U bviswa ha muthu tshivhidzoni zwi tsireledza tshivhidzo na u thusa muitazwivhi a sa rembuluwi. (1Krt 5:6, 11) Musi ri tshi tikedza nḓila ine Yehova a kaidza ngayo, ri vha ri tshi khou sumbedza lufuno. U bvisa muthu tshivhidzoni zwi sumbedza hani lufuno ngeno zwi tshi vhaisa vhathu vhoṱhe u katela na mashaka na miraḓo ya komiti ya khaṱhulo?

Tsha ndeme vhukuma, ri vha ri tshi khou sumbedza uri ri funa Yehova, u ṱhonifha zwine a zwi dzhia zwo kuna na uri a ri ṱoḓi dzina ḽawe ḽi tshi ḓodzwa matope. (1Pe 1:14-16) Ri vha ri tshi khou sumbedza na uri ri funa muthu o bviswaho tshivhidzoni. Naho u kaidzwa zwi tshi vhavha, zwi nga ita uri muthu o kaidzwaho ‘a vhe na mulalo, a ite zwivhuya.’ (Hev 12:5, 6, 11) Musi ri tshi konana na vhathu vho bviswaho tshivhidzoni kana vho ṱutshelaho ndangulo, ri vha ri tshi khou lwisana na nḓila ine Yehova a kaidza ngayo. Ni songo hangwa uri Yehova “u kaidza nga nḓila yo teaho.” (Yer 30:11) Ri fhulufhela uri muthu o bviswaho tshivhidzoni u ḓo humela kha Khotsi ashu wa khathutshelo. Zwine riṋe ra tea u zwi ita zwa zwino, ndi u bvela phanḓa na u tikedza nḓila ine Yehova a kaidza ngayo na u ita zwoṱhe zwine ra nga kona u itela u khwaṱhisa vhushaka hashu nae.—Yes 1:16-18; 55:7.

ṰALELANI ḼITAMBWA ḼINE ḼA RI: DZULANI NI TSHI FHULUFHEDZEA NAHO ZWI TSHI KONḒA, NGA MURAHU NI FHINDULE MBUDZISO DZI TEVHELAHO:

• Vhabebi vha ḓipfa hani musi ṅwana wavho a tshi ṱutshela Yehova?

• Tshivhidzo tshi nga tikedza hani miraḓo ya muṱa ine ya khou bvela phanḓa na u fhulufhedzea kha Yehova?

• Ndi tsumbo ifhio i re Bivhilini ine ya ri gudisa uri u fhulufhedzea kha Yehova ndi zwa ndeme u fhira u fhulufhedzea kha muṱa washu?

• Ri nga sumbedza hani uri ri fhulufhedzea kha Yehova u fhira u fhulufhedzea kha muṱa washu?