiswa zwine ra zwi ṱoḓa. Zwikirini zwa LED zwine vhulapfu hazwo ha vha mithara ṱhanu na mithara tharu u ya matungo zwi ḓura tshelede i ṱoḓaho u vha R443 000. Thambo nthihi ya khudzaipfi ya mithara dza 15 i ḓura tshelede i ṱoḓaho u vha R370. Muhasho Broadcasting u shumisana na muhasho wa Zwa U Renga u itela u “vhalela” tshelede ine ya nga ṱoḓea vha sa athu renga zwishumiswa. (Luka 14:28) Sa tsumbo, vha a ḓivhudzisa uri ndi vhathu vhangana vhane vha ḓo vhuyelwa nga zwenezwi zwishumiswa? Naa u zwi renga ndi yone nḓila ya khwinesa? Naa hu na fhethu hune ra nga vhea hone zwenezwi zwishumiswa? Naa ri na dzithulusi na vhahashu vho gudiswaho u ṱhogomela zwenezwi zwishumiswa?

 U itela uri zwenezwi zwishumiswa zwi kone u shumiswa lwa miṅwaha minzhi na uri ri kone u vhulunga miṋeelo ya vhahashu, ri dzula ri tshi zwi ṱola na u zwi lugisa. Musi ri tshi rumela zwenezwi zwishumiswa, ri vha ro zwi dzhenisa kha mabogisi o khwaṱhaho uri zwi si tshinyale. Na eneo mabogisi ri dzula ri tshi a lugisa.

 Vhathu vha sa shumeli Yehova vho mangadzwa vhukuma nga nḓila ine zwishumiswa zwa audio/video zwa shuma ngayo mabuthanoni ashu. Sa tsumbo, kha ḽiṅwe buthano muṅwe munna ane a shuma kha iṅwe ya khamphani khulwane, o amba nga ha nḓila ine zwishumiswa zwa audio/video zwine zwa shumiswa kha mabuthano ashu zwa vha zwa vhuimo ha nṱha ngayo. Jonathan ane a shuma u dzhenisa zwishumiswa zwa audio/video mabuthanoni, o ri: “Onoyo munna o vha o mangala vhukuma musi a tshi pfa uri vhahashu vhane vha khou shuma kha muhasho wa audio/video buthanoni a vho ngo zwi gudela na uri vha khou tou shuma nga u ḓifunela. O amba uri zwi nga dzhiela khamphani yawe maḓuvha maṱanu u dzhenisa zwenezwo zwishumiswa zwine riṋe ra zwi dzhenisa nga ḓuvha ḽithihi na hafu.” Kha ḽiṅwe buthano, mulanguli wa fhethu he buthano ḽa vha ḽo farelwa hone o amba uri: “Ho no ḓa vhathu vhanzhi vho gudelaho zwa muzika na vidio, fhedzi a thi athu vhona vhathu vha re na vhutsila na vhukoni vhu fanaho na hovhu!”

 Naa zwishumiswa zwa audio/video zwo ni vhuyedza buthanoni? Khamusi ni ḓipfa u fana na Vho David vhane vha dzula England. Vho ri: “Ndi na miṅwaha ya 88 nahone ndi kale ndi tshi ya mabuthanoni. Fhedzi zwino ndi vho kona u livhisa ṱhogomelo kha mbekanyamushumo yoṱhe ndi sa thithisei. Ri livhuwa vidio dzavhuḓi, dzi ita uri mbekanyamushumo i nge i khou fhela nga u ṱavhanya nahone mulaedza u a pfesesea nga ho leluwaho.” Micheal ane a dzula Nigeria o ri: “Nga nṱhani ha uri zwino vhahashu vha vho kona u pfa na u vhona vidio zwavhuḓi, a vha tsha thithisea musi vhe buthanoni.”

 Musi ni tshi ya buthanoni ḽa dzingu kana buthanoni ḽo khetheaho ḽa uno ṅwaha ḽa “Ḓivhadzani Mafhungo Maḓifha!”, ni humbulisise nga ha mushumo wo itwaho uri ni kone u pfa na u ṱalela yeneyo mbekanyamushumo. Ri livhuwa uri miṋeelo ya vhoiwe u katela na ye ya itwa kha donate.pr418.com yo thusa uri zwenezwo zwi konadzee. Ri khou livhuwa.